Jai Bhim | జైభీమ్‌కు అరుదైన ఘనత.. మరో రెండు అంతర్జాతీయ పురస్కారాలు

హీరో సూర్య నటించిన జై భీమ్ చిత్రం గతేడాది ప్రముఖ ఓటీటీ సంస్థ అమెజాన్ ప్రైమ్ వీడియోలో విడుదలైన సంగతి తెలిసిందే. డైరెక్టుగా ఓటీటీలో రిలీజైన ఈ సినిమా విపరీతంగా ప్రేక్షక ఆదరణ పొందింది. లిజోమోల్ జోస్, సూర్య ప్రధాన పాత్రల్లో కనిపించిన ఈ సినిమా భాషతో సంబంధం లేకుండా సూపర్ హిట్ టాక్ తెచ్చుకుంది. అంతేకాకుండా ఆస్కార్ నామినేషన్స్ అర్హత పోటీలకు కూడా ఈ చిత్రాన్ని పంపించారు. ఇటీవల దాదా సాహేబ్ ఫాల్కే ఫిల్మ్ ఫెస్టివల్‌లో రెండు అవార్డులను గెల్చుకుందీ చిత్రం. ఉత్తమ చిత్రంతో పాటు.. ఈ సినిమాలో సహాయ పాత్ర పోషించిన మణికందన్‌కు బెస్ట్ సపోర్టింగ్ యాక్టర్ అవార్డు లభించింది.

తాజాగా జైభీమ్ చిత్రానికి మరో రెండు పురస్కారాలు లభించాయి. గత నెలలో జరిగిన బోస్టన్ ఇంటర్నేషనల్ ఫిల్మ్ ఫెస్టివల్‌లో జైభీమ్ చిత్రాన్ని ప్రదర్శించారు. ఏప్రిల్ 14 నుంచి 20 వరకు ఈ కార్యక్రమం జరిగింది. జైభీమ్‌లో నటించిన లిజోమోల్ జోస్‌కు ఇండీ స్పిరిట్ బెస్ట్ యాక్ట్రెస్ అవార్డు లభించింది. అంతేకాకుండా ఇండీ స్పిరిట్ బెస్ట్ సినిమాటోగ్రాఫర్‌గా ఈ సినిమాకు కెమెరామెన్‌గా పనిచేసిన ఎస్ఆర్ కదీర్‌ను వరించింది.

ఈ విషయాన్ని జైభీమ్ నిర్మాణ సంస్థ 2డీ ఎంటర్టైన్మెంట్ సంస్థ పేర్కొంది. సూర్య, జ్యోతిక కలిసి 2డీ ఎంటర్‌టైన్మెంట్ పతాకంపై జైభీమ్ చిత్రాన్ని నిర్మించారు. తెలుగు, తమిళం, కన్నడ, మలయాళ భాషల్లో విడుదల చేశారు. టీజే జ్ఞాన్‌వెల్ ఈ చిత్రానికి దర్శకత్వం వహించారు. సూర్య ప్రధాన పాత్ర పోషించిన ఈ సినిమా అన్ని వర్గాల ప్రేక్షకుల ఆదరణ అందుకుంది.