'బండ' బాదుడు.. మళ్లీ పెరిగిన ఎల్​పీజీ సిలిండర్​ ధర

LPG cylinder price | రోజురోజుకు పెరుగుతున్న ధరలతో అల్లాడిపోతున్న సామాన్యుడిపై మరో పిడుగు పడింది. వంటింట్లో ఉపయోగించే ఎల్​పీజీ సిలిండర్​ ధర.. రూ. 50 పెరిగింది. ఈ ధర శనివారం నుంచే అమల్లోకి వచ్చాయి.

తాజా ప్రకటనతో.. 14.2 కేజీల ఎల్​పీజీ సిలిండర్​ ధర.. ఢిల్లీలో రూ. 999.50కు చేరింది. కాగా.. హైదరాబాద్​లో సిలిండర్​ ధర రూ. 1052గా ఉంది.

కాగా.. సిలిండర్​ ధరలు పెరగడం.. ఈ నెలలో ఇప్పటికే ఇది రెండోసారి. మే 1న.. ఎల్​పీజీ సిలిండర్​ మీద రూ. 102 పెరిగింది. ఐఓసీ ప్రకారం, మే 1న ఢిల్లీలో 19 కిలోల LPG సిలిండర్ ధర రూ. 2355.50గా ఉంది. ఏప్రిల్ 30 వరకు ఈ ధర రూ.2253 వరకు ఉండేది. ఇక కోల్‌కతాలో రూ.2455, ముంబైలో రూ.2307 ఉండగా.. చెన్నైలో వాణిజ్య సిలిండర్ల ధర రూ.2508కి పెరిగింది.

మార్చి 1న 19 కిలోల కమర్షియల్ సిలిండర్ ధర రూ.105 పెంచగా, మార్చి 22న రూ.9 తగ్గింది. అదే సమయంలో, అక్టోబర్ 2021 నుండి ఫిబ్రవరి 1, 2022 మధ్య వాణిజ్య సిలిండర్ ధర రూ.170 పెరిగింది. అక్టోబర్ 1న ఢిల్లీలో వాణిజ్య సిలిండర్ ధర రూ.1736 ఉండగా నవంబర్ 2021లో 2000కు పెరిగింది. ఇక డిసెంబర్ 2021లో రూ. 2101కు పెరిగింది. దీని తర్వాత ఫిబ్రవరి 2022 మళ్లీ తగ్గి రూ.1907కి దిగి వచ్చింది. దీని తర్వాత, ఏప్రిల్ 1, 2022 నాటికి అది రూ. 2253కి చేరింది.