August 09 Telugu News Updates | శ్రీశైలం జలాశయానికి వరద.. 6 గేట్లు ఎత్తిన అధికారులు

టీఆర్ఎస్ ఎమ్మెల్యే రసమయి బాలకిషన్‌పై కేసు నమోదైంది. ఎమ్మెల్యే నుంచి తనకు ప్రాణహాని ఉందని సిద్ధిపేట జిల్లాకు చెందిన రాజశేఖరరెడ్డి అనే వ్యక్తి 2020లో పోలీసులకు ఫిర్యాదు చేశారు. అయితే రెండేళ్ల తర్వాత ఈ కేసుపై పోలీసులు స్పందించారు. తాజాగా ఎమ్మెల్యేపై కేసు నమోదు చేశారు. ఐపీసీ 209, 506 సెక్షన్ల కింద రసమయిపై కేసు నమోదైంది.

టీడీపీ అధినేత చంద్రబాబు అధ్యక్షతన ఆ పార్టీ పొలిట్ బ్యూరో సమావేశం జరిగింది. తెలుగుదేశం పార్టీలో యువతకు భాగస్వామ్యంపై కమిటీ ఏర్పాటు చేయాలని చంద్రబాబు ఆదేశించారు. ఆజాదీ కా అమృత్ మహోత్సవాలను ఘనంగా నిర్వహించాలని పిలుపునిచ్చారు. జగన్​ రెడ్డి డర్టీ గ్యాంగ్ వల్ల మహిళల భద్రత ప్రమాదంలో ఉందని మండిపడ్డారు.

హైదరాబాద్‌లో దారుణ సంఘటన వెలుగు చూసింది. తలసేమియాతో బాధత పడుతున్న మూడున్నరేళ్ల చిన్నారికి హెచ్‌ఐవి సోకిన రక్తాన్ని ఎక్కించినట్లు చిన్నారి తండ్రి పోలీసులకు ఫిర్యాదు చేశారు. దాదాపు రెండున్నరేళ్లుగా చిన్నారికి రెడ్‌ క్రాస్‌ బ్లడ్ బ్యాంక్ నుంచి తీసుకున్న రక్తాన్ని ఎక్కిస్తున్నామని, ఇటీవల వైద్య పరీక్షల్లో హెచ్‌ఐవి బయటపడినట్లు  పోలీసులకు ఫిర్యాదు చేశారు. మరోవైపు రెడ్‌ క్రాస్ బ్లడ్ బ్యాంక్ ఆరోపణల్ని ఖండించింది. తమ వద్ద 42సార్లు చిన్నారి కోసం రక్తం తీసుకున్నారని వాటిని పూర్తిగా పరీక్ష చేసిన తర్వాతే  చిన్నారి కోసం వినియోగించామని చెబుతున్నారు. మరెక్కడైనా పొరపాటు వల్ల చిన్నారికి హెచ్‌ఐవి సోకి ఉండొచ్చని రెడ్‌ క్రాస్‌ డైరెక్టర్ పిచ్చిరెడ్డి చెబుతున్నారు. 

బీజేపీలో చేరాలని నటి జయసుధకు ఆహ్వానం లభించినట్లు ప్రచారం జరుగుతోంది. 2009 ఎన్నికల్లో ముషీరాబాద్ నియోజక వర్గం నుంచి ఎమ్మెల్యేగా గెలిచిన జయసుధ ఆ తర్వాత రాజకీయాలకు దూరంగా ఉంటున్నారు. తాజాగా  తెలంగాణలో బీజేపీని బలోపేతం చేసేందుకు  ఆమెకు  పార్టీలోకి ఆహ్వానం పలికినట్లు  ప్రచారం జరుగుతోంది. 

హైదరాబాద్‌ బిఎన్‌రెడ్డి నగర్లో క్యాబ్‌ డ్రైవర్‌పై దాడి చేసిన ఘటనలో ప్రధాన నిందితుడు  వివేక్‌ రెడ్డి పోలీసులకు లొంగిపోయారు. క్యాబ్‌ బుక్‌ చేసుకుని ప్రయాణించిన తర్వాత డబ్బులు అడగడంతో డ్రైవర్‌తో పాటు కారు యజమానిపై నిందితులు విచక్షణారహితంగా క్రికెట్ బ్యాట్‌లతో దాడి చేశారు. ఈ ఘటనలో తీవ్రంగా గాయపడిన డ్రైవర్‌ వెంకటేష్‌ కోమాలోకి వెళ్లిపోయాడు. మరోవైపు ఈ ఘటనలో నిందితుల్ని తప్పించిన పోలీసులు బాధితుల్నే పోలీస్ స్టేషన్‌లో కూర్చోబెట్టడంతో  తీవ్ర గాయాలపాలైన బాధితుడు ప్రాణాలతో పోరాడుతున్నాడు. ఈ ఘటన నగరంలో తీవ్ర సంచలనం సృష్టించింది. 

