Education in Canada : స్టూడెంట్​ పర్మిట్​ని భారీగా తగ్గించిన కెనడా! భారతీయ విద్యార్థులకు ఇక కష్టమేనా?

భారత్​- కెనడా దేశాల మధ్య నెలకొన్న వివాదంతో దేశ విద్యార్థులు ఆందోళనకు గురవుతున్నారు. కెనడాలో 400,000 మందికి పైగా భారతీయులు విద్యనభ్యసిస్తున్నారు. అయితే భారతదేశం-కెనడా సంబంధాలు క్షీణించడంతో రాబోయే సంవత్సరంలో 100,000 తగ్గుతాయని నిపుణులు అంచనా వేస్తున్నారు. భారతీయులు నిజంగానే ఆందోళన చెందాల్సిన అవసరం ఉందా?

కెనడా ఎలాంటి ఆంక్షలు విధించింది?

హౌసింగ్ సంక్షోభం మధ్య, పాఠశాలల నాణ్యతను తనిఖీ చేయడానికి కెనడా కొత్త విద్యార్థుల అనుమతులపై రెండేళ్ల పరిమితిని ప్రవేశపెట్టింది! జనవరిలో అంతర్జాతీయ విద్యార్థుల పర్మిట్లను 35 శాతం తగ్గించి 2024లో 3,64,000కు తీసుకెళ్లింది. ఆ తర్వాత సెప్టెంబరులో మరో 10 శాతం కోత విధించి 2025 సంవత్సరానికి అనుమతులు 3,27,000కు తగ్గించింది. కెనడా కూడా జీఐసీ (గ్యారెంటీడ్ ఇన్వెస్ట్మెంట్ సర్టిఫికేట్)ను సీఏడీ 10,000 (రూ.6 లక్షలు) నుంచి 20,635 (రూ.12 లక్షలు)కు రెట్టింపు చేసింది. విద్యార్థికి కెనడాలో నివసించే ఆర్థిక స్థోమత ఉందనడానికి ఈ జీఐసీ రుజువుగా పనిచేస్తుంది.

భారతీయ విద్యార్థులపై ప్రభావం పడుతోందా?

కెనడాలో 4,27,000 మంది భారతీయులు విద్యనభ్యసిస్తున్నారు. కాలేజీల పరిమితులు, ఖర్చులు, రీసెర్చ్​ విద్యార్థులను ఇతర దేశాల వైపు నెట్టేస్తున్నాయి. అమెరికాను ఇష్టపడే ఆంధ్రప్రదేశ్, తమిళనాడు విద్యార్థుల కంటే ఆస్ట్రేలియా, కెనడాకు వెళ్లే పంజాబ్, హరియాణా విద్యార్థులు ఎక్కువగా ప్రభావితమవుతున్నారని ఎడ్యుకేషన్ కన్సల్టెంట్​లు చెబుతున్నారు. ద్వితీయ, తృతీయ శ్రేణి నగరాలైన అమృత్ సర్, జలంధర్, పాటియాలా, మొహాలీ, బర్నాలా, ఖన్నా, ముక్త్సర్, ఫిరోజ్ పూర్, ఫరీద్ కోట్ వంటి చిన్న పట్టణాలకు చెందిన విద్యార్థులు ఇప్పుడు ఐరోపా దేశాలకు వెళ్లేందుకు రుణాలు తీసుకుంటున్నారని బ్యాంకింగేతర ఆర్థిక సంస్థలు (ఎన్​బీఎఫ్​సీ) చెబుతున్నాయి.

కెనడాకు వెళ్లే వారి సంఖ్య తక్కువగానే ఉంటుందా?

అలా జరగకపోవచ్చు! కెనడాకు భారతీయ విద్యార్థులు అవసరమని నిపుణులు చెబుతున్నారు. స్థిరమైన ఆదాయ ప్రవాహంతో పాటు, కెనడా ఉద్యోగ సంక్షోభాన్ని ఎదుర్కొంటున్నప్పటికీ శ్రామిక శక్తికి చాలా అవసరం. కొంతమంది విద్యార్థులు తమ ప్రణాళికలను రద్దు చేసుకోవడం కంటే వాయిదా వేసుకుంటున్నారు. అయితే దౌత్య వివాదం కారణంగా ఈ ఫిబ్రవరి-మార్చ్​ (స్ప్రింగ్) సీజన్​లో ప్రవేశాలపై ప్రభావం పడుతుందని విద్యార్థులు, తల్లిదండ్రులు ఆందోళన చెందుతున్నారు.

కెనడా కాకపోతే ఇంకెక్కడ?

గత ఏడాది నుంచి ఆస్ట్రేలియా విశ్వవిద్యాలయాలు విద్యార్థుల నాణ్యతను పర్యవేక్షించడం ప్రారంభించాయి. డిపెండెంట్లను తీసుకురావడంపై బ్రిటన్ జనవరిలో కఠినమైన రూల్స్​తో వీసా నిబంధనలను అమల్లోకి తెచ్చింది. కాబట్టి, తూర్పు ఐరోపా దేశాలు-పోలాండ్, జార్జియా, ఎస్టోనియా, లిథువేనియా- ఎక్కువ మంది విద్యార్థులను ఆకర్షించడానికి వారి కళాశాల ప్రతినిధులు భారతదేశాన్ని సందర్శించడంతో ఆదరణ పెరుగుతోంది. ఉక్రెయిన్ యుద్ధం కారణంగా అమెరికా, జర్మనీలకు వెళ్లే వైద్య, ఆరోగ్య సంరక్షణ విద్యార్థుల సంఖ్య పెరిగింది.

కొందరైతే విదేశాలకు వెళ్లాలన్న ప్లాన్స్​ని విరమించుకుని భారత్​లో ఉన్నత విద్యను ఎంచుకుంటున్నారు.

కెనడా విశ్వవిద్యాలయాలు ఆందోళన చెందుతున్నాయా?

అతిపెద్ద సంస్థల్లో ఒకటైన టొరంటో విశ్వవిద్యాలయానికి ఈ ఏడాది దరఖాస్తులు 40శాతం తగ్గాయి. స్పష్టత లేకపోవడం, అనిశ్చితి ప్రభావం చూపిందని, ఈ ఏడాది భారతీయ విద్యార్థుల నుంచి వచ్చిన దరఖాస్తుల సంఖ్య తగ్గుముఖం పట్టడం ఇందుకు నిదర్శనమని యూనివర్సిటీ ఇంటర్నేషనల్ వైస్ ప్రెసిడెంట్ జోసెఫ్ వాంగ్ మే నెలలో చెప్పారు. అనేక కెనడియన్ విశ్వవిద్యాలయాలలో, చైనీయుల తరువాత భారతీయ విద్యార్థులు రెండొవ అతిపెద్ద సమూహంగా ఉన్నారు.