Bigg Boss Sandeep: “స్ట్రాంగ్‍గా బయటికి వచ్చావ్”: సందీప్‍కు గోరుముద్దలు తినిపించిన భార్య: వీడియో

Bigg Boss 7 Telugu - Sandeep: బిగ్‍బాస్ తెలుగు 7వ సీజన్‍ 8వ వారంలో కొరియోగ్రాఫర్ సందీప్ మాస్టర్ ఎలిమినేట్ అయ్యారు. నామినేషన్లలోకి వచ్చిన తొలిసారే ఆయన హౌస్ నుంచి బయటికి వచ్చేశారు. గేమ్ బాగా ఆడుతున్నట్టు కనిపించినా.. ఓటింగ్‍లో వెనుకబడిన సందీప్ ఎలిమినేట్ అయ్యారు. హౌస్ నుంచి బయటికి వచ్చేశారు. కాగా, సందీప్ భార్య జ్యోతిరాజ్ నేడు ఓ ఇన్‍స్టాగ్రామ్ పోస్ట్ చేశారు. సందీప్‍ను ప్రశంసిస్తూ క్యాప్షన్ రాసుకొచ్చారు.

బిగ్‍బాస్ నుంచి ఇంటికి తిరిగి వచ్చిన సందీప్‍కు జ్యోతి రాజ్ అన్నం తినిపించారు. కబుర్లు చెప్పుకుంటూ అతడికి గోరు ముద్దలు తినిపించారు. ఈ వీడియోను ఇన్‍స్టాగ్రామ్‍లో జ్యోతి పోస్ట్ చేశారు. “స్ట్రాంగ్‍గా వెళ్లావ్. గట్టిగా పోటీ ఇచ్చావ్. అన్ని విధాలుగా ప్రూవ్ చేసుకున్నావ్. స్ట్రాంగ్‍గా బయటికి వచ్చావ్. కానీ ఇది ఎండ్ కాదు” అని జ్యోతిరాజ్ క్యాప్షన్ రాశారు. తన భర్తను ప్రోత్సహించారు.

సందీప్ హౌస్‍లో ఉన్న సమయంలోనూ అతడికి మద్దతుగా సోషల్ మీడియాలో కొన్ని వీడియోలు పోస్ట్ చేశారు జ్యోతి. సందీప్ గెలుస్తారని నమ్మకం వ్యక్తం చేశారు. మొత్తంగా 8 వారాల పాటు బిగ్‍బాస్ హౌస్‍లో సందీప్ ఉన్నారు. ఓ దశలో ఇంటి నుంచి లెటర్ వచ్చిన సమయంలో అతడు హౌస్‍లో ఎమోషనల్ అయ్యారు. జ్యోతి రాసిన లెటర్ చదువుతూ కన్నీరు పెట్టుకున్నారు.

ఇక బిగ్‍బాస్‍లో ఒక్కో వారానికి సుమారు రూ.2.5లక్షల రెమ్యూనరేషన్‍ను సందీప్ అందుకున్నారట. దీంతో మొత్తంగా రూ.20లక్షల వరకు బిగ్‍బాస్ ద్వారా ఆయన దక్కించుకున్నారని తెలుస్తోంది.

బిగ్‍బాస్ తెలుగు 7వ సీజన్‍లో తొలి ఐదు వారాలు ఇమ్యునిటీ కారణంగా సందీప్ మాస్టర్ నామినేషన్లలోకి రాలేదు. ఆ తర్వాత ఆరో వారం నామినేట్ అయినా గౌతమ్ కృష్ణ తన పవర్‌తో రక్షించారు. అయితే, 8వ వారం సందీప్ నామినేట్ అయ్యారు. ఇక నామినేట్ అయిన తొలిసారే సందీప్ ఎలిమినేట్ అయ్యారు. డేంజర్ జోన్‍లో సందీప్, శోభా శెట్టి మధ్య ఎలిమినేషన్ ప్రక్రియ జరిగింది. సందీప్ ఎలిమినేట్ అయ్యారు. బిగ్‍బాస్ 7వ సీజన్‍లో ఎలిమినేట్ అయిన తొలి పురుష కంటెస్టెంట్‍గా సందీప్ నిలిచారు. గత 7 వారాలు మహిళా కంటెస్టెంట్‍లే బయటికి వెళ్లారు.