Salaar | ప్రభాస్ సలార్ టీజర్ వచ్చేది ఆరోజేనా?

పాన్ఇండియా స్టార్ ప్రభాస్ ఇటీవలే రాధేశ్యామ్‌తో ప్రేక్షకుల ముందుకు వచ్చాడు. సినిమా యావరేజ్ టాక్ తెచ్చుకున్నప్పటికీ కలెక్షన్ల పరంగా మంచి రాబడులు అందుకుంది. ప్రస్తుతం డార్లింగ్ కేజీఎఫ్ ఫేమ్ ప్రశాంత్ నీల్ దర్శకత్వంలో సలార్ చిత్రంలో నటిస్తున్నాడు. ఇప్పటికే ఈ సినిమాకు సంబంధించి ప్రభాస్ లుక్, హీరోయిన్ శృతిహాసన్ స్టిల్స్ అభిమానులను ఆకట్టుకున్నాయి. ఇంతుకమించి ఈ సినిమాకు సంబంధించిన ఎలాంటి అప్డేట్లు ఇవ్వలేదు చిత్రబృందం. తాజాగా ఓ వార్త హల్‌చల్ చేస్తోంది. సలార్ టీజర్‌ను ఏప్రిల్ 14న విడుదల కాబోతుందని బాలీవుడ్ మీడియా కోడైకూస్తుంది. ఈ విషయంపై చిత్రబృందం ఎలాంటి అధికారిక ప్రకటన చేయలేదు.

ఇదే రోజు కేజీఎఫ్ ఛాప్టర్ 2 విడుదల కానుండటం గమనార్హం. ఈ రెండు చిత్రాలకు దర్శకుడు ప్రశాంత్ నీల్ కావడం వల్ల కేజీఎఫ్ 2 విడుదలయ్యే అదే రోజున సలార్ టీజర్‌ను రిలీజ్ చేయాలని మేకర్స్ భావిస్తున్నారని సమాచారం. కేజీఎఫ్ 2 ప్రింట్స్‌తో పాటు సలార్ టీజర్‌ను కూడా మిళితం చేసి థియేటర్లలో విడుదల చేయాలని ఊహాగానాలు వినిపిస్తున్నాయి.

2017లో బాహుబలి 2 విడుదల సందర్భంలోనూ ప్రభాస్ నటించిన సాహో టీజర్‌ను కలిపి విడుదల చేశారు. బాహుబలి ప్రదర్శితమైన అన్ని థియేటర్లలో ఈ టీజర్ రిలీజై పాపులారిటీని సంపాదించింది. అదే వ్యూహాన్ని ఇప్పుడు కూడా అమలు పరచాలని సలార్ చిత్రబృందం భావిస్తోందట. ఏప్రిల్ 14న ప్రపంచవ్యాప్తంగా ప్రేక్షకుల ముందుకు రానున్న కేజీఎఫ్ 2 సినిమాతో పాటు సలార్ టీజర్‌ను థియేటర్లలో ప్రదర్శించనున్నారని సమాచారం.

ఒకవేళ ఈ వార్తలు నిజమైతే ఇప్పటికే కేజీఎఫ్ 2 ప్రింట్లతో పాటు సలార్ టీజర్‌ను కూడా జత చేసి ఉండాలి. కానీ ఈ విషయంపై దర్శకుడు ప్రశాంత్ నీల్ ఇంతవరకు నోరు మెదపలేదు. అయితే కేజీఎఫ్ నిర్మాణ సంస్థ హోంబలే ఫిల్మ్స్ సలార్ టీజర్ విడుదల గురించి డిస్ట్రిబ్యూటర్లకు అప్డేట్ ఇచ్చిందట. మరి ఇది ఎంతమేరకు నిజమో తెలియాలంటే మరికొన్ని రోజులు వేచి ఉండాల్సిందే.

యాక్షన్ థ్రిల్లర్‌గా తెరకెక్కుతున్న సలార్ చిత్రంలో ప్రభాస్ టైటిల్ క్యారెక్టర్‌లో నటిస్తున్నాడు. శృతిహాసన్ హీరోయిన్‌గా చేస్తోంది. మలయాళ సూపర్‌స్టార్ పృథ్వీరాజ్ సుకుమారన్ ప్రతినాయకుడిగా నటించనున్నారు. ఇప్పటికే మూడు భారీ షెడ్యూల్స్ పూర్తి చేసుకున్న ఈ సినిమా గనుల నేపథ్యంలో తెరకెక్కున్నట్లు తెలుస్తోంది.