దుండిగల్‌ బహదూర్‌పల్లిలో సెక్యూరిటీ హెడ్‌ అరవింద్‌ హత్యకు గురయ్యాడు. విధుల కేటాయింపు విషయంలో సెక్యూరిటీ గార్డుతో జరిగిన వివాదంలో హత్య జరిగింది. సెక్యూరిటీ హెడ్‌ అరవింద్‌, గార్డు రవిల మధ్య వాగ్వాదం జరగడంతో ఆవేశంతో సెక్యూరిటీ గార్డు కత్తితో దాడి చేశాడు.  తీవ్ర గాయాల పాలైన అరవింద్‌ను కొంపల్లిలోని ఓ ప్రైవేట్ ఆస్పత్రికి తరలించగా చికిత్స పొందుతూ మరణించాడు. 

గోదావరి వరదల్లో ముంపుకు గురైన ప్రాంతాల్లో తెలంగాణ సిఎల్పీ బృందం పర్యటించనుంది.  ఆగష్టు 16 నుంచి మూడ్రోజుల పాటు  నేతలు ముంపు ప్రభావిత ప్రాంతాాల్లో పర్యటిస్తారు.  పోలవరం ఎత్తు పెంచడం వల్లే ముంపు ఎక్కువైందనే ఆరోపణలపై త్వరలో ప్రాజెక్టును పరిశీలిస్తామని సిఎల్పీ నేతలు  ప్రకటించారు.

స్వాతంత్య్ర దినోత్సవం రోజు పుట్టిన  వారికి  12ఏళ్ల వయసు వచ్చే వరకు ఉచిత ప్రయాణాలకు అనుమతించాలని టిఎస్‌ఆర్టీసీ నిర్ణయించింది.  75ఏళ్లు పైబడిన వారికి తార్నాక ప్రభుత్వాసుపత్రిలో ఉచిత వైద్య పరీక్షలు నిర్వహిస్తారు. 

బాసర ట్రిపుల్ ఐటీలో  చీకట్లు అలుముకున్నాయి.  సోమవారం మధ్యాహ్నం ట్రాన్స్‌ఫార్మర్‌ పేలిపోవడంతో విద్యుత్ సరఫరా నిలిచిపోయింది. దీంతో రాత్రంతా విద్యార్ధులు చీకట్లో ఉండిపోయారు. హాస్టల్ గదుల్లో మొబైల్ లైట్ల వెలుగులో విద్యార్ధులు గడపాల్సి వచ్చింది. మంగళవారానికి విద్యుత్ సరఫరాను పునరుద్ధరిస్తామని  యూనివర్శిటీ అధికారులు చెబుతున్నారు. 

ఎస్సీ వర్గీకరణతోనే మాదిగలు, అనుబంధ కులాలకు న్యాయం జరుగుతుందని ఎమ్మార్పీఎస్‌  డిమాండ్‌ చేస్తోంది. తెలుగు రాష్ట్రాల్లో ఎస్సీ వర్గీకరణ కోరుతూ మాదిగ సంఘాల ఆధ్వర్యంలో  జంతర్‌మంతర్‌లో ధర్నా నిర్వహించారు.  మాదిగల హక్కులపై బీజేపీకి చిత్తశుద్ధి ఉంటే వచ్చే పార్లమెంటు సమావేశాల్లో వర్గీ కరణ బిల్లు ప్రవేశపెట్టాలని డిమాండ్ చేశారు.

బీసీ సంక్షేమ సంఘం జాతీయ అద్యక్షుడిగా జాజుల శ్రీనివాస గౌడ్ ఎన్నికయ్యారు. ఢిల్లీ కాన్‌స్టిట్యూషన్‌ క్లబ్‌లో నిర్వహించిన జాతీయ కార్యవర్గ సమావేశాల్లో శ్రీనివాస్‌ గౌడ్‌ను జాతీయాధ్యక్షుడిగా ఎన్నుకున్నారు.