Balagam: బలగం మూవీకి మరో మూడు ఇంటర్నేషనల్ అవార్డులు

Balagam: టాలీవుడ్ లో ఈ మధ్య కాలంలో ఈ బలగం సినిమా గురించి జరిగినంత చర్చ మరే ఇతర మూవీపైనా జరగలేదంటే అతిశయోక్తి కాదేమో. పల్లెల్లోని ప్రతి మనిషి ఈ సినిమాతో కనెక్ట్ అవుతున్నాడు. ఊరి నడిబొడ్డులో పెద్ద పెద్ద స్క్రీన్లు ఏర్పాటు చేసుకొని, ఊరంతా కలిసి సినిమా చూస్తున్నారు. తెలంగాణ బ్యాక్‌డ్రాప్ లో కుటుంబ బంధాల విలువను చాటి చెప్పుతూ తీసిన ఈ మూవీ ప్రతి ఒక్కరినీ ఆకట్టుకుంటోంది.

వేణు యెల్దండి డైరెక్ట్ చేసిన ఈ సినిమా అటు అవార్డుల విషయంలోనూ దూసుకెళ్తోంది. ఇప్పటికే 40కిపైగా అంతర్జాతీయ అవార్డులను తమ సినిమా గెలుచుకుందని ఈ మధ్య డైరెక్టర్ వేణు చెప్పాడు. తాజాగా మరో మూడు అవార్డులు కూడా ఈ మూవీ ఖాతాలో చేరాయి. ది గోల్డెన్ బ్రిడ్జ్ ఇస్తాంబుల్ షార్ట్ ఫిల్మ్ ఫెస్టివల్ 2023లో ఈ మూడు అవార్డులు వచ్చాయి.

బెస్ట్ ఫీచర్ ఫిల్మ్, బెస్ట్ డైరెక్టర్, బెస్ట్ లీడ్ యాక్టర్ కేటగిరీల్లో ఈ అవార్డులు వచ్చాయి. ఇంటర్నేషనల్ లెవల్లో ఈ సినిమా ఇన్ని అవార్డులను సొంతం చేసుకోవడం నిజంగా మూవీ టీమ్ మొత్తానికి గర్వ కారణమనే చెప్పాలి. ఈ బలగం సినిమాలో డైరెక్టర్ వేణుతోపాటు ప్రియదర్శి, మురళీధర్ గౌడ్, కావ్యా కల్యాణ్ రామ్, రూప లక్ష్మి నటించారు. ఇక భీమ్స్ అందించిన మ్యూజిక్ కు కూడా మంచి రెస్పాన్స్ వచ్చింది.