Ganga Pushkaram 2023 । పవిత్ర గంగా పుష్కరాలు జరిగే రోజులు, పుణ్యస్నానాలు, ఆచరించాల్సిన నియమాలు!

Ganga Pushkaram 2023: పుష్కరం అనేది భారతదేశంలోని 12 ముఖ్యమైన నదులకు సంబంధించిన నదుల పండుగ. ఇది ప్రతి నదికి 12 సంవత్సరాలకు ఒకసారి జరుగుతుంది. ఏదైనా నదిని పవిత్రంగా మార్చగల శక్తిగల పుష్కరుడు అని కూడా పిలిచే దేవుడికి ఉంటుంది. పుష్కరుడు బృహస్పతితో కలిసి ప్రయాణిస్తాడని నమ్ముతారు. ఒకానొక కాలంలో ఒకానొక రాశిచక్రంలో పుష్కర దేవుడు బృహస్పతి (గురువు) ఉనికిలోకి వచ్చినపుడు నదీ పుష్కరం ప్రారంభం అవుతుంది. పుష్కరుడు బృహస్పతితో కలిసి అశ్వినీ నక్షత్ర మేష రాశిలోకి ప్రవేశించినప్పుడు గంగా పుష్కరాలు ప్రారంభమవుతాయి. అన్ని పుష్కరాలలో గంగా పుష్కరాలు అత్యంత పవిత్రమైనవి. గంగను సుర నది అని కూడా పిలుస్తారు, ఎందుకంటే ఇది మూడులోకాల్లో ప్రవహించే పుణ్యనది.

Ganga Pushkaralu 2023 Dates- 2023లో గంగా పుష్కరాల తేదీలు

ప్రతి పన్నెండేళ్లకు ఒకసారి వచ్చే గంగా పుష్కరం లేదా గంగా పుష్కరాలు 12 రోజుల పాటు కొనసాగుతాయి. 2023లో గంగా పుష్కరాలు ఏప్రిల్ 22న ప్రారంభమై 3 మే 2023న ముగుస్తాయి. అనగా వైశాఖ శుక్ల ద్వితీయ నాడు, ప్రారంభమై వైశాఖ శుక్ల త్రయోదశి నాడు ముగుస్తాయి. ఇది బృహస్పతి మేషరాశిలోకి ప్రవేశాన్ని (మేష రాశిలో గురు సంక్రమణం) సూచిస్తుంది.

ఈ 12 రోజుల పుష్కర కాలంలో గంగా నదిలో పవిత్ర స్నానాలు ఆచరించడం, కర్మకార్యాలు నిర్వహించడం, ఇతర ఆచారాలు పాటించడం ఎంతో పుణ్యం అని శాస్త్రాలు చెబుతున్నాయి.

“బ్రహ్మ విష్ణుశ్చ రుద్రాశ్చ ఇంద్రాద్య సర్వ దేవతా పితరో రుషా యస్శ్చియావ తత్రైవ నివసంతి హీ” అనే సంస్కృత శ్లోకం ప్రకారం, పుష్కర సమయంలో వార్షిక పిండదానం, పితృ తర్పణం, అనేక ఇతర పితృ కర్మలు చేయడం ఎంతో పుణ్యం. ఒకేసారి త్రిమూర్తులు, దేవతలందరినీ పూజించిన పుణ్య ఫలం లభిస్తుంది.

గంగా పుష్కరాలు జరిగే ప్రదేశాలు

గంగా పుష్కరాలు గంగానదీ తీరం వెంబడి ఉండే పవిత్ర పుణ్యక్షేత్రాలలో జరుగుతాయి. గంగోత్రి, గంగాసాగర్, హరిద్వార్, బద్రీనాథ్, కేదార్ నాథ్, వారణాసి (కాశీ), ఋషీకేశ్, అలహాబాద్ (సంగం ప్రయాగ)లలో జరుగుతాయి.

కాశీనాథుడు కొలువుదీరిన పవిత్ర వారణాసి క్షేత్రంలో గంగా పుష్కర స్నానానికి 64 స్నాన ఘాట్‌లు ఉన్నాయి. అన్నింటిలో మణికర్ణికా ఘాట్ ముఖ్యమైనది.

పవిత్ర గంగా స్నానం చేసేటపుడు త్రికరణ శుద్ధితో ఉండాలి. ఆచారాలను భక్తితో నిర్వహించాలి. గంగానది పవిత్రతను కాపాడుతూ పుణ్యస్నానం ఆచరించాలి, పుష్కర స్నానంలో పాల్గొనేటప్పుడు శుభ్రమైన వస్త్రాలను ధరించండి. నదీతీరంలోని ఇసుకతో కాని, మట్టితో కాని పార్థివ లింగాన్ని తయారు చేసి నది సమీపంలో ఉంచాలి. స్నానం ఆచరించేటపుడు తర్పణాలు వదలాలి.