Bharat Mart in UAE: యూఏఈ లో భారత్ మార్ట్ ను ప్రారంభించనున్న ప్రధాని మోదీ; ఏమిటీ భారత్ మార్ట్?

Bharat Mart in UAE: దుబాయిలో భారతీయ ఎంఎస్ఎంఈలు వాణిజ్యం చేయడానికి వీలుగా ఏర్పాటు చేసిన భారత్ మార్ట్ ను ప్రధాని నరేంద్ర మోదీ ప్రారంభించనున్నారు. భారతీయ ఎగుమతిదారులకు వివిధ రకాల ఉత్పత్తులను ఒకే గొడుగు కింద ప్రదర్శించడానికి ఇది ఒక ఏకీకృత వేదిక అవుతుంది. చైనాకు చెందిన 'డ్రాగన్ మార్ట్' తరహాలోనే భారత్ మార్ట్ ను ఏర్పాటు చేస్తున్నారు. ఇది పూర్తి స్థాయిలో 2025 నాటికి అందుబాటులోకి రానుంది.

భారత్ మార్ట్ అంటే ఏమిటి?

నివేదికల ప్రకారం, ఈ మార్ట్ 100,000 చదరపు మీటర్ల కంటే ఎక్కువ విస్తీర్ణంలో ఉంటుంది. ఇది గోదాము, రిటైల్, ఆతిథ్య సౌకర్యాలను నిర్వహించే బహుముఖ బహుళార్థ సాధక సదుపాయంగా పనిచేస్తుంది. డీపీ వరల్డ్ ఎదురుగా, జెబెల్ అలీ ఫ్రీ జోన్ (JAFZA)లో ఈ భారత్ మార్ట్ ను ఏర్పాటు చేస్తున్నారు. ఇది వివిధ వాణిజ్య అవసరాలు, కార్యకలాపాలను తీర్చే సమగ్ర గమ్యస్థానంగా సేవలందించనుంది. భారీ యంత్రాల నుంచి నిత్య గృహావసర వస్తువుల వరకు వివిధ రకాల వస్తువులను భారత్ మార్ట్ లో అందుబాటులో ఉంటాయి. ఇక్కడ రిటైల్ షోరూమ్ లు, కార్యాలయాలు, గోదాములు, ఇతర ఫెసిలిటీస్ ఉంటాయి. అదనంగా, రిమోట్ గా ఇక్కడి వస్తువులను కొనుగోలు చేయడానికి వీలుగా డిజిటల్ ప్లాట్ ఫామ్ ను కూడా అభివృద్ధి చేస్తున్నారు.

100 బిలియన్ డాలర్ల వాణిజ్య లక్ష్యం

సమగ్ర ఆర్థిక భాగస్వామ్య ఒప్పందం (CEPA) లో భాగంగా 2030 నాటికి భారతదేశం, యుఎఇ తమ పెట్రోలియంయేతర వాణిజ్య లక్ష్యాన్ని 100 బిలియన్ డాలర్లకు రెట్టింపు చేయాలని లక్ష్యంగా పెట్టుకున్నాయి. భారత్ మార్ట్ ప్రపంచానికి మేడిన్ ఇండియా ఉత్పత్తుల ఎగుమతుల మెగా డిస్ట్రిబ్యూషన్ హబ్ గా మారబోతోందని పార్క్స్ అండ్ జోన్ చీఫ్ ఆపరేటింగ్ ఆఫీసర్ డీపీ వరల్డ్ జీసీసీ అబ్దుల్లా అల్ హష్మీ తెలిపారు. కాగా, ప్రధాని మోదీ ఫిబ్రవరి 13 నుంచి 14 వరకు రెండు రోజుల పాటు యునైటెడ్ అరబ్ ఎమిరేట్స్ (యూఏఈ)లో పర్యటించనున్నారు. అబుదాబీలో తొలి హిందూ దేవాలయమైన బీఏపీఎస్ మందిర్ ను ప్రధాని ప్రారంభిస్తారు. అబుదాబీలో మంగళవారం ప్రధాని మోదీకి యూఏఈ అధ్యక్షుడు అల్ నహ్యాన్ సాదర స్వాగతం పలికారు.

యూరోప్ తో అనుసంధానం

అంతేకాకుండా, సముద్ర, రైలు మార్గాలను ఉపయోగించి మధ్యప్రాచ్యంలోని ఎంపిక చేసిన ప్రాంతాల ద్వారా యూరోప్ దేశాలను భారతదేశంతో అనుసంధానించడానికి రూపొందించిన వాణిజ్య కారిడార్ కోసం భారతదేశం, యునైటెడ్ అరబ్ ఎమిరేట్స్ మంగళవారం ఒక ఒప్పందాన్ని కుదుర్చుకున్నాయి. యునైటెడ్ స్టేట్స్, యూరోపియన్ యూనియన్ మద్దతుతో ఈ ప్రతిష్టాత్మక ప్రాజెక్ట్ రూపొందుతోంది.