స్టాక్ మార్కెట్ దూకుడు; 1 శాతం పైగా పెరిగిన సెన్సెక్స్, నిఫ్టీ; ఈ ర్యాలీకి 5 ప్రధాన కారణాలు ఇవే..

Stock market today: భారత స్టాక్ మార్కెట్ నేడు ఉవ్వెత్తున ఎగిసింది. స్టాక్ మార్కెట్ బెంచ్ మార్క్ లు సెన్సెక్స్, నిఫ్టీ 50 - సెప్టెంబర్ 20, శుక్రవారం ఉదయం ట్రేడింగ్ లో ఒక శాతానికి పైగా పెరిగి సరికొత్త రికార్డు గరిష్టాలను తాకాయి.

కొత్త రికార్డు గరిష్టాలకు సెన్సెక్స్, నిఫ్టీ 50

సెన్సెక్స్ 83,603.04 పాయింట్ల వద్ద ప్రారంభమై, ఒక శాతానికి పైగా పెరిగి 84,694.46 వద్ద ఆల్ టైమ్ గరిష్టాన్ని తాకింది. నిఫ్టీ 25,525.80 పాయింట్ల వద్ద ప్రారంభమై 25,849.25 పాయింట్ల వద్ద సరికొత్త గరిష్టాన్ని తాకింది. బీఎస్సీ మిడ్ క్యాప్, స్మాల్ క్యాప్ ఇండెక్స్ లు కూడా ఒక శాతానికి పైగా పెరగడంతో ఇన్వెస్టర్లకు లాభాల పంట పండింది. చివరకు సెన్సెక్స్ 1360 పాయింట్లు లేదా 1.63 శాతం పెరిగి 84,544.31 వద్ద, నిఫ్టీ 375 పాయింట్లు లేదా 1.48 శాతం లాభంతో 25,790.95 వద్ద ముగిశాయి.

6 లక్షల కోట్లు

బీఎస్ఈ లిస్టెడ్ కంపెనీల మొత్తం మార్కెట్ క్యాపిటలైజేషన్ (ఎంసీఏపీ) శుక్రవారం దాదాపు రూ.466 లక్షల కోట్ల నుంచి దాదాపు రూ.472 లక్షల కోట్లకు పెరిగింది. అంటే, దాదాపు 6 లక్షల కోట్లు పెరిగింది. మిడ్, స్మాల్ క్యాప్ షేర్లలో నిన్న అధిక స్థాయిల నుంచి ప్రాఫిట్ బుకింగ్ తర్వాత నేటి ట్రేడింగ్ సెషన్ లో సెంటిమెంట్ మెరుగుపడిందని స్టాక్స్ బాక్స్ రీసెర్చ్ హెడ్ మనీష్ చౌదరి అభిప్రాయపడ్డారు.

అమెరికా ఫెడ్ రేట్ల కోత ప్రభావం..

అమెరికా మార్కెట్లు రాత్రికి రాత్రే బలపడటం, భవిష్యత్తులో ఆర్బీఐ నుంచి రేట్ల కోతపై అధిక అంచనాలు మార్కెట్ల ర్యాలీకి తోడ్పడ్డాయి. మార్కెట్ల మొత్తం ట్రెండ్ సానుకూలంగానే ఉందని, అమెరికా ఫెడ్ రేట్ల కోత భారత్ సహా వర్ధమాన మార్కెట్లలోకి ప్రవాహాన్ని మరింత పెంచుతుందని తాము విశ్వసిస్తున్నామని మనీష్ చౌదరి అన్నారు. దీనికితోడు ముడిచమురు ధరలు తగ్గడం, మంచి రుతుపవనాలు, డీఐఐల వద్ద మిగులు లిక్విడిటీ సమీపకాలంలో క్యాపిటల్ మార్కెట్లకు మద్దతునిస్తాయని చౌధురి పేర్కొన్నారు.

ఈ 5 కీలక అంశాలు కారణం

భారత స్టాక్ మార్కెట్లో శుక్రవారం ర్యాలీకి ఈ ఐదు కీలక అంశాలు కారణమని మార్కెట్ నిపుణులు అభిప్రాయపడుతున్నారు.

1. సానుకూల అంతర్జాతీయ సంకేతాలు

అమెరికా ఫెడ్ రేట్లను 50 బేసిస్ పాయింట్లు తగ్గించడం, మరిన్ని రేట్ల కోతలు ఉండొచ్చన్న సంకేతాల నేపథ్యంలో అమెరికా, యూరప్, ఆసియా మార్కెట్లలో బలమైన కొనుగోళ్లు చోటుచేసుకుంటున్నాయి. నాస్డాక్ 2.51 శాతం, ఎస్ అండ్ పీ 500 1.70 శాతం లాభపడ్డాయి. ఆసియాలో నిక్కీ 1.5 శాతానికి పైగా లాభపడగా, కోస్పీ దాదాపు ఒక శాతం పెరిగింది. ముఖ్యంగా అమెరికా, యూరప్ మార్కెట్లు బలపడి ఇన్వెస్టర్ల సెంటిమెంట్ ను పెంచాయి.

