OTT Weekend Watch: ఓటీటీల్లో ఈ వీకెండ్ కచ్చితంగా చూడాల్సిన సినిమాలు, వెబ్ సిరీస్ ఇవే.. తెలుగులోనే ఎనిమిది

OTT Weekend Watch: ఓటీటీలలోకి ప్రతివారం లాగే ఈ వారం కూడా ఎన్నో ఇంట్రెస్టింగ్ కొత్త సినిమాలు, వెబ్ సిరీస్ వచ్చాయి. వారం మొదటి నుంచీ ప్రతి రోజూ ఏదో ఒక సినిమా, సిరీస్ ఓటీటీలోకి అడుగుపెడుతూనే ఉంది. ఇందులో తెలుగు ప్రేక్షకుల కోసం కూడా చాలానే ఉన్నాయి. మరి వీటిలో ఇంట్రెస్టింగ్ ఏవి? ఈ వీకెండ్ ఏం చూడాలో ఇక్కడ చూసేయండి.

ఓటీటీ వీకెండ్ వాచ్

ఈ వీకెండ్ ఏ ఓటీటీలో ఏం చూడొచ్చు? కొత్తగా ఏ ఓటీటీలో ఏం రిలీజ్ అయ్యాయో ఇక్కడ పూర్తి జాబితా ఉంది. అందులో నుంచి మీకు ఆసక్తిగా అనిపించినవి వీకెండ్ చూడండి.

ఆహా వీడియో ఓటీటీ

ఆహా వీడియో ఓటీటీలోకి ఈ వారం రెండు కొత్త సినిమాలు వచ్చాయి. అందులో ఒకటి ఇప్పటికే స్ట్రీమింగ్ అవుతోంది. ఆ మూవీ పేరు లిటిల్ హార్ట్స్. ఇదొక మలయాళ రొమాంటిక్ కామెడీ మూవీ. ఈ సినిమా శుక్రవారం (అక్టోబర్ 25) నుంచి స్ట్రీమింగ్ అవుతోంది.

ఇక శనివారం (అక్టోబర్ 26) అదా శర్మ నటించిన క్రిమినల్ ఆర్ డెవిల్ అనే క్రైమ్ థ్రిల్లర్ మూవీ కూడా ఆహా వీడియోలోకి రాబోతోంది. ఈ సినిమాలే కాకుండా బాలకృష్ణ హోస్ట్ గా అన్‌స్టాపబుల్ విత్ ఎన్‌బీకే సీజన్ 4 తొలి ఎపిసోడ్ శుక్రవారం (అక్టోబర్ 25) రాత్రి 8.30 గంటలకు స్ట్రీమింగ్ కానుంది. చంద్రబాబుతో బాలయ్య చేసే హంగామా చూడొచ్చు.

అమెజాన్ ప్రైమ్ వీడియో

అమెజాన్ ప్రైమ్ వీడియోలోకి శుక్రవారం (అక్టోబర్ 25) తెలుగు కామెడీ థ్రిల్లర్ మూవీ స్వాగ్ స్ట్రీమింగ్ కు వచ్చింది. శ్రీవిష్ణు నటించిన ఈ సినిమాకు థియేటర్లలో మంచి రెస్పాన్స్ వచ్చింది. ఇది కాకుండా తమిళ సినిమా కడైసీ ఉలగ పొర్ మూవీ, హిందీ మూవీ జ్విగాటో కూడా ప్రైమ్ వీడియోలో స్ట్రీమింగ్ కు వచ్చాయి.

నెట్‌ఫ్లిక్స్‌లో లేటెస్ట్ రిలీజెస్

నెట్‌ఫ్లిక్స్ లో చూడాల్సినవి చాలానే ఉన్నాయి. ఇందులో తమిళ బ్లాక్ బస్టర్ మూవీ మేయళగన్ కూడా ఒకటి. తెలుగులో సత్యం సుందరం పేరుతో వచ్చిన ఈ సినిమాలో కార్తీ, అరవింద్ స్వామి నటించారు. తెలుగు, తమిళం, హిందీ, కన్నడ, మలయాళం భాషల్లో స్ట్రీమింగ్ అవుతోంది.

ఇక నేరుగా నెట్‌ఫ్లిక్స్ లోకి వచ్చిన మరో హిందీ మూవీ దో పత్తీ. ఈ సినిమా తెలుగులోనూ స్ట్రీమింగ్ అవుతోంది. కాజోల్, కృతి సనన్ నటించిన మూవీ ఇది. ఇక కొరియన్ వెబ్ సిరీస్ హెల్‌బౌండ్ సీజన్ 2 కొరియన్ తోపాటు హిందీ, ఇంగ్లిష్ లలో స్ట్రీమింగ్ అవుతోంది.

జీ5 ఓటీటీలో చూడాల్సినవి

జీ5 ఓటీటీలోనూ ఈ వారం కొన్ని ఇంట్రెస్టింగ్ మూవీస్, వెబ్ సిరీస్ వచ్చాయి. అందులో తమిళ వెబ్ సిరీస్ ఐందమ్ వేదమ్ ఒకటి. ఇది తెలుగులోనూ స్ట్రీమింగ్ అవుతున్న మైథలాజికల్ థ్రిల్లర్ మూవీ. ఇది కాకుండా హిందీ మూవీ ఆయె జిందగీ, మరాఠీ మూవీ ధర్మవీర్ 2 కూడా జీ5 ఓటీటీలో స్ట్రీమింగ్ కు వచ్చాయి.

జియో సినిమా ఓటీటీ విషయానికి వస్తే హిందీ సినిమాలు ది మిరండా బ్రదర్స్, మిర్గ్ సినిమాలు స్ట్రీమింగ్ అవుతున్నాయి. ఇక సన్ నెక్ట్స్ ఓటీటీలో ఆరంభం అనే తెలుగు మూవీ వచ్చింది. ఇది ఇప్పటికే ఈటీవీ విన్ ఓటీటీలో స్ట్రీమింగ్ అవుతుండగా.. ఇప్పుడు మరో ