Rythu Bima Scheme : రైతు బీమా ఇకపై మరింత వేగంగా..! త్వరలోనే ప్రత్యేక యాప్, వీటిని తెలుసుకోండి

తెలంగాణ ప్రభుత్వం మరో కీలక నిర్ణయం దిశగా అడుగులు వేస్తోంది. అన్నదాతల కోసం తీసుకువచ్చిన రైతుబీమా స్కీమ్ కు సంబంధించి కీలక మార్పులు తీసుకురాబోతుంది. 

'రైతుబీమా పథకం కోసం మొబైల్‌ యాప్‌ను తయారు చేయాలని రాష్ట్ర ప్రభుత్వం నిర్ణయించింది. రైతులకు ఎదురవుతున్న ఇబ్బందులను దృష్టిలో ఉంచుకొని పరిష్కరించటమే లక్ష్యంగా ఈ యాప్ ను తీసుకురాబోతుంది. 

ఈ పథకం కోసం LICకి పదేళ్లుగా రైతుల ప్రీమియాన్ని తెలంగాణ ప్రభుత్వమే చెల్లిస్తోంది. రూ. 5 లక్షల బీమా ఉంటుంది. అయితే ప్రతి ఏడాది ఈ స్కీమ్  అమలులో పలు ఇబ్బందులు ఎదురవుతున్నాయి. ముఖ్యంగా సాంకేతికపరమైన అంశాలు తెరపైకి వస్తున్నాయి. 

వయోపరిమితి సమస్య ప్రధానంగా ఉంటుంది. దీనికి తోడు ఆధార్‌లో తప్పులు, నామినీ పేర్లు సరిగా నమోదు కాకపోవడం, మరణ ధ్రువీకరణ పత్రాలు సకాలంలో అందకపోవడంతో పాటు పలు కారణాల వల్ల రైతు కుటుంబాలకు సాయం అందడం లేదు. 

 కొత్త రైతుల పేర్ల నమోదులోనూ సమస్యలు ఉత్పన్నమవుతున్నాయి. క్షేత్రస్థాయిలోని సమస్యలను తెలుసుకున్న వ్యవసాయశాఖ… ఈ స్కీమ్ ను మరింత పకడ్బందీగా అమలు చేసేందుకు సిద్ధమైంది. అందులో భాగంగా యాప్‌ అవసరమని వ్యవసాయ శాఖ గుర్తించింది. అధికారుల సూచనలకు అనుగుణంగా దీన్ని రూపొందిస్తున్నారు.

18 నుంచి 60 ఏళ్ల లోపు వయసు రైతు ఏ కారణం వల్లనైనా మరణిస్తే ఆయన కుటుంబానికి ఈ పథకం కింద రూ.5 లక్షల సాయం చెల్లిస్తున్న సంగతి తెలిసిందే. ఈ స్కీమ్ లో గత బీఆర్ఎస్ ప్రభుత్వం తీసుకువచ్చింది.