Preeti Sudan : యూపీఎస్సీ ఛైర్​పర్సన్​గా ప్రీతి సుదాన్​ నియామకం..

యూనియన్ పబ్లిక్ సర్వీస్ కమిషన్ (యూపీఎస్సీ) ఛైర్​పర్సన్​గా కేంద్ర ఆరోగ్య శాఖ మాజీ కార్యదర్శి ప్రీతి సుదాన్ నియమితులయ్యారు. ఆగస్టు 1వ తేదీ, గురువారం ఆమె ఈ పదవిని చేపట్టనున్నారని సమాచారం.

వ్యక్తిగత కారణాలతో యూపీఎస్సీ ఛైర్మన్​ పదవికి మనోజ్​ సోనీ రాజీనామా చేయగా.. ఆయన స్థానాన్ని ప్రీతి భర్తీ చేయనున్నారు.

ఎవరు ఈ ప్రీతి సుదాన్​..?

ప్రీతీ సుదాన్ 1983 బ్యాచ్ ఆంధ్రప్రదేశ్ కేడర్‌కు చెందిన రిటైర్డ్ ఐఏఎస్ అధికారి. సూదాన్ ఇంతకు ముందు యూపీఎస్​ఏసీలో సభ్యురాలిగా ఉండేవారు.

ప్రీతి సుదాన్​కు లండ్​ స్కూల్​ ఆఫ్​ ఎకనామిక్స్​ నుంచి ఎకనామిక్స్​తో పాటు సోషల్​ పాలసీ, ప్లానింగ్​లో డిగ్రీ ఉంది. వాషింగ్టన్​లో పబ్లిక్​ ఫైనాన్స్​ మేనేజ్​మెంట్​ శిక్షణ తీసుకున్నారు. ఆమెకు ఎకనామిక్స్​లో ఎం.ఫిల్, సోషల్​ పాలిసీ- ప్లానింగ్​లో ఎంఎస్​సీ డిగ్రీలు కూడా ఉన్నాయి.

కేంద్ర ఆరోగ్యశాఖ సెక్రటరిగా రిటైర్​ అవ్వకముందు కొవిడ్​-19 సంక్షోభాన్ని ప్రీతి సమర్థవంతంగా ఎదుర్కొన్నారు. దాని కన్నా ముందు ప్రజా ఆహార పంపిణీ విభాగానికి సెక్రటరీగా పనిచేశారు. శిశు-మహిళాభివృద్ధి, రక్షణశాఖలో కూడా ఆమె సేవలందించారు. స్టేట్​ అడ్మినిస్ట్రేషన్​లో ఫైనాన్స్​ అండ్​ ప్లానింగ్​, విపత్తు నిర్వహణ, పర్యటన, వ్యవసాయ విభాగాల్లోనూ పని చేసిన అనుభవం ఆమె సొంతం.

జాతీయస్థాయి కార్యక్రమాల్లో ప్రీతి సుదాన్​ చాలా కీలక పాత్ర పోషించారు. బేటీ బచావ్​-బేటీ పడావ్​, ఆయుష్మాన్​ భారత్​కు సంబంధించి ఎన్నో కీలక బాధ్యతలు చేపట్టారు. నేషనల్​ మెడికల్​ కమిషన్​పై చట్టం, ఈ-సిగరెట్లపై నిషేధం వంటివి ఆమె చేపట్టిన ఇంకొన్ని ముఖ్యమైన పనులు.

వీటితో పాటు వరల్డ్​ బ్యాంక్​కి కూడా ప్రీతి సుదాన్​ కన్సల్టెంట్​గా ఉన్నారు. సీఓపీ-8 ఆఫ్​ ఫ్రేమ్​వర్క్​ కన్వెన్షన్​ ఆన్​ టొబాకో కంట్రోల్​కి ఛైర్​పర్సన్​గాను పనిచేశారు. పసికందు- శిశు ఆరోగ్య విభాగానికి వైస్​-ఛైర్​పర్సన్​ అయ్యారు. డబ్ల్యూహెచ్​ఓకి చెందిన సంక్షోభ నిర్వహణ, స్పందన ప్యానెల్​లో సభ్యురాలు ప్రీతి సుదాన్​. గ్లోబల్​​ డిజిటల్​ హెల్త్​ పార్ట్​నర్​​షిప్​కి ఆమె ఛైర్​పర్సన్​.

2022 నవంబర్​ 29న ప్రీతి సుదాన్​ యూపీఎస్సీలో సభ్యురాలిగా చేరారు. అంటే దాదాపు అన్ని ప్రధాన రంగాల్లో పనిచేసిన అనుభవం, అపార జ్ఞానం ప్రీతి సుదాన్​ సొంతం.