Nanded hospital news : రెండు రోజుల్లో 31మంది మృతి.. ఆ ఆసుపత్రిలో ఏం జరుగుతోంది?-nanded hospital news another 7 patients died total 31 succumbed in 2 days ,జాతీయ - అంతర్జాతీయ న్యూస్
తెలుగు న్యూస్  /  National International  /  Nanded Hospital News Another 7 Patients Died Total 31 Succumbed In 2 Days

Nanded hospital news : రెండు రోజుల్లో 31మంది మృతి.. ఆ ఆసుపత్రిలో ఏం జరుగుతోంది?

Sharath Chitturi HT Telugu
Oct 03, 2023 11:53 AM IST

Nanded hospital news : మహారాష్ట్రలోని ఓ ప్రభుత్వ ఆసుపత్రిలో చికిత్స పొందుతున్న 31మంది రోగులు ప్రాణాలు కోల్పోయారు. మరో 71మంది ఆరోగ్య విషమంగా ఉన్నట్టు వార్తలు వస్తున్నాయి.

రెండు రోజుల్లో 31మంది మృతి.. ఆ ఆసుపత్రిలో ఏం జరుగుతోంది?
రెండు రోజుల్లో 31మంది మృతి.. ఆ ఆసుపత్రిలో ఏం జరుగుతోంది? (HT_PRINT)

Nanded hospital news : మహారాష్ట్ర నాందేడ్​ ప్రభుత్వ ఆసుపత్రిలో రోగుల మృతుల సంఖ్య ఆందోళనకర రీతిలో పెరుగుతోంది. తాజాగా.. మరో ఏడుగురు ప్రాణాలు కోల్పోయారని అధికారులు చెప్పారు. మొత్తం మీద.. రెండు రోజుల వ్యవధిలో.. ఈ ఆసుపత్రిలో చికిత్స పొందుతూ ప్రాణాలు కోల్పోయిన వారి సంఖ్య 31కి చేరింది.

ట్రెండింగ్ వార్తలు

అసలేం జరుగుతోంది..?

నాందేడ్​లో డా. శంకర్​రావ్​ చవాన్​ ప్రభుత్వ ఆసుపత్రి ఉంది. సెప్టెంబర్​ 30- అక్టోబర్​ 1 మధ్యలో ఇక్కడ 24మంది రోగులు మరణించారు. సోమవారం సాయంత్రం ఈ వార్త బయటకు వచ్చింది. 24 గంటల వ్యవధిలో 24మంది రోగులు మరణించడం సంచలనం సృష్టించింది. ఈ 24మందిలో 12మంది పసిబిడ్డలు కావడం అత్యంత ఆందోళకర విషయం. మరో 12మందిలో ఐదుగురు పురుషులు, ఏడుగురు మహిళలు ఉన్నారు. మృతుల్లో నలుగురు.. గుండె సంబంధిత వ్యాధితో ఇబ్బంది పడుతున్నారు. ఓ వ్యక్తి విషపూరిత పదార్థం తీసుకోవడంతో ఆసుపత్రిలో చేరాడు. ఒకరికి లివర్​ సమస్యలు ఉన్నాయి. ఇద్దరు కిడ్నీ రోగులు ఉన్నారు. మూడు యాక్సిడెంట్​ కేసులు ఉన్నాయి.

Nanded hospital news today : ఇక అక్టోబర్​ 1- 2 తేదీల మధ్యలో మరో ఏడుగురు ప్రాణాలు విడిచారు. అంటే.. 48 గంటల్లో 31మంది ప్రాణాలు కోల్పోయినట్టు! మొత్తం 31 మందిలో 16మంది పసికందులు- చిన్నారులు ఉన్నట్టు తెలుస్తోంది.

"సెప్టెంబర్​ 30- అక్టోబర్​ 1 మధ్యలో 24మంది మరణించారు. అక్టోబర్​ 1-2 మధ్యలో ఏడుగురు మృతిచెందారు. దయచేసి భయపడకండి. వైద్య నిపుణుల బృందం సిద్ధంగా ఉంది," అని అధికారులు వెల్లడించారు.

అయితే ఈ ఘటనకు గల కారణాలపై స్పష్టత రావడం లేదు. ఔషధాల కొరత ఇందుకు కారణమని వార్తలు వచ్చాయి. కాగా వీటిని ఆసుపత్రి సిబ్బంది ఖండించింది.

Nanded hospital death toll : "ఆసుపత్రిలో వైద్యులు నిర్లక్ష్యం వహించలేదు. ఔషధాలు కూడా ఉన్నాయి. చికిత్స ఎంత అందించినా రోగులు రికవర్​ అవ్వలేదు," అని నాందేడ్​ ప్రభుత్వ ఆసుపత్రి డీన్​ శ్యామ్​రావ్​ వకోడే మీడియాకు తెలిపారు.

నాందేడ్​ ఆసుపత్రిలో రోగుల మృతికి సంబంధించిన ఘటనపై దర్యాప్తు చేపట్టినట్టు ప్రభుత్వ అధికారులు చెప్పారు. ముగ్గురు సభ్యుల బృందం దర్యాప్తు చేస్తోందని స్పష్టం చేశారు. త్వరలోనే ఓ నివేదిక సమర్పిస్తారని, అందులో కీలక విషయాలు బయటపడతాయని అధికారులు అంటున్నారు.

మరోవైపు.. ఈ ఆసుపత్రిలోని మరో 71 మంది రోగుల ఆరోగ్యం విషమంగా ఉన్నట్టు తెలుస్తోంది.

రాజకీయ దుమారం..

Maharashtra hospital deaths : మహారాష్ట్ర ప్రభుత్వ ఆసుపత్రిలో ఈ స్థాయిలో మరణాలు నమోదవ్వడంపై రాజకీయ దుమారం చెలరేగింది. అధికార ఏక్​నాథ్​ శిందే ప్రభుత్వంపై విపక్షాలు మండిపడ్డాయి.

"ఈ ఘటన చాలా దురదృష్టకరం. ఆగస్ట్​లో కూడా థానెలోని ఓ ప్రభుత్వ ఆసుపత్రిలో 18మంది రోగులు మరణించారు. అసలేం జరుగుతోంది?" అని మండిపడ్డారు కాంగ్రెస్​ అధ్యక్షుడు మల్లిఖార్జున ఖర్గే!

"పబ్లిసిటీకి వేల కోట్లను ఖర్చుచేస్తుంది బీజేపీ. కానీ చిన్నారుల మందులకు మాత్రం డబ్బులు లేవా?" అని ప్రశ్నించారు కాంగ్రెస్​ సీనియర్​ నేత రాహుల్​ గాంధీ.

WhatsApp channel

సంబంధిత కథనం