భార్యను బంధువులతో గ్యాంగ్​ రేప్​ చేయించిన భర్త.. కట్నం ఇవ్వలేదని..

Rajasthan gang rape news | రాజస్థాన్​లో మానవజాతి తలదించుకునే ఘటన ఒకటి వెలుగులోకి వచ్చింది. కట్నం కోసం.. సొంత భార్యను తన బంధువుల చేత అత్యాచారం చేయించాడు ఓ కిరాతకుడు. ఆ దృశ్యాలను చిత్రీకరించి సామాజిక మాధ్యమంలో అప్లోడ్​ చేశాడు!

ఇంత దారుణమా..!

రాజస్థాన్​లోని భరత్​పూర్​లో వెలుగులోకి వచ్చింది ఈ ఘటన. బాధితురాలికి 2019లో వివాహం జరిగింది. అప్పటి నుంచి.. ఆమె అత్తామామలు, భర్త.. కట్నం కోసం వేధిస్తూ ఉండేవారు. ఆ వేధింపులను తట్టుకోలేక ఆ మహిళ.. పుట్టింటికి వెళ్లిపోయింది.

కొన్ని రోజుల క్రితం.. ఆ మహిళకు తన భర్త ఫోన్​ చేశాడు. ఇంటికి తిరిగి రావాలని వేడుకున్నాడు. భర్త మారిపోయాడు అని భావించి.. ఆమె అత్తారింటికి వెళ్లింది. కానీ అదే ఆమె జీవితాన్ని మార్చేసింది!

భార్య ఇంట్లో ఉన్న సమయంలో.. ఆ భర్త కొందరు బంధువులను పిలిపించాడు. ఆ తర్వాత.. వారి చేత ఆమెను రేప్​ చేయించాడని మహిళ ఆరోపించింది. అంతటితో ఆగకుండా.. ఆ దృశ్యాలను ఫోన్​లో చిత్రీకరించి, యూట్యూబ్​లో అప్లోడ్​ చేశాడని చెప్పింది.

'మీ కుటుంబం.. నాకు కట్నం ఇవ్వలేదు. కానీ ఇప్పుడు ఈ విడియోను నేను యూట్యూబ్​లో అప్లోడ్​ చేసి డబ్బులు సంపాదించుకుంటాను,' ఆ భర్త.. మహిళపై అరిచాడు.

కొన్ని రోజులు తర్వాత.. నిందితుల్లో ఒకరు తనను వేరే ప్రాంతానికి తీసుకెళ్లినట్టు, అక్కడ తనపై మరోమారు అత్యాచారానికి పాల్పడినట్టు బాధితురాలు వెల్లడించింది. అక్కడి నుంచి తాను తప్పించుకుని పుట్టింటికి వెళ్లినట్టు పేర్కొంది.

ఈ ఘటనపై బాధితురాలు పోలీసులకు ఫిర్యాదు చేసింది. ఘటనపై కేసు నమోదు చేసుకున్న పోలీసులు.. దర్యాప్తు చేపట్టారు. అయితే.. యూట్యూబ్​లో వీడియో అప్లోడ్​ చేశారా? లేదా? అన్న విషయంపై స్పష్టత లేదని కమాన్​ పోలీస్​స్టేషన్​ అధికారి దౌలత్​ సాహు మీడియాకు వెల్లడించారు.