HanuMan 200 Crores in 10 Days: రూ.200 కోట్లను దాటిన హనుమాన్ కలెక్షన్లు: అధికారికంగా ప్రకటించిన టీమ్: వివరాలివే..

HanuMan 10 days Box Office Collections: హనుమాన్ సినిమా సంచలనాలను సృష్టిస్తోంది. ఈ మైథలాజికల్ సూపర్ హీరో మూవీ అంచనాలకు మించి భారీ బ్లాక్‍బాస్టర్ దిశగా పరుగులు పెడుతోంది. ప్రశాంత్ వర్మ దర్శకత్వం వహించిన హనుమాన్ సినిమాలో తేజ సజ్జా హీరోగా నటించారు. జనవరి 12న రిలీజైన ఈ చిత్రానికి అంతటా పాజిటివ్ టాక్ వచ్చింది. దీంతో కలెక్షన్లు పెరుగుతూనే వెళ్లాయి. బడ్జెట్ పరంగా చిన్న సినిమాగా వచ్చిన హనుమాన్.. భారీ కలెక్షన్లను దక్కించుకుంటోంది.

హనుమాన్ సినిమా 10 రోజుల్లోనే ప్రపంచవ్యాప్తంగా రూ.200 కోట్ల గ్రాస్ కలెక్షన్ల మార్క్ దాటేసింది. రెండో వారంలోనూ ఈ చిత్రానికి వసూళ్ల జోరు కొనసాగింది. తొలి వారానికి దీటుగా రెండో వారంలోనూ కలెక్షన్లు వస్తున్నాయి. హనుమాన్ రూ.200 కోట్లు దాటిందని ఈ చిత్రాన్ని నిర్మించిన ప్రైమ్ షో ఎంటర్‌టైన్‍మెంట్ నేడు (జనవరి 22) ట్వీట్ చేసింది.

“జై శ్రీరామ్. శ్రీరాముడి ఆశీర్వాదాలతో బాక్సాఫీస్ వద్ద హనుమాన్ గర్జన కొనసాగుతోంది. కేవలం 10 రోజుల్లోనే ప్రపంచవ్యాప్తంగా హనుమాన్‍కు రూ.200 కోట్ల కలెక్షన్లు వచ్చాయి” అని ప్రైమ్ షో ఎంటర్‌టైన్‍మెంట్ పోస్ట్ చేసింది. జై శ్రీరామ్ అంటూ రూ.200 కోట్ల పోస్టర్ రిలీజ్ చేసింది. ప్రపంచవ్యాప్తంగా 10వ రోజు ఈ చిత్రానికి రూ.23.91 కోట్ల వచ్చాయని తెలుస్తోంది. తొలి రోజు కంటే ఇవి ఎక్కువ వసూళ్లు.

హనుమాన్ చిత్రానికి తెలుగు రాష్ట్రాల్లో సుమారు రూ.100 కోట్లకు పైగా ఇప్పటి వరకు గ్రాస్ కలెక్షన్లు వచ్చాయి. అలాగే.. హిందీలో రూ.42 కోట్ల వసూళ్లు దాటాయి. విదేశాల్లోనూ హనుమాన్ సినిమా సంచలన వసూళ్లు సాధిస్తోంది. ఓవర్సీస్‍లో రూ.45కోట్ల మార్కును దాటేసింది. కర్ణాటక, తమిళనాడు సహా అన్ని చోట్ల హనుమాన్ మంచి వసూళ్లను దక్కించుకుంటోంది. అమెరికాలో అత్యధిక వసూళ్లు సాధించిన టాలీవుడ్ సినిమా జాబితాలో టాప్-5కు హనుమాన్ ఇప్పటికే చేరుకుంది. హనుమాన్ సినిమాలో భాగమైన నిర్మాతలు, డిస్ట్రిబ్యూటర్లకు ఇప్పటికే మూడు రెట్ల కంటే లాభాలు వచ్చేశాయని తెలుస్తోంది.

గుంటూరు కారంను దాటేసిందా?

హనుమాన్ సినిమా ప్రపంచవ్యాప్త గ్రాస్ కలెక్షన్లలో గుంటూరు కారం చిత్రాన్ని దాటేసిందని ప్రముఖ ట్రేడ్ ఎనలిస్ట్ మనోబాల విజయబాలన్ ట్వీట్ చేశారు. హనుమాన్ మూవీ 10 రోజుల్లో రూ.రూ.209.06 కోట్లను దక్కించుకుందని పోస్ట్ చేశారు. 10 రోజుల వరల్డ్ వైడ్ కలెక్షన్లలో గుంటూరు కారం (రూ.194.98) సినిమాను హనుమాన్ దాటేసిందని పేర్కొన్నారు. 2024లో రూ.200 కోట్ల మార్క్ చేరిన తొలి మూవీ హనుమాన్ అని పోస్ట్ చేశారు. అయితే, గుంటూరు కారం టీమ్ ఇప్పటికే తమ సినిమా రూ.200 కోట్ల దాటిందని ఇటీవలే పోస్టర్ రిలీజ్ చేసింది.

సంక్రాంతి సందర్భంగా హనుమాన్, మహేశ్ బాబు గుంటూరు కారం ఒకే రోజు రిలీజ్ అయ్యాయి. అయితే, పాన్ వరల్డ్ రేంజ్‍లో రిలీజ్ అయిన హనుమాన్‍కు ఫుల్ పాజిటివ్ టాక్ వచ్చింది. గుంటూరు కారం మిక్స్డ్ టాక్ తెచ్చుకుంది.

ఆధ్యాత్మికతో సూపర్ హీరో సినిమాగా హనుమాన్‍ను దర్శకుడు ప్రశాంత్ వర్మ తెరకెక్కించిన తీరుపై ప్రశంసలు వస్తూనే ఉన్నాయి. హనుమంతుడిని ఈ మూవీలో చూపించిన తీరు, గ్రాఫిక్స్ ప్రేక్షకులను మైమరుస్తున్నారు. ఈ చిత్రంలో తేజ సజ్జాకు జోడీగా అమృత అయ్యర్ హీరోయిన్‍గా కనిపించారు. వినయ్ రాయ్, రాజ్ దీపక్ శెట్టి, సముద్రఖని, గెటప్ శ్రీను కీలకపాత్రల్లో కనిపించారు. ప్రైమ్ షో ఎంటర్‌టైన్‍మెంట్ బ్యానర్‌పై నిరంజన్ రెడ్డి ఈ మూవీని నిర్మించారు.