NTR | ఎన్టీఆర్-అనిల్ రావిపూడి కాంబినేషన్‌లో చిత్రం.. దిల్ రాజు నిర్మాత?

టాలీవుడ్ యంగ్ టైగర్ ఎన్టీఆర్ ప్రస్తుతం ఆర్ఆర్ఆర్ సక్సెస్‌ను ఎంజాయ్ చేస్తున్నారు. పాన్ఇండియా సినిమాగా విడుదలైన ఆర్ఆర్ఆర్ వసూళ్ల వర్షాన్ని కురిపిస్తోంది. ఇప్పటికే రూ.900 కోట్ల పైచిలుకు కలెక్షన్లతో దూసుకెళ్తోంది. ఈ చిత్రం విజయంతో తారక్‌కు బాలీవుడ్‌ నుంచి కూడా ఆఫర్లు వెల్లువెత్తుతున్నాయి. ఇదిలా ఉంటే తారక్ తన తర్వాతి చిత్రాన్ని కొరటాల శివతో చేస్తున్న విషయం తెలిసిందే. త్వరలోనే ఈ చిత్రం పట్టాలెక్కనుంది. ఇది కాకుండా ఉప్పెన ఫేం బుచ్చిబాబుతో కూడా ఓ సినిమాకు ఓకే చెప్పారు. తాజాగా ఈ రెండు ప్రాజెక్టుల తర్వాత మరో చిత్రం చేయడానికి సిద్ధమయ్యారట.

వినోద చిత్రాల దర్శకుడు అనిల్ రావిపూడితో సినిమా చేయడానికి తారక్ రెడీ అవుతున్నట్లు చిత్ర వర్గాల సమాచారం. ఈ సినిమాకు దిల్ రాజు నిర్మాతగా వ్యవహరించనున్నారట. దిల్ రాజు-తారక్ కాంబినేషన్‌లో సినిమా వచ్చి 9 ఏళ్లవుతుంది. చివరగా 2013లో వచ్చిన రామయ్య వస్తావయ్య సినిమా కోసం ఇరువురు కలిసి పనిచేశారు. అప్పటి నుంచి వీరి కాంబోలో ఇంకో సినిమా రాలేదు. అయితే మరోసారి తారక్‌తో పనిచేసేందుకు ప్రయత్నాలు చేస్తున్నారని ఫిల్మ్ వర్గాల టాక్. ఆ సినిమాకు అనిల్ రావిపూడి దర్శకత్వం వహించనున్నారని తెలుస్తోంది. ఈ కాంబినేషన్ గురించి అధికారిక సమాచారం రావాల్సి ఉంది. అన్ని కుదిరితో వీరి కాంబినేషన్‌లో సినిమా 2023లో పట్టాలెక్కే అవకాశముంది.

ఎన్టీఆర్ మాదిరిగానే దిల్ రాజు.. రామ్ చరణ్‌తో సినిమా చేసి కూడా 9 ఏళ్ల అవుతుంది. చివరగా ఎవడు సినిమాకోసం ఇద్దరూ కలిసి పనిచేశారు. అయితే ఇటీవల శంకర్ దర్శకత్వంలో రామ్ చరణ్ చేస్తున్న సినిమాతో వీరి కాంబినేషన్‌ మరోసారి పునరావృతం కాబోతుంది. అదే విధంగా అల్లు అర్జున్‌తోనూ ఈ బడా నిర్మాత చివరగా దువ్వాడ జగన్నాథం-డీజే చేశారు. ఆ తర్వాత పనిచేయలేదు. కాబట్టి స్టైలిష్ స్టార్‌తోనూ ఓ చిత్రాన్ని తెరకెక్కించాలని యోచిస్తున్నారట.

ఆర్ఆర్ఆర్ సక్సెస్‌లో బిజీగా ఉన్న తారక్.. కొరటాల శివతో ఓ చిత్రం ఆ తర్వాత బుచ్చిబాబుతో సినిమా చేసేందుకు సిద్ధమవుతున్నారు. ఈ రెండు కాకుండా కేజీఎఫ్ ఫేమ్ ప్రశాంత్ నీల్ దర్శకత్వంలోనూ ఓ సినిమా చేయనున్నారని ఇప్పటికే వార్తలు వచ్చాయి. మరి ఈ సినిమా చేస్తారో లేక దిల్ రాజుతో మూవీకి సై అంటారో తెలియాలంటే మరికొన్ని వేచి ఉండాల్సిందే.