Rupee falls to all-time low: 82.33కు పడిపోయిన రూపాయి విలువ

శుక్రవారం ప్రారంభ ట్రేడింగ్‌లో అమెరికా డాలర్‌తో పోల్చితే రూపాయి విలువ 16 పైసలు క్షీణించి ఆల్‌టైమ్ కనిష్ట స్థాయి 82.33 వద్దకు చేరుకుంది.

అంతేకాకుండా, దేశీయ ఈక్విటీలలో ప్రతికూల ధోరణి, పెరిగిన ముడి చమురు ధరలు పెట్టుబడిదారుల సెంటిమెంటును దెబ్బతీశాయని ఫారెక్స్ ట్రేడర్లు తెలిపారు.

ఇంటర్‌బ్యాంక్ ఫారిన్ ఎక్స్ఛేంజ్ వద్ద డాలరుతో పోలిస్తే రూపాయి 82.19 వద్ద ప్రారంభమైంది, ఆపై 82.33కి పడిపోయింది. దాని క్రితం రోజు ముగింపు కంటే 16 పైసల పతనం నమోదు చేసింది.

గురువారం భారతీయ కరెన్సీ రూపాయి డాలరుతో పోలిస్తే తొలిసారి 82 స్థాయికి దిగువన ముగిసింది. 55 పైసలు పతనమై రికార్డు స్థాయిలో 82.17 వద్ద ముగిసింది.

‘ముడి ధరల పెరుగుదల వాణిజ్య లోటు సంబంధిత ఆందోళనలకు కారణమైంది. అమెరికా వడ్డీ రేట్లు ఎక్కువ కాలం ఉండటం మూలధన ఖాతాకు సహాయం చేయదు’ అని ఐఎఫ్ఏ గ్లోబల్ రీసెర్చ్ అకాడమీ ఒక నోట్‌లో పేర్కొంది.

అంతేకాకుండా, రిజర్వ్ బ్యాంక్ ఆఫ్ ఇండియా (ఆర్‌బిఐ) తన నిల్వలను ఖర్చు చేయడంలో సాంప్రదాయకంగా మారినట్లు కనిపిస్తోంది. ఈ అంశాలు రూపాయి పతనానికి కారణమవుతున్నాయి.

డాలర్ బలాన్ని అంచనా వేసే డాలర్ ఇండెక్స్ 0.14 శాతం తగ్గి 112.10 వద్ద ట్రేడవుతోంది. గ్లోబల్ ఆయిల్ బెంచ్‌మార్క్ బ్రెంట్ క్రూడ్ ఫ్యూచర్స్ బ్యారెల్‌కు 0.10 శాతం తగ్గి 94.33 డాలర్లకు చేరుకుంది.

దేశీయ ఈక్విటీ మార్కెట్‌లో 30-షేర్ బిఎస్‌ఇ సెన్సెక్స్ 111.83 పాయింట్లు క్షీణించి 58,110.27 వద్ద ట్రేడవుతోంది. విస్తృత ఎన్‌ఎస్‌ఇ నిఫ్టీ 38.00 పాయింట్లు పడిపోయి 17,293.80 వద్దకు చేరుకుంది.

విదేశీ సంస్థాగత పెట్టుబడిదారులు గురువారం క్యాపిటల్ మార్కెట్‌లో నికర కొనుగోలుదారులుగా ఉన్నారు. ఎక్స్ఛేంజ్ డేటా ప్రకారం వారు రూ. 279.01 కోట్ల విలువైన షేర్లను కొనుగోలు చేశారు.