Premam Re Release: మూడోసారి థియేట‌ర్ల‌లో రీ రిలీజ్ - క‌లెక్ష‌న్ల‌తో దుమ్మురేపుతోన్న సాయిప‌ల్ల‌వి క‌ల్ట్ ల‌వ్‌స్టోరీ

Premam Re Release Collection: మ‌ల‌యాళం క‌ల్ట్ క్లాసిక్ ల‌వ్ స్టోరీ ప్రేమ‌మ్ రీ రిలీజ్‌లో అదిరిపోయే క‌లెక్ష‌న్స్ రాబ‌డుతోంది. ఫిబ్ర‌వ‌రి 1న కేర‌ళ‌, త‌మిళ‌నాడులో ఈ సినిమాను మ‌రోసారి థియేట‌ర్ల ద్వారా ప్రేక్ష‌కుల ముందుకు తీసుకొచ్చారు. రెండు చోట్ల ఈ మూవీ రికార్డు క‌లెక్ష‌న్స్ రాబ‌డుతోంది. ఐదు రోజుల్లోనే రెండు కోట్ల కుపైగా క‌లెక్ష‌న్స్ సొంతం చేసుకున్న‌ది. త‌మిళం, మ‌ల‌యాళంలో రీ రిలీజ్ సినిమాల్లో హ‌య్యెస్ట్ క‌లెక్ష‌న్స్ రాబ‌ట్టిన మూవీస్‌లో ఒక‌టిగా ప్రేమ‌మ్ నిలిచింది.

రీ రిలీజ్ సినిమాలు రెండు లేదా మూడు రోజులే థియేట‌ర్ల‌లో ఆడ‌టం క‌ష్టం. కానీ ప్రేమ‌మ్ మాత్రం రిలీజై ఐదు రోజులు అయినా చెన్నైలోని చాలా థియేట‌ర్ల‌లో ఆడుతోండ‌టంతో స‌ర్‌ప్రైజ్‌తో పాటు సంతోషంగా ఉంద‌ని అనుప‌మ ప‌ర‌మేశ్వ‌ర‌న్ ఇన్‌స్టాగ్రామ్‌లో పోస్ట్ పెట్టింది. ఈ పోస్ట్ వైర‌ల్ అవుతోంది. ప్ర‌స్తుతం థియేట‌ర్ల‌లో పెద్ద సినిమాలు లేక‌పోవ‌డం ప్రేమ‌మ్ రీ రిలీజ్‌కు ప్ల‌స్స‌యింది.

ప్రేమ‌మ్ రీ రిలీజ్ మూడోసారి...

ప్రేమ‌మ్ థియేట‌ర్ల‌లో రీ రిలీజ్ కావ‌డం ఇది మూడోసారి. 2016లో వాలెంటైన్స్ డే సంద‌ర్భంగా త‌మిళంలో ఈ మూవీని రీ రిలీజ్ చేశారు. 2017లో మ‌రోసారి ప్రేక్ష‌కుల ముందుకొచ్చింది. ఆరేళ్ల గ్యాప్ త‌ర్వాత రీ రిలీజ్ రూపంలో మూడోసారి థియేట‌ర్ల‌లో ప్రేమ‌మ్ విడుద‌లైంది. మూడుసార్లు రీరిలీజైన ప్రేమ‌మ్ మూవీకి ఉన్న క్రేజ్ త‌గ్గ‌లేదు.

నాలుగు కోట్ల బ‌డ్జెట్‌...75 కోట్ల క‌లెక్ష‌న్స్‌...

ప్రేమ‌మ్ మూవీకి ఆల్ఫోన్సో పుత్రేన్ ద‌ర్శ‌క‌త్వం వ‌హించాడు. మ‌ల‌యాళంలో ఈ మూవీ బాక్సాఫీస్ వ‌ద్ద రికార్డులు క్రియేట్ చేసింది. కేవ‌లం నాలుగు కోట్ల బ‌డ్జెట్‌తో కొత్త న‌టీన‌టుల‌తో ఎలాంటి అంచ‌నాలు లేకుండా విడుద‌లైన ఈ మూవీ 75 కోట్ల క‌లెక్ష‌న్స్ సాధించింది. ఈ మ‌ల‌యాళ‌ మూవీ త‌మిళ‌నాడులోని ప‌లు థియేట‌ర్ల‌లో 200 రోజుల‌కుపైగా ఆడ‌టం గ‌మ‌నార్హం.

మ‌ల‌యాళ సినీ చ‌రిత్ర‌లో టాప్ 25 సినిమాల్లో ఒక‌టిగా ప్రేమ‌మ్ నిలిచింది. ఓ యువ‌కుడి జీవితంలో మూడు ద‌శ‌ల్లో సాగిన ప్రేమాయ‌ణాన్ని ఆవిష్క‌రిస్తూ ప్రేమ‌మ్ మూవీని ఆల్సోన్సో పుత్రేన్ తెర‌కెక్కించాడు. రెండు సార్లు ల‌వ్‌లో ఫెయిలైన అత‌డు మూడోసారి త‌న ప్రేమ‌ను ఎలా గెలిపించుకున్నాడ‌న్న‌ది ఎమోష‌న‌ల్‌గా ఈ సినిమాలో చూపించారు.

ఓవ‌ర్‌నైట్‌లో స్టార్స్‌....

ప్రేమ‌మ్ మూవీతోనే సాయిప‌ల్ల‌వి, అనుప‌మ ప‌ర‌మేశ్వ‌ర‌న్ హీరోయిన్లుగా ఇండ‌స్ట్రీలోకి అడుగుపెట్టారు. ఈ సినిమాకు ముందు వారి పేర్లు ఎవ‌రికి తెలియ‌వు. ప్రేమ‌మ్ స‌క్సెస్‌తో ఓవ‌ర్‌నైట్‌లో స్టార్స్‌గా మారిపోయారు. ఇందులో లెక్చ‌ర‌ర్ సాయిప‌ల్ల‌వి న‌టించ‌గా....స్టూడెంట్ పాత్ర‌లో అనుప‌మ ప‌ర‌మేశ్వ‌ర‌న్ క‌నిపించింది. ఇద్ద‌రికి ప్రేమ‌మ్ మూవీ ఎన‌లేని పేరు తెచ్చిపెట్టింది.

ప్ర‌స్తుతం సాయిప‌ల్ల‌వి, అనుప‌మ ప‌ర‌మేశ్వ‌ర‌న్ టాలీవుడ్‌లో టాప్ హీరోయిన్లుగా కొన‌సాగుతోన్నారు. నివీన్ పాల్ కూడా ప్రేమ‌మ్ మూవీతోనే అగ్ర హీరోలు లిస్ట్‌లో అడుగుపెట్టాడు. ప్రేమ‌మ్ మూవీని తెలుగులో అదే పేరుతో రీమేక్ చేశారు. ఈ రీమేక్‌లో నాగ‌చైత‌న్య హీరోగా న‌టించాడు. చందు ముండేటి ద‌ర్శ‌క‌త్వం వ‌హించారు. మ‌ల‌యాళ మాతృక‌లో న‌టించిన అనుప‌మ ప‌ర‌మేశ్వర‌న్‌, మ‌డోన్నా సెబాస్టియ‌న్ తెలుగులో రీమేక్‌లో హీరోయిన్లుగా క‌నిపించారు. కానీ సాయిప‌ల్ల‌వి పాత్ర‌ను మాత్రం తెలుగులో శృతిహాస‌న్ చేసింది. తెలుగులో కూడా ప్రేమ‌మ్ మూవీ క‌మ‌ర్షియ‌ల్ స‌క్సెస్‌గా నిలిచింది.