IIT Madras : ‘జాబ్​ ఆఫర్ల’లో ఐఐటీ మద్రాస్​ రికార్డు.. అత్యధిక ప్యాకేజీ రూ. 1.98 కోట్లు!

IIT Madras placements 2022 : జాబ్​ ఆఫర్లలో ఐఐటీ మద్రాస్​ రికార్డు సృష్టించింది. 2021-22 విద్యా సంవత్సరానికి సంబంధించి రెండు దశల్లో ప్లేస్​మెంట్​ డ్రైవ్​ జరగ్గా.. 380 కంపెనీలు వచ్చి.. 1,199 ఉద్యోగాలను విద్యార్థులకు ఆఫర్​ చేశాయి. వీటితో పాటు 231 మంది.. ప్రీ-ప్లేస్​మెంట్​ డ్రైవ్​(పీపీఓ)లోనే ఉద్యోగాలు సంపాదించారు. ఫలితంగా.. ఈసారి మొత్తం ఉద్యోగాల సంఖ్య 1,430కు చేరింది. 2018-19 విద్యా సంవత్సరంలో వచ్చిన జాబ్​ ఆఫర్ల(1,151) కన్నా ఇది ఎక్కువే.

ఈసారి వచ్చిన జాబ్​ ఆఫర్లలో 45 ఉద్యోగాలు విదేశాల్లో ఉన్నాయి. ఈ 45 ఉద్యోగాలను 14 కంపెనీలు ఆఫర్​ చేశాయి. ఇది కూడా ఒక రికార్డే. అదే సమయంలో 199మంది విద్యార్థులకు 131 స్టార్టఅప్​ కంపెనీలు జాబ్​ ఆఫర్​ చేశాయి. ఎంబీఏకు చెందిన మొత్తం 61మంది విద్యార్థులు ప్లేస్​ అయ్యారు. ఫలితంగా ఆ విభాగంలో ఐఐటీ మద్రాస్​.. 100శాతం ప్లేస్​మెంట్​ ఘనతను సాధించింది.

IIT Madras : 2021-22 విద్యా సంవత్సరానికి విద్యార్థులు అందుకున్న సగటు వేతనం.. ఏడాదికి రూ. 21.48లక్షలు. ఓ విద్యార్థికి అత్యధికంగా రూ. 1.98కోట్ల(2,50,000 డాలర్లు) ప్యాకేజీ లభించింది.

ఉద్యోగాల కోసం ప్లేస్​మెంట్​ డ్రైవ్​లో రిజిస్టర్​ చేసుకున్న 80శాతం మంది విద్యార్థులకు జాబ్​ ఆఫర్లు వచ్చాయి.

రకుటెన్​ మొబైల్​, గ్లీన్​, మైక్రాన్​ టెక్నాలజీస్​, హోండా ఆర్​ ఎండీ, కొహెస్టీ, డా విన్సి డెరివేటివ్స్​, యాక్సెంచర్​ జపాన్​, హిలాబ్స్​ ఇంక్​, క్వాంట్​బాక్స్​ రీసెర్చ్​, మీడియా టెక్​, మనీ ఫార్వర్డ్​, రుబ్రిక్​, ఉబెర్​ వంటి అంతర్జాతీయ సంస్థలు.. ఈసారి విద్యార్థులకు జాబ్​ ఆఫర్లు ఇచ్చాయి.