Instagram reel : రీల్స్​ కోసం నడిరోడ్డు మీద ‘కిడ్నాప్​’ ప్లాన్​- చివరికి సీన్​ రివర్స్..

ఇన్​స్టాగ్రామ్​లో సెన్సెషన్​ సృష్టించేందుకు ఇటీవలి కాలంలో చాలా మంది చాలా వింత, విచిత్ర ప్రయత్నాలు చేస్తున్నారు. ఉత్తర్​ప్రదేశ్​లో కూడా తాజాగా ఇలాంటి ఘటనే ఒకటి చోటుచేసుకుంది. ఇన్​స్టాగ్రామ్​ రీల్స్​ కోసం కొందరు.. నడిరోడ్డు మీద 'కిడ్నాప్'​ ప్లాన్​ చేశారు. చివరికి పోలీసులు వారిని అరెస్ట్​ చేశారు.

ఇదీ జరిగింది..

యూపీ ముజఫర్ నగర్​లోని ఖతౌలీ ప్రాంతానికి సంబంధించిన ఓ వీడియో ఈ వారం వైరల్​గా మారింది. స్ట్రీట్ ఫుడ్ స్టాల్ వద్ద బైక్​పై వచ్చిన ఇద్దరు దుండగులు తమ వాహనాన్ని ఆపారు. చాట్ చేస్తున్న వ్యక్తిని పట్టుకుని వేగంగా అతని ముఖాన్ని గుడ్డతో కప్పేశారు. ఆ వ్యక్తి స్పృహ కోల్పోయినట్టు నటించారు. చివరికి, అతడిని బైక్​ మీద ఎక్కించుకుని తీసుకెళ్లేందుకు రెడీ అయ్యారు.

ఈ ఘటనను అప్పటివరకు నిలబడి చూస్తున్న కొందరు స్థానికులు, బైక్​ని అడ్డుకున్నారు. కిడ్నాపర్లలో ఒకరు బైక్​ను నడపడానికి ప్రయత్నిస్తుండగా ఓ స్థానికుడు వారితో వాగ్వాదానికి దిగడం కూడా క్లిప్ లో కనిపించింది.

అప్పుడే అసలు విషయం బయటపడింది! ఇదంతా ఇన్​స్టాగ్రామ్​ రీల్​ కోసం చేసినట్టు కిడ్నాపర్లుగా నటించిన వారు స్థానికులకు చెప్పారు. ఆ వెంటనే సమీపంలోని కెమెరాను చూపించారు. అది నిజం కిడ్నాప్​ కాదని తెలుసుకున్న స్థానికులు ఊపిరి పీల్చుకున్నారు. చివరికి నవ్వుతూ వెళ్లిపోయారు.

సోషల్​ మీడియాలో వైరల్​గా మారిన వీడియోని ఇక్కడ చూసేయండి..

ఈ ఘటనకు సంబంధించిన క్లిప్​ను బ్యాక్ గ్రౌండ్ లో మీర్జాపూర్ టీవీ షో థీమ్ సాంగ్​తో సోషల్ మీడియాలో అప్​లోడ్ చేశారు. అయితే ఈ ఘటనపై చాలా మంది నెటిజన్లు ఆగ్రహం వ్యక్తం చేస్తున్నారు. రీల్​ కోసం ఇలాంటివి చేయడమేంటని ప్రశ్నిస్తున్నారు. ఇలాంటి రీల్​ చేసిన వారిపై కఠిన చర్యలు తీసుకోవాలని డిమాండ్లు వెల్లువెత్తుతున్నాయి.

“వీళ్లని తీసుకెళ్లి జైలులో పెట్టాలి. శిక్ష వేయాలి,” అని చాలా మంది కామంట్లు పెడుతున్నారు.

ఈ వ్యవహారం పోలీసుల వరకు వెళ్లింది. కిడ్నాప్​ రీల్​ చేసిన మొత్తం నలుగురిని అరెస్టు చేసినట్లు అధికారులు చెప్పారు.

“ఖతౌలీ పట్టణంలోని ఓ బహిరంగ ప్రదేశంలో ముగ్గురు బాలురు ఫేక్​ కిడ్నాప్​ను చిత్రీకరిస్తున్న వీడియో ఒకటి సోషల్ మీడియాలో వైరల్​గా మారింది. ఈ వీడియో స్థానికులను భయాందోళనలకు గురి చేసింది. ఇప్పుడు ఈ వీడియోలో పాల్గొన్న వారిని అరెస్ట్ చేశాము,” అని​ పోలీసులు తెలిపారు.

ఇన్​స్టాగ్రామ్​ పిచ్చిలో యువత..!

ఇన్​స్టాగ్రామ్​ రీల్స్​ పేరుతో ఇటీవలి కాలంలో ఇలాంటి ఘటనలు పెరిగిపోతున్నాయి. మరీ ముఖ్యంగా యువత ఇన్​స్టాగ్రామ్​ లైక్స్​, ఫాలోవర్స్​ కోసం ఎంతకైనా తెగిస్తున్నారు. పూణెకి చెందిన కొందరు.. ఓ యువతి, ఓ అబ్బాయి చేయి సాయంతో కొండపై నుంచి గాలిలో వేలాడిన ఘటన సర్వత్రా చర్చకు దారితీసింది. ఇలాంటి ఘటనలు నిత్యం ఎక్కడో అక్కడ జరుగుతూనే ఉంటున్నాయి.

మరి వీటిపై మీ ఒపీనియన్​ ఏంటి?