Sundeep gift Aha Subscriptions: ఫ్యాన్స్‌కు సందీప్ కిషన్ అదిరిపోయే ఆఫర్.. ఆహా సబ్‌స్క్రిప్షన్లు గిఫ్ట్‌గా ఇస్తున్న హీరో

Sundeep gift Aha Subscriptions: టాలీవుడ్ యంగ్ హీరో సందీప్ కిషన్ ఇటీవలే మైఖేల్ అనే చిత్రంతో ప్రేక్షకులను పలకరించాడు. పాన్ ఇండియా రేంజ్‌లో ఫిబ్రవరి 3న విడుదలైన ఈ సినిమా మిక్స్‌డ్ టాక్ తెచ్చుకుంది. రంజిత్ జీవకోడి దర్శకత్వంలో తెరకెక్కిన ఈ మూవీలో దివ్యాంశ కౌషిక్ హీరోయిన్‌గా చేసింది. సినిమా అనుకున్న స్థాయిలో మెప్పించకపోవడంతో ఓటీటీలో సందడి చేసేందుకు సిద్ధమైంది. ప్రముఖ ఓటీటీ వేదిక ఆహా వేదికగా ఈ సినిమా విడుదల చేసేందుకు చిత్రబృందం ప్రణాళికలు సిద్ధం చేసింది.

ఆహా ప్లాట్‌ఫాంలో ఫిబ్రవరి 24 నుంచి మైఖేల్ చిత్రం స్ట్రీమింగ్ కానుంది. అంతేకాకుండా ఈ సినిమా ఓటీటీ విడుదల సందర్భంగా సందీప్ కిషన్ తన అభిమానులకు మరో ఆఫర్ కూడా ఇచ్చాడు. 2000 ఆహా సబ్‌స్క్రిప్షన్లు కానుకగా ఇస్తున్నట్లు పేర్కొన్నాడు. ఈ మేరకు పోస్టర్‌ను సోషల్ మీడియా వేదికగా విడుదల చేశాడు.

"డియర్ ఫ్యాన్స్ అండ్ ఫ్రెండ్స్ ఎల్లప్పుడు నాకు అండగా ఉన్నందుకు ధన్యవాదాలు. సినిమాపై నాకున్న ప్రేమను, ప్రయత్నాలను ఆదరించినందుకు కృతజ్ఞతలు చెప్పుకుంటున్నాను. అందుకే ఆహాలో మైఖేల్ ప్రీమియర్ సందర్భంగా 2 వేల మందికి ఆహా సబ్‌స్క్రిప్షన్లు గిఫ్ట్‌గా ఇవ్వాలనుకుంటున్నాను. ఈ శుక్రవారం మేఖేల్ ఆహా వేదికగా స్ట్రీమింగ్ కానుంది." అని సందీప్ కిషన్ పోస్టర్ విడుదల చేశాడు.

ఈ సినిమాలో సందీప్ కిషన్ సరసన దివ్యాంశ కౌషిక్ హీరోయిన్‌గా చేసింది. అంతేకాకుండా మక్కల్ సెల్వన్ విజయ్ సేతుపతి, వరలక్ష్మీ శరత్ కుమార్. వరుణ్ సందేశ్, గౌతమ్ వాసుదేవ్ మీనన్, అనసూయ భరద్వాజ్ తదితరులు ఇందులో కీలక పాత్రలు పోషించారు. గ్యాంగ్‌స్టర్ డ్రామాగా ఈ చిత్రం తెరకెక్కింది.

కరణ్ సీ ప్రొడక్షన్ల్, శ్రీ వెంకటేశ్వర సినిమాస్ పతాకంపై భరత్ చౌదరీ, పుష్కర్ రామ్ మోహన రావు ఈ చిత్రాన్ని నిర్మించారు. రంజిత్ జయకోడి ఈ సినిమాకు దర్శకత్వం వహించారు. శామ్ సీఎస్ సంగీతాన్ని సమకూర్చారు. ఫిబ్రవరి 3న ప్రపంచ వ్యాప్తంగా ప్రేక్షకుల ముందుకు వచ్చింది. పాన్ ఇండియా రేంజ్‌లో ఈ సినిమా విడుదలైంది.