Tollywood Heroines | వెబ్‌సిరీస్‌ల వైపు చూస్తున్న టాలీవుడ్‌ టాప్‌ హీరోయిన్లు

Tollywood Heroines.. ఓవర్‌ ద టాప్‌ (ఓటీటీ) ప్లాట్‌ఫామ్స్‌ వచ్చిన తర్వాత ఇండియన్‌ ఫ్యాన్స్‌కు వెబ్‌సిరీస్‌ అనే కొత్త కాన్సెప్ట్‌ పరిచయమైంది. ఇవి క్రమంగా సినిమాల కంటే ఎక్కువ హిట్‌ టాక్‌ కొట్టేస్తుండటంతో క్రమంగా టాప్‌ హీరోయిన్ల కన్ను వీటిపై పడింది. ముఖ్యంగా సినిమా అవకాశాలు తగ్గిపోయిన టాలీవుడ్‌ వెటరన్‌ హీరోయిన్లు వరుసగా వెబ్‌సిరీస్‌లకు సై అంటున్నారు. 

సమంత, కాజల్‌, త్రిష, రాశీ ఖన్నా, రెజీనా, తమన్నా వంటి టాప్‌ హీరోయిన్లు ఈ వెబ్‌ సిరీస్‌లలో తమ కొత్త కెరీర్‌ను వెతుక్కుంటున్నారు. చాన్నాళ్లపాటు ఇంగ్లిష్‌, హిందీ భాషలకే పరిమితమైన ఈ వెబ్‌సిరీస్‌లు ఈ మధ్య తెలుగులోనూ బాగానే తెరకెక్కుతున్నాయి. ఈ నేపథ్యంలో స్టార్‌ హీరోయిన్లు నటించిన, నటిస్తున్న ఆ వెబ్‌సిరీస్‌లేంటో ఒకసారి చూద్దాం.

సమంత

మన తెలుగు దర్శకులు రాజ్‌ & డీకే డైరెక్షన్‌లో వచ్చిన ఫ్యామిలీ మ్యాన్‌ 2 అనే వెబ్ సిరీస్‌లో తొలిసారి నటించింది సమంత. ఈ సిరీస్‌లో ఆమె నటనకు ఫిదా కాని వాళ్లు లేరంటే అతిశయోక్తి కాదు. శ్రీలంక తమిళ రెబల్‌గా కనిపించిన సమంత.. ఆ పాత్రలో జీవించేసింది. ఈ సక్సెస్‌తో ఆమె మరిన్ని వెబ్‌సిరీస్‌లలో నటించడానికి సిద్ధమవుతోంది. టాప్‌ ఓటీటీ నెట్‌ఫ్లిక్స్‌ మూడు భాషల్లో తెరకెక్కించబోతున్న ఓ వెబ్‌సిరీస్‌ కోసం ఇప్పటికే సమంతతో ఒప్పందం కుదుర్చుకుంది. దీనికోసం సామ్‌కు భారీ ఆఫరే చేసినట్లు సమాచారం. అంతేకాదు ఆమె నేరుగా ఓ తెలుగు వెబ్‌సిరీస్‌లో నటిస్తున్నట్లు వార్తలు వస్తున్నాయి.

కాజల్‌

టాలీవుడ్‌ వెటరన్‌ హీరోయిన్లలో కాజల్‌ కూడా ఒకరు. ప్రస్తుతం ఆమెకు సినిమా ఛాన్సెస్‌ తగ్గిపోయాయి. ఇప్పటికే ఆమె డిస్నీ+హాట్‌స్టార్‌లో వచ్చిన లైవ్‌ టెలికాస్ట్‌ అనే హారర్‌ సిరీస్‌లో నటించింది.

త్రిష

ఒకప్పుడు తెలుగు సినిమాను ఏలిన త్రిష తొలిసారి ఓ వెబ్‌సిరీస్‌లో నటించడానికి సిద్ధమవుతోంది. సోనీ లివ్‌ ఓటీటీ తెరకెక్కిస్తున్న బృందా అనే క్రైమ్‌ థ్రిల్లర్‌ వెబ్‌సిరీస్‌ కోసం త్రిష సైన్‌ చేసింది. తెలుగుతోపాటు పలు ఇతర భాషల్లోనూ ఈ సిరీస్‌ రూపొందుతోంది.

తమన్నా

ఈ వెబ్‌సిరీస్‌లలో అందరి కన్నా ముందు ఉన్నది మిల్కీ బ్యూటీ తమన్నానే. ఆమె ఇప్పటికే 11th Hour అనే తెలుగు వెబ్‌సిరీస్‌తోపాటు నవంబర్‌ స్టోరీ అనే మల్టీలింగ్వల్‌ సిరీస్‌లోనూ నటించి మెప్పించింది. ఇక ఇప్పుడు యారీ దోస్తీ అనే హిందీ వెబ్‌సిరీస్‌లోనూ ఆమె నటిస్తోంది. ప్రస్తుతం షూటింగ్‌లో ఉన్న ఈ సిరీస్‌ వచ్చే ఏడాది ప్రేక్షకుల ముందుకు రానుంది.

రాశీ ఖన్నా

ఏడేళ్ల కిందట ఊహలు గుసగుసలాడే మూవీతో టాలీవుడ్‌లోకి ఎంట్రీ ఇచ్చిన రాశీ ఖన్నా కూడా ప్రస్తుతం వెబ్‌సిరీస్‌ షూటింగ్స్‌లో బిజీగా ఉంది. ప్రముఖ దర్శకులు రాజ్‌ & డీకే డైరెక్షన్‌లో తెరకెక్కుతున్న ఓ సిరీస్‌తోపాటు రుద్ర అనే మరో వెబ్‌సిరీస్‌లోనూ నటిస్తోంది.

రెజీనా

టాలీవుడ్‌లో తనకంటూ ప్రత్యేక స్థానం సంపాదించుకున్న నటి రెజీనా. ఆమె కూడా ప్రస్తుతం రెండు వెబ్‌సిరీస్‌లలో బిజీగా ఉంది. ఆహా ఓటీటీలో రాబోతున్న అన్యాస్‌ ట్యుటోరియల్‌లో లీడ్‌ రోల్‌లో రెజీనా కనిపించనుంది. ఇదొక హారర్‌ డ్రామా. ఇక బాలీవుడ్‌ నటుడు షాహిద్‌ కపూర్‌ తొలిసారి కనిపిస్తున్న, రాజ్‌ & డీకే తెరకెక్కిస్తున్న వెబ్‌సిరీస్‌లోనూ రెజీనా నటిస్తోంది.