2. రేట్ల తగ్గింపు చక్రం ప్రారంభం

ఇన్వెస్టర్ల రిస్క్ అభిరుచిని పెంచిన అమెరికా ఫెడరల్ రిజర్వ్ సెప్టెంబర్ 18న బెంచ్ మార్క్ రేట్లను 50 బేసిస్ పాయింట్లు తగ్గించింది. ఈ ఏడాది చివరి నాటికి బెంచ్ మార్క్ వడ్డీ రేటు మరో అర శాతం తగ్గుతుందని యూఎస్ ఫెడ్ సంకేతాలిచ్చింది. అంతేకాకుండా వచ్చే ఏడాది వడ్డీ రేట్లను 1 శాతం, 2026లో అర శాతం తగ్గించాలని అమెరికా సెంట్రల్ బ్యాంక్ భావిస్తోంది. అమెరికా ఆర్థిక వ్యవస్థ మంచి స్థితిలో ఉందని, ద్రవ్యోల్బణం స్థిరంగా తగ్గుతుందని ఫెడ్ చైర్మన్ జెరోమ్ పావెల్ అభిప్రాయపడ్డారు.

3. అమెరికా మాంద్యంపై ఆందోళనలు తగ్గుముఖం

సెప్టెంబర్ 14తో ముగిసిన వారానికి నిరుద్యోగ క్లెయిమ్ లు ఊహించిన దానికంటే తక్కువగా రావడంతో అమెరికా ఆర్థిక వ్యవస్థలో మందగమనంపై ఆందోళనలు కొద్దిగా తగ్గాయి. ఇది మార్కెట్ (stock market) వర్గాలకు ఊరటనిచ్చినట్లు తెలుస్తోంది. గత వారం, నిరుద్యోగ ప్రయోజనాల కోసం దరఖాస్తు చేసుకున్న అమెరికన్ల (usa news) సంఖ్య నాలుగు నెలల్లో కనిష్ట స్థాయికి పడిపోయింది. ఇది సెప్టెంబర్లో బలమైన ఉద్యోగ వృద్ధిని సూచిస్తుంది.

4. బ్యాంకింగ్ షేర్ల ముందంజ

బెంచ్ మార్క్ సూచీల్లో బ్యాంకింగ్ స్టాక్స్ ముందంజలో ఉన్నాయి. ఆరోగ్యకరమైన కొనుగోళ్లను చూస్తున్నాయి, ఇది సెన్సెక్స్ మరియు నిఫ్టీ 50 లకు మద్దతు ఇచ్చింది. శుక్రవారం నిఫ్టీ బ్యాంక్ ఇండెక్స్ దాదాపు 2 శాతం పెరిగి 54,066.10 వద్ద సరికొత్త రికార్డు గరిష్టాన్ని తాకింది. ఐసీఐసీఐ బ్యాంక్ (4.47 శాతం), కోటక్ మహీంద్రా బ్యాంక్ (2 శాతం), హెచ్డీఎఫ్సీ బ్యాంక్ (1.68 శాతం) షేర్లు 4 శాతం వరకు లాభపడటంతో సూచీ 1.42 శాతం పెరిగి 53,793.20 వద్ద ముగిసింది. నిఫ్టీ బ్యాంక్ ఇండెక్స్ వరుసగా ఏడు సెషన్లలో ఆకుపచ్చ రంగులోనే ఉంది. నెలవారీగా చూస్తే సెప్టెంబర్లో ఇప్పటివరకు నిఫ్టీ బ్యాంక్ ఇండెక్స్ 7.8 శాతం, నిఫ్టీ 2.2 శాతం పెరిగాయి.

5. టెక్నికల్ ఫ్యాక్టర్

‘‘మార్కెట్ 25,500/82,700 పైన ఉన్నంత కాలం బ్రేక్అవుట్ కొనసాగుతుంది. మార్కెట్ 26,000-26,200/85,000-85,500కు పెరగవచ్చు. మరోవైపు, 25,500/82,700 దిగువకు, సెంటిమెంట్ మారవచ్చు. ట్రేడర్లు దీర్ఘకాలిక ట్రేడింగ్ స్థానాల నుండి నిష్క్రమించడానికి ఇష్టపడవచ్చు’’ అని కొటక్ సెక్యూరిటీస్ వీపీ-టెక్నికల్ రీసెర్చ్ అమోల్ అథవాలే విశ్లేషించారు.