Texas mall shooting : టెక్సాస్​ మాల్​లో కాల్పుల కలకలం- 9మంది మృతి

Allen premium outlets shooting : గన్​ కల్చర్​తో ఉక్కిరిబిక్కిరి అవుతున్న అమెరికాలో మరో కలకలం! టెక్సాస్​లోని ఆలెన్​లో ఉన్న ఓ మాల్​లోకి దూసుకెళ్లిన ఆగంతకుడు విచ్చలవిడిగా కాల్పులకు తెగబడ్డాడు. ఈ ఘటనలో 9మంది ప్రాణాలు కోల్పోయారు. మరో ఏడుగురు తీవ్రంగా గాయపడ్డారు. పరిస్థితిని అదుపులోకి తీసుకొచ్చిన పోలీసులు.. ఆగంతకుడిని మట్టుబెట్టారు. అనంతరం క్షతగాత్రులను ఆసుపత్రికి తరలించారు. మాల్​లో కుప్పలుతెప్పలుగా పడి ఉన్న మృతదేహాలకు సంబంధించిన దృశ్యాలు సామాజిక మాధ్యమాల్లో వైరల్​గా మారాయి.

కాల్పుల మోత..

"షూటర్​ను పోలీసులు మట్టుబెట్టారు. తాజా కాల్పుల ఘటనలో 9మంది ప్రాణాలు కోల్పోయారు. ఘటనాస్థలంలో 7 మృతదేహాలు లభించాయి. ఆసుపత్రికి తరలించిన క్షతగాత్రుల్లో ఇద్దరు ప్రాణాలు కోల్పోయారు," అని ఆలెన్​ ప్రాంతానికి చెందిన ఫైర్​ చీఫ్​ జొనాథన్​ బాయ్డ్​ మీడియాకు తెలిపారు.

Texas shooting live updates : స్థానిక కాలమానం ప్రకారం శనివారం మధ్యాహ్నం 3 గంటల 30 నిమిషాలకు ఆలెన్​ ప్రిమియం ఔట్​లెట్​​లోకి ప్రవేశించాడు ఆగంతకుడు. బ్లాక్​ సెడాన్​ కారులో నుంచి దిగి.. ఆయుధాలతో షూటింగ్​ మొదలుపెట్టాడు.

"కాల్పుల శబ్ధం వినిపించింది. ఘటనాస్థలానికి వెళ్లి అనుమానితుడితో పోరాడాము. అతడిని మట్టుబెట్టాము. అతని వివరాలు తెలియాల్సి ఉంది," అని టెక్సాస్​ పోలీసు విభాగానికి చెందిన హార్వీ తెలిపారు.

'మాటలకు అందని విషాదం..'

Texas mall shooting death toll : మాల్​లోని దృశ్యాలు భయానకంగా ఉన్నట్టు ప్రత్యక్ష సాక్షులు తెలిపారు. కాల్పుల శబ్ధం వినిపించగానే.. అనేక మంది భయంతో పరుగులు తీసినట్టు వివరించారు. కొందరు అపస్మారక స్థితిలో పడి ఉండటాన్ని గుర్తించినట్టు పేర్కొన్నారు. వీరిలో ఓ సెక్యూరిటీ గార్డు, 5ఏళ్ల చిన్నారి కూడా ఉన్నట్టు చెప్పారు. ‘అమెరికాలో అసలు సురక్షితమైన ప్రాంత అంటూ ఏదైనా ఉందా?’ అని ప్రశ్నించారు.

ఈ ఘటనపై టెక్సాస్​ గవర్నర్​ గ్రేగ్​ అబాట్​ స్పందించారు. ఇదొక మాటలకందని విషాదం అని అన్నారు. మృతుల కుటుంబాలకు సానుభూతి తెలిపారు.

America shooting latest news : అమెరికాలో గన్​ కల్చర్​ అత్యంత ఆందోళనకరంగా ఉంది. 2021లో 49వేల మంది కాల్పులకు ప్రాణాలు విడిచారు. 2020లో ఆ సంఖ్య 45వేలుగా ఉంది. ఈ ఏడాదిలో ఇప్పటికే అనేక షూటింగ్​ ఘటనలు చోటుచేసుకున్నాయి. కాల్పుల్లో నలుగురు, అంతకన్నా ఎక్కువమంది మరణించి ఘటనలు ఇప్పటికే 195 నమోదయ్యాయి.