వారెన్​ బఫెట్​ను వెనక్కి నెట్టిన అదానీ.. ఆ జాబితాలో 5వ స్థానం..!

Gautam Adani net worth | దిగ్గజ ఇన్​వెస్టర్​ వారెన్​ బఫెట్​ను అధిగమిస్తూ.. ప్రపంచ కుబేరుల జాబితాలో 5వ స్థానాన్ని దక్కించుకున్నారు అదానీ గ్రూప్​ ఛైర్మన్​ గౌతమ్​ అదానీ. ఫోర్బ్స్​ నివేదిక ప్రకారం.. 59ఏళ్ల అదానీ వ్యాపారాల విలువ 123.7బిలియన్​ డాలర్లకు చేరింది(శుక్రవారం మార్కెట్లు ముగిసే సమయానికి). కాగా బఫెట్​ ఆస్తుల విలువ 121.7 బిలియన్​ డాలర్లుగా ఉంది. అంతేకాకుండా.. 123.7బిలియన్​ డాలర్లతో.. భారత దేశంలోనే ధనికుడిగా నిలిచారు అదానీ.

ఒక్క 2022లోనే ఇప్పటివరకు 43బిలియన్​ డాలర్లను తన సంపదలో యాడ్​ చేసుకున్నారు అదానీ. ఆయన పోర్ట్​ఫోలియో 56.2శాతం పెరిగింది. ప్రపంచ కుబేరుల జాబితాలో అదానీ కంటే ముందు బిల్​ గేట్స్​(130.2 బిలియన్​ డాలర్లు), బెర్నాండ్​ ఆర్నాల్ట్​(167.9 బిలియన్​ డాలర్లు), జెఫ్​ బెజేజో(170.2 బిలియన్​ డాలర్లు), ఎలాన్​ మస్క్​(269.7 బిలియన్​ డాలర్లు) ఉన్నారు.

అదానీ సంస్థకు ఎయిర్​పోర్టు నుంచి ఓడరేవుల వరకు అనేక వ్యాపారాలు ఉన్నాయి. ముఖ్యంగా విద్యుత్​ పంపిణీలో సంస్థ ప్రధాన పాత్ర పోషిస్తోంది. ఆదానీకి చెందిన ఆరు సంస్థలు.. ఇండియా స్టాక్​ మార్కెట్​లో లిస్ట్​ అయ్యి ఉన్నాయి.

భారత ఆర్థిక వ్యవస్థపై అదానీ ఇటీవలే కీలక వ్యాఖ్యలు చేశారు. 2050 నాటికి దేశం 30ట్రిలియన్​ డాలర్ల ఎకానమీగా అవతరిస్తుందని అంచనా వేశారు. ఇదే జరిగితే.. ఆకలితో ఒక్కరు కూడా అలమటించరని పేర్కొన్నారు. పేదరికం నిర్మూలన సాధ్యమవుతుందని అభిప్రాయపడ్డారు.