ఇండియాపై తప్పుడు ప్రచారం.. 16 యూట్యూబ్​ ఛానెళ్లు బ్లాక్​

Youtube channels blocked India | ఇండియాపై తప్పుడు ప్రచారాలు సాగిస్తున్న యూట్యూబ్​ ఛానెళ్లపై కేంద్రం మరోమారు పంజా విసిరింది. ఇటీవలి కాలంలో 25కుపైగా యూట్యూబ్​ ఛానెళ్లను బ్లాక్​ చేసిన కేంద్రం.. తాజాగా ఆ జాబితాలోకి మరో 16 ఛానెళ్లను చేర్చింది. ఈ మేరకు 2021 ఐటీ నిబంధనల్లోని అధికారాలను ఉపయోగించుకుని వాటిని బ్లాక్​ చేస్తున్నట్టు సమాచారశాఖ ఓ ప్రకటనను విడుదల చేసింది.

ఈ 16 ఛానెళ్లల్లో 10 ఇండియాకు చెందినవి కాగా.. మరో 6.. పాకిస్థాన్​కు చెందినవని తెలుస్తోంది. వీటిల్లో జాతీయ భద్రతకు విఘాతం కలిగించే విధంగా కంటెంట్​ ఉంటోందని అధికారులు వెల్లడించింది. మతపరమైన ఘర్షణలకు రెచ్చగొట్టే విధంగా, భారత్​లోని ప్రజా వ్యవస్థను ధ్వంసం చేసే విధంగా ఈ ఛానెళ్లు కార్యకలాపాలు సాగిస్తున్నాయని పేర్కొన్నారు. అందుకే వాటిని బ్లాక్​ చేసినట్టు వివరించారు.

ఈ 16 యూట్యూబ్​ ఛానెళ్లకు.. 68కోట్లుపైగా వ్యూవర్​షిప్​ ఉన్నట్టు తెలుస్తోంది.

నెలలో రెండోసారి…

యూట్యూబ్​ ఛానెళ్లను బ్లాక్​ చేయడం.. ఏప్రిల్​లో ఇది రెండోసారి. 22 యూట్యూబ్​ ఛానెళ్లు, మూడు ట్విట్టర్​ ఖాతాలు, ఒక ఫేస్​బుక్​ ఆకౌంట్, ఒక న్యూస్​ వెబ్​సైట్​ను భారత ప్రభుత్వం బ్లాక్​ చేసింది. 2021 ఐటీ నిబంధనల్లోని అత్యవసర అధికారాలను ఉపయోగించి వీటిపై నిషేధం విధిస్తున్నట్టు ఏప్రిల్​ 5న ఆదేశాలు జారీ చేసింది. ఆయా సామాజిక మాధ్యమాలు.. ఫేక్​ న్యూస్​ను వ్యాపింపజేస్తూ.. దేశ భద్రత, విదేశీ సంబంధాలకు విఘాతం కలిగిస్తున్నాయని ఆ ఆదేశాల్లో పేర్కొంది కేంద్ర సమాచారశాఖ.