Range Rover: ఇక భారత్ లోనే రేంజ్ రోవర్, రేంజ్ రోవర్ స్పోర్ట్ మోడల్స్ ఉత్పత్తి

Range Rover: జాగ్వార్ ల్యాండ్ రోవర్ తన అత్యంత డిమాండ్ ఉన్న రెండు ఎస్యూవీలైన రేంజ్ రోవర్ (Range Rover), రేంజ్ రోవర్ స్పోర్ట్ లను భారతదేశంలో తయారు చేయనున్నట్లు ప్రకటించింది. పుణెలోని కంపెనీ ప్లాంటులో వీటిని ఉత్పత్తి చేయనున్నారు. ఈ మోడళ్లను యూకే వెలుపల ఉత్పత్తి చేస్తున్న తొలి దేశంగా భారత్ నిలుస్తోంది.

రేంజ్ రోవర్ ధర రూ. 2.36 కోట్లు

స్థానికంగా ఉత్పత్తి చేసిన రేంజ్ రోవర్ 3.0-లీటర్ హెచ్ఎస్ఈ ఎల్ డబ్ల్యూబీ ధర రూ .2.36 కోట్లు, రేంజ్ రోవర్ 3.0-లీటర్ పెట్రోల్ ఆటోబయోగ్రఫీ వెర్షన్ ధర రూ .2.60 కోట్లు (పన్నులకు ముందు)గా నిర్ణయించారు. రేంజ్ రోవర్ స్పోర్ట్ డీజిల్, పెట్రోల్ వెర్షన్ల ధర రూ .1.40 కోట్లు (పన్నులకు ముందు)గా ఉంది. భారతదేశంలో టాటా మోటార్స్ కు చెందిన జాగ్వార్ ల్యాండ్ రోవర్ (Jaguar Land Rover) మొట్టమొదటి ప్రయోగాత్మక కేంద్రమైన రేంజ్ రోవర్ హౌస్ యొక్క అధికారిక ప్రారంభోత్సవంలో కంపెనీ స్థానిక ఉత్పత్తికి సంబంధించిన ప్రకటన చేసింది. ఈ రెండు ఎస్ యూవీలను స్థానికంగా ఉత్పత్తి చేయాలని నిర్ణయించడం ఈ కార్ మోడళ్లకు పెరుగుతున్న ప్రజాదరణ ఫలితమేనని కంపెనీ అధికారులు చెబుతున్నారు. గత కొన్నేళ్లుగా భారత్ స్థిరమైన, అద్భుతమైన ఆర్థిక వృద్ధిని సాధించిందని, భవిష్యత్తులో కూడా స్థిరంగా వృద్ధి చెందుతుందని వారు ఆశాభావం వ్యక్తం చేశారు.

మోస్ట్ డిజైరబుల్ మోడ్రన్ లగ్జరీ ఎస్యూవీ

భారతదేశంలో రేంజ్ రోవర్ మరియు రేంజ్ రోవర్ స్పోర్ట్ యొక్క స్థానిక తయారీ దేశంలో మోస్ట్ డిజైరబుల్ మోడ్రన్ లగ్జరీ ఎస్యూవీగా రేంజ్ రోవర్ నిలుస్తుందని జాగ్వార్ ల్యాండ్ రోవర్ చీఫ్ కమర్షియల్ ఆఫీసర్ లెన్నార్డ్ హోర్నిక్ తెలిపారు. జాగ్వార్ ల్యాండ్ రోవర్ ఇప్పటికే భారతదేశంలో ఎఫ్-పేస్, డిస్కవరీ స్పోర్ట్, ఎవోక్, వెలార్ అనే నాలుగు మోడళ్లను తయారు చేస్తోంది. జాగ్వార్ ల్యాండ్ రోవర్ బ్రాండ్ ప్రొడక్ట్ పోర్ట్ ఫోలియోలో అగ్రస్థానంలో ఉన్న రేంజ్ రోవర్, రేంజ్ రోవర్ స్పోర్ట్ మోడళ్లపై కూడా ఇప్పుడు దృష్టి పెట్టనుంది. గత కొన్నేళ్లుగా దేశంలో అద్భుతమైన అమ్మకాల వృద్ధిని నమోదు చేయగలిగామని జేఎల్ఆర్ తెలిపింది.