OTT Thriller Movies: ఒకే రోజు ఒకే ఓటీటీలోకి తెలుగులో వచ్చిన రెండు హారర్, థ్రిల్లర్ మూవీస్

OTT Thriller Movies: ఓటీటీలోకి కొత్తగా ఓ థ్రిల్లర్, మరో హారర్ థ్రిల్లర్ మూవీ తెలుగులో వచ్చాయి. ఈ రెండు అమెరికన్ మూవీస్ కూడా ఒకే ఓటీటీలో అడుగుపెట్టాయి. ఇందులో ఒకటి థ్రిల్లర్ మూవీ సెల్లార్ డోర్ కాగా.. మరొకటి సర్వైవల్ హారర్ థ్రిల్లర్ మూవీ నెవర్ లెట్ గో. ఈ రెండు సినిమాలు తెలుగుతోపాటు పలు ఇతర భారతీయ భాషల్లో అందుబాటులోకి వచ్చాయి.

సెల్లార్ డోర్ ఓటీటీ స్ట్రీమింగ్

సెల్లార్ డోర్ ఓ అమెరికన్ థ్రిల్లర్ మూవీ. గత నెల 1న థియేటర్లలో రిలీజైంది. నెల రోజుల్లోనే ఓటీటీలోకి అడుగుపెట్టింది. ఈ సినిమాను ప్రైమ్ వీడియోలో తెలుగుతోపాటు హిందీ, తమిళం, మరాఠీ భాషల్లోనూ చూడొచ్చు. అయితే ప్రస్తుతానికి రెంట్ విధానంలోనే ఈ సినిమా వచ్చింది. రూ.149 చెల్లించి హెచ్‌డీ క్వాలిటీలో ఈ థ్రిల్లర్ మూవీ చూడొచ్చు.

వాన్ స్టీన్ డైరెక్ట్ చేసిన ఈ మూవీలో జోర్డానా బ్రూస్టర్, స్కాట్ స్పీడ్‌మ్యాన్, లారెన్స్ ఫిష్‌బర్న్ లాంటి వాళ్లు నటించారు. ఓ ధనికుడు ఓ జంటకు తన అందమైన ఎస్టేట్ ను గిఫ్ట్ గా ఇస్తాడు. అక్కడికి వెళ్లి తమ జీవితాన్ని కొత్తగా మొదలుపెట్టాలనుకున్న ఆ జంటకు ఊహించని పరిణామాలు ఎదురవుతాయి. అందులోని సెల్లార్ డోర్ ను మాత్రం తెరవకూడని పరిస్థితి నెలకొంటుంది. అందులో ఏముంది? ఆ ఎస్టేట్ కు వెళ్లిన ఆ జంటకు ఎలాంటి పరిస్థితులు ఎదురవుతాయన్నది ఈ సినిమాలో చూడొచ్చు.

నెవర్ లెట్ గో ఓటీటీ స్ట్రీమింగ్

ఇక ప్రైమ్ వీడియోలోకే తెలుగులో అందుబాటులో వచ్చిన మరో అమెరికన్ సర్వైవల్ హారర్ థ్రిల్లర్ మూవీ నెవర్ లెట్ గో. ఈ సినిమాను కూడా ప్రైమ్ వీడియోలో రెంట్ చెల్లించి చూడొచ్చు. అలెగ్జాండ్రా అజా డైరెక్ట్ చేసిన ఈ సినిమాలో హాలె బెర్రీ, పెర్సీ డాగ్స్, ఆంథోనీ జెన్కిన్స్, విల్ కార్లెట్ లాంటి వాళ్లు నటించారు. ఓ తల్లి తన ఇద్దరు పిల్లలతో కలిసి ఓ అడవిలో జీవిస్తుంటుంది.

ది ఈవిల్ అనే ఓ అతీత శక్తి ప్రపంచాన్నంతటినీ మింగేసిందని, తాము మాత్రం మిగిలి ఉన్నామంటూ తన పిల్లలకు ఆ తల్లి చెబుతుంది. అయితే పిల్లల్లో ఒకరికి అసలు దెయ్యం నిజమేనా అన్న సందేహం కలుగుతుంది. అది చివరికి ఆ కుటుంబాన్ని ఎలాంటి ప్రమాదంలోకి నెట్టేసిందన్నది ఈ నెవర్ లెట్ గో మూవీలో చూడొచ్చు. ఈ ఏడాది సెప్టెంబర్ 20న థియేటర్లలో ఈ మూవీ రిలీజైంది.