MLA's with criminal cases : తెలంగాణలో 61శాతం మంది ఎమ్మెల్యేలపై క్రిమినల్​ కేసులు!

MLA's with criminal cases in India : దేశంలో ఎంత మంది ఎమ్మెల్యేలపై క్రిమినల్​ కేసులు ఉన్నాయి? అన్న అంశంపై ఏడీఆర్​ (అసోసియేషన్​ ఫర్​ డెమొక్రటిక్​ రిఫార్మ్స్​) విశ్లేషణ జరిపింది. మొత్తం మీద 44శాతం మంది ఎమ్మెల్యేలపై కేసులు ఉన్నట్టు తేలింది!

నేషనల్​ ఎలక్షన్​ వాచ్​ (ఎన్​ఈడబ్ల్యూ)తో కలిసి ఈ విశ్లేషణ జరిపింది ఏడీఆర్​. వివిధ రాష్ట్రాలు, కేంద్ర పాలిత ప్రాంతాల్లో ఇటీవలి కాలంలో జరిగిన ఎన్నికల సమయంలో ఎమ్మెల్యేలు సమర్పించిన అఫిడవిట్​లను పరిశీలించి, ఈ రిపోర్టును తయారు చేశారు.

28 రాష్ట్ర అసెంబ్లీలు, 2 కేంద్ర పాలిత ప్రాంతాల అసెంబ్లీల్లోని 4,001 ఎమ్మెల్యేల అఫిడవిట్​లను ఏడీఆర్​ పరిశీలించింది. వీరిలో 1,136 మంది.. అంటే 28శాతం మందిపై తీవ్రమైన క్రిమినల్​ కేసులు ఉన్నట్టు తేలింది. మర్డర్​, హత్యాయత్నం, కిడ్నాప్​, మహిళలపై నేరాలు వంటి కేసులు సంబంధిత ఎమ్మెల్యేలపై ఉన్నాయి.

రాష్ట్రాలవారిగా పరిస్థితి ఇలా..

కేరళలోని 135ఎమ్మెల్యేల్లో 95మందిపై కేసులు ఉన్నాయి. ఇది 70శాతం! బిహార్​లోని 242 ఎమ్మెల్యేల్లోని 161మందిపై (67శాతం), దిల్లీలోని 70మంది ఎమ్మెల్యేల్లో 44మందిపై (63శాతం), మహారాష్ట్రలోని 284మంది ఎమ్మెల్యేల్లో 175మందిపై (62శాతం), తెలంగాణలోని 118మంది ఎమ్మెల్యేల్లోని 72మందిపై (61శాతం), తమిళనాడులోని 224 ఎమ్మెల్యేల్లోని 134మందిపై (60శాతం) కేసులు నమోదయ్యాయి. ఈ వివరాలను ఎమ్మెల్యేలే స్వయంగా వారి అఫిడవిట్​లలో పేర్కొన్నారు.

Telangana MLA's with criminal cases : ఇక అత్యంత తీవ్రమైన క్రిమినల్​ కేసుల విషయంలో దిల్లీ టాప్​లో ఉంది! దిల్లీలోని 53శాతం మంది ఎమ్మెల్యేలపై ఈ తరహా కేసులు ఉన్నాయి. బిహార్​ (50శాతం), మహారాష్ట్ర (40శాతం), ఝార్ఖండ్​ (39శాతం), తెలంగాణ (39శాతం), ఉత్తర్​ ప్రదేశ్​ (38శాతం) మంది ఎమ్మేల్యేలు అత్యంత తీవ్రమైన ఆరోపణలు ఎదుర్కొంటున్నారు.

ఏడీఆర్​ విశ్లేషణలో.. మహిళలపై నేరాలకు సంబంధించి ఆందోళనకరమైన విషయం బయపడింది. 114మంది ఎమ్మెల్యేలపై ఈ తరహా కేసులు ఉండగా.. వీరిలో 14మందిపై రేప్​ కేసులు నమోదయ్యాయి!