Explosion in Bengaluru: బెంగళూరులోని రామేశ్వరం కెఫేలో భారీ పేలుడు, పలువురికి తీవ్ర గాయాలు

Explosion in Bengaluru: బెంగళూరులో శుక్రవారం మధ్యాహ్నం భారీ పేలుడు సంభవించింది. బెంగళూరులోని రాజాజీ నగర్ ప్రాంతంలో ఉన్న ప్రముఖ హోటల్ రామేశ్వరం కెఫే లో ఈ పేలుడు సంభవించింది.

తీవ్ర గాయాలు..

గత కొన్నాళ్లుగా ప్రశాంతంగా ఉన్న బెంగళూరు శుక్రవారం మధ్యాహ్నం భారీ పేలుడుతో ఉలిక్కిపడింది. బెంగళూరులోని రాజాజీ నగర్ ప్రాంతంలో ఉన్న ప్రముఖ హోటల్ రామేశ్వరం కెఫే లో ఒక్కసారిగా భారీ పేలుడు చోటు చేసుకుంది. ఈ పేలుడు లో ఐదుగురికి తీవ్రంగా గాయాలైనట్లు సమాచారం. పేలుడు సమచారం తెలియగానే పోలీసులు హుటాహుటిన ఘటనాస్థలానికి చేరుకుని, క్షతగాత్రులను ఆసుపత్రులకు తరలించారు. ఈ పేలుడుపై కేసు నమోదు చేసుకుని దర్యాప్తు ప్రారంభించారు. అయితే, ఈ పేలుడు ప్రమాదవశాత్తూ జరిగిందా? లేక కుట్ర కోణం ఏదైనా ఉందా? అనే కోణంలో దర్యాప్తు జరుపుతున్నట్లు పోలీసులు తెలిపారు. ఇప్పటివరకైతే, ఈ పేలుడుకు బాధ్యత వహిస్తున్నట్లు ఏ ఉగ్రవాద లేదా తీవ్రవాద సంస్థ ప్రకటించలేదు. ఘటన జరిగిన ప్రాంతం హెచ్ ఏ ఎల్ పోలీస్ స్టేషన్ పరిధిలోకి వస్తుంది.

ఎలా జరిగింది?

రామేశ్వరం కెఫే సమీపంలో ఒక బ్యాగ్ లో పేలుడు పదార్ధాన్ని ఉంచి, రిమోట్ తో దాన్ని పేల్చినట్లు భావిస్తున్నారు. ఒక గుర్తు తెలియని వ్యక్తి ఆ బ్యాగ్ ను అక్కడ పెట్టినట్లు తెలుస్తోంది. ఈ పేలుడుతో రద్దీగా ఉండే రామేశ్వరం కెఫే లో ఒక్కసారిగా గందరగోళం, తొక్కిసలాట నెలకొన్నది. ఈ పేలుడుతో రామేశ్వరం కెఫే కూడా భారీగా ధ్వంసమైంది.