Shraddha Walkar Murder case : శ్రద్ధ హత్య కేసులో 3వేల పేజీల ఛార్జ్​షీట్!

Shraddha Walkar Murder case police chargesheet : శ్రద్ధ వాల్కర్​ హత్య కేసులో నిందితుడు అఫ్తాబ్​ పూనావాలాపై ఢిల్లీ పోలీసులు 3వేల పేజీలతో కూడిన డ్రాఫ్ట్​ ఛార్జ్​షీట్​ను రూపొందించినట్టు తెలుస్తోంది. 100మంది సాక్షుల స్టేట్​మెంట్స్​, ఎలక్ట్రానిక్​, ఫోరెన్సీక్​ ఆధారాల వివరాలను ఈ డ్రాఫ్ట్​ ఛార్జ్​షీట్​లో పోలీసులు పేర్కొన్నట్టు సమాచారం.

శ్రద్ధను హత్య చేసి.. ముక్కలు ముక్కలుగా నరికి!

26ఏళ్ల శ్రద్ధా వాల్కర్​ను 28ఏళ్ల అఫ్తాబ్​ పూనావాలా.. గతేడాది మేలో ఢిల్లీలో ఓ ఫ్లాట్​లో అత్యంత దారుణంగా హత్య చేశాడు. వీరిద్దరు కొన్నేళ్లుగా సహజీవనం చేస్తున్నారు. కాగా.. వీరి మధ్య తరచూ గొడవలు అవుతూ ఉండేవి! పెళ్లి చేసుకోవాలని శ్రద్ధ ఒత్తిడి చేయడంతో ఆమెను చంపేశాడు అఫ్తాబ్​.

Shraddha Walkar Murder case : ఈ నేరం బయటకు రాకుండా.. ఆమె శరీరాన్ని 35 ముక్కలుగా నరికి.. తన ఫ్లాట్​లోని ఫ్రిడ్జ్​లో పెట్టాడు. వీలు దొరికినప్పుడల్లా.. వాటిని ఒక్కొక్కటిగా బయటకు తీసుకెళ్లి.. ఢిల్లీలోని వివిధ ప్రాంతాల్లో పడేశాడు. చేసిన తప్పుకు భయపడని అతను.. మరో గర్ల్​ఫ్రెండ్​తో అదే ఫ్లాట్​లో సమయం గడిపేవాడు. అప్పటికీ శ్రద్ధ శరీరం ఫ్రిడ్జ్​లోనే ఉంది!

Shraddha Walkar news : స్నేహితుల ఫోన్​ కాల్స్​కు శ్రద్ధ స్పందించకపోవడంతో అసలు విషయం బయటపడింది. శ్రద్ధతో మాట్లాడి చాలా రోజులైందని.. ఆమె తండ్రికి కొందరు స్నేహితులు వివరించారు. అఫ్తాబ్​తో రిలేషన్​లో ఉండటం ఇష్టం లేకపోవడంతో.. శ్రద్ధతో కొన్నేళ్ల క్రితమే తెగదెంపులు చేసుకున్న ఆమె తండ్రి.. గతేడాది నవంబర్​లో ఢిల్లీకి వెళ్లాడు. శ్రద్ధ ఫ్లాట్​కు వెళ్లేసరికి.. అది లాక్​ చేసి ఉండటాన్ని గుర్తించాడు. అనుమానంతో పక్కనే ఉన్న పోలీస్​ స్టేషన్​లో ఫిర్యాదు చేశాడు. చివరికి.. అఫ్తాబ్​ నేరం బయటపడింది. పోలీసులు అతడిని పట్టుకుని అరెస్ట్​ చేశారు. ఈ ఘటన దేశవ్యాప్తంగా కలకలం సృష్టించింది. నిందితుడిని కఠినంగా శిక్షించాలని డిమాండ్​లు వెల్లువెత్తాయి.

ఆవేశంలో ముందువెనక ఆలోచించుకోకుండా.. శ్రద్ధను హత్య చేసినట్ట అఫ్తాబ్​ పూనావాలా.. పోలీసుల ముందు అంగీకరించాడు!

డ్రాఫ్ట్​ ఛార్జ్​షీట్​లో ఏముందంటే..!

Police Chargesheet on Aaftab Poonawala : ఈ క్రమంలో.. నిందితుడిపై ఛార్జ్​షీట్​ వేసేందుకు ముమ్మర ఏర్పాట్లు చేశారు పోలీసులు. నేరాన్ని అంగీకరిస్తూ అఫ్తాబ్​ ఇచ్చిన స్టేట్​మెంట్​, అతనిపై నిర్వహించిన నార్కో టెస్ట్​ ఫలితాలు, ఫొరెన్సీక్​ రిపోర్టులను సైతం ఈ డ్రాఫ్ట్​ ఛార్జ్​షీట్​లో ఉన్నట్టు తెలుస్తోంది. న్యాయశాఖ నిపుణులు ప్రస్తుతం.. ఈ డ్రాఫ్ట్​ ఛార్జ్​షీట్​ను సమీక్షిస్తున్నట్టు సంబంధిత వర్గాలు వెల్లడించాయి. న్యాయశాఖ నిపుణులు ఆమోదించిన అనంతరం.. నిందితుడిపై ఢిల్లీ పోలీసులు ఛార్జ్​షీట్​ వేసే అవకాశం ఉందని పేర్కొన్నాయి.