Gadar 2 Collections: కేజీఎఫ్ 2ను దాటేసిన ‘గదర్ 2’ మూవీ: కొనసాగుతున్న కలెక్షన్ల దూకుడు

Gadar 2 Collections: సన్నీ డియోల్ హీరోగా నటించిన హిందీ మూవీ ‘గదర్ 2’ కలెక్షన్లలో దూసుకుపోతోంది. బాలీవుడ్‍లో రికార్డులను సృష్టిస్తోంది. బాక్సాఫీస్ వద్ద వసూళ్లలో జోరు కొనసాగిస్తోంది. 2001లో వచ్చిన గదర్: ఏక్ ప్రేమ్ కహానీ చిత్రానికి సీక్వెల్‍గా ఇప్పుడు గదర్ 2 వచ్చింది. ఆగస్టు 11న రిలీజ్ అయిన ఈ చిత్రం తొలి రోజు నుంచే భారీ కలెక్షన్లను సాధిస్తూ వచ్చింది. 16వ రోజు కూడా మంచి వసూళ్లను రాబట్టింది. ఈ క్రమంలో కేజీఎఫ్ చాప్టర్ 2 హిందీ వెర్షన్ లైఫ్ టైమ్ కలెక్షన్లను గదర్ 2 దాటింది. ఆ వివరాలివే..

గదర్ 2 సినిమా 16వ రోజు రూ.13.75 కోట్లను రాబట్టింది. మొత్తంగా 16 రోజుల్లో ప్రపంచవ్యాప్తంగా ఈ సినిమా రూ.439.95 కోట్ల గ్రాస్ కలెక్షన్లను సాధించింది. దీంతో కేజీఎఫ్ చాప్టర్ 2 హిందీ వెర్షన్ లైఫ్ టైమ్ కలెక్షన్లను గదర్ 2 దాటిందని ట్రేడ్ ఎనలిస్ట్ తరణ్ ఆదర్శ్ ట్వీట్ చేశారు.

కన్నడ స్టార్ యశ్ హీరోగా నటించిన కేజీఎఫ్ చాప్టర్ 2 చిత్రం ప్రపంచవ్యాప్తంగా సుమారు రూ.1,200 కోట్ల కలెక్షన్లు సాధించింది. ఇందులో హిందీ వెర్షన్ రూ.434.70 కోట్లను దక్కించుకుంది. ఇప్పుడు, ఈ కేజీఎఫ్ చాప్టర్ 2 హిందీ వెర్షన్ లైఫ్ టైమ్ కలెక్షన్లను గదర్ 2 దాటింది.

హిందీ వెర్షన్ విషయంలో పఠాన్ (రూ.543 కోట్లు), బాహుబలి 2: ది కన్‍క్లూజన్ (రూ.511) ప్రస్తుతం టాప్‍ గ్రాసర్లుగా ఉన్నాయి. అయితే, గదర్ 2 ఈ సినిమాలను దాటే అవకాశాలు కనిపించడం లేదు.

గదర్ 2 చిత్రంలో సన్నీ డియోల్‍కు జోడీగా అమీషా పటేల్ నటించారు. ఉత్కర్ష శర్మ, గౌరవ్ చోప్రా, మనీశ్ చోప్రా, మనీష్ వాదా కీలకపాత్రల్లో నటించారు. అనిల్ శర్మ ఈ చిత్రానికి దర్శకత్వం వహించారు. జీ స్టూడియోస్ భాగస్వామ్యంతో ఆయనే ఈ సినిమాను నిర్మించారు. సుమారు రూ.60కోట్లతో తెరకెక్కిన గదర్ 2 భారీ కలెక్షన్లతో బ్లాక్‍బాస్టర్ అవుతోంది.