Vijay Devarakonda Yadadri: యాదాద్రిలో విజయ్ దేవరకొండ.. ఆలయం గురించి ఏం చెప్పాడంటే?

పెళ్లి చూపులు సినిమాతో హీరోగా సినీ కెరీర్ ప్రారంభించి అతి తక్కువ కాలంలోనే రౌడీ హీరోగా పేరు తెచ్చుకున్నాడు విజయ్ దేవరకొండ. పెళ్లి చూపులు వంటి క్లాసిక్ హిట్ తర్వాత బోల్డ్ లవ్ స్టోరీగా అర్జున్ రెడ్డి సినిమాతో ప్రేక్షకుల ముందుకు వచ్చిన విజయ్‍కు అంతకుమించిన క్రేజ్ వచ్చింది. సినిమా ప్రమోషన్స్ నుంచి విడుదల వరకు సినిమాపై కాంట్రవర్సీలు వచ్చినా చివరికీ బ్లాక్ బస్టర్ అయింది. దీంతో విజయ్ పేరు మారుమోగిపోయింది. అనంతరం గీత గోవిందంతో విజయ్ దేవరకొండకు అభిమానులు మరింతగా పెరిగారు.

ప్లాప్ సినిమాలు

అయితే విజయ్ దేవరకొండకు ద్వారక, టాక్సీవాలా, నోటా, వరల్డ్ ఫేమస్ లవర్, డియర్ కామ్రెడ్ సినిమాలు అంతగా వర్కౌట్ కాలేదు. ఇక ఎన్నో అంచనాలతో వచ్చిన లైగర్ తీవ్ర డిజాస్టర్‌గా మిగిలింది. దీని తర్వాత తాజాగా ఖుషి సినిమాతో వచ్చాడు విజయ్. సెప్టెంబర్ 1న విడుదలైన ఖుషి సినిమాపై ప్రేక్షకులు పాజిటివ్‍గా స్పందిస్తున్నారు. మాస్ ఆడియెన్స్ కు తప్పా ఫ్యామిలీ ప్రేక్షకులకు సినిమా నచ్చుతుందని రివ్యూలు అంటున్నాయి. దాదాపుగా విజయ్ దేవరకొండ హిట్ కొట్టినట్లే అని చెబుతున్నారు.

స్వామివారి సేవలో

ప్రస్తుతం విజయ్ దేవరకొండ ఖుషి సినిమా సక్సెస్‍ను ఎంజాయ్ చేస్తున్నాడు. తాజాగా ఖుషి సినిమా టీమ్ యాదాద్రి లక్ష్మీ నరసింహా స్వామిని దర్శించుకుంది. ఖుషి విజయం సాధించిన నేపథ్యంలో విజయ్ దేవరకొండతోపాటు డైరెక్టర్ శివ నిర్వాణ, నిర్మాతలు నవీన్ యెర్నేని, యలమంచిలి రవి శంకర్ స్వామివారు ఆశీస్సులు తీసుకున్నారు. వీరితోపాటు విజయ్ తమ్ముడు ఆనంద్ దేవరకొండ, ఇంటి సభ్యులు సైతం స్వామివారి ఆలయాన్ని సందర్శించారు. దీనికి సంబంధించిన ఫొటోలు, వీడియోలు వైరల్ అవుతున్నాయి.

అద్భుతంగా తీర్చిదిద్దారు

అయితే విజయ్ దేవరకొండ రాకతో అభిమానులు గుంపులుగా చేరేందుకు ప్రయత్నించారు. కానీ, వారిని పోలీసులు అడ్డుకున్నారు. ఈ సందర్భంగా విజయ్ మాట్లాడుతూ "మా ఖుషి సినిమాకు ఇంత పెద్ద విజయం ఇచ్చిన ప్రేక్షకులకు థ్యాంక్స్ చెబుతున్నాం. మా సినిమాకు ఘన విజయం దక్కిన సందర్భంగా మా టీమ్ అంతా కలిసి సకుటుంబ సమేతంగా యాదాద్రి లక్ష్మి నరసింహస్వామిని దర్శించుకునేందుకు వచ్చాం. యాదాద్రి ఆలయాన్ని ప్రపంచ ప్రఖ్యాత దేవాలయంగా తీర్చిదిద్దిన తెలంగాణ ప్రభుత్వానికి ధన్యవాదాలు చెబుతున్నాం. యాదాద్రి నిర్మాణాలు, ఇక్కడ ఏర్పాటు చేసిన సౌకర్యాలు అద్భుతంగా ఉన్నాయి" అని తెలిపాడు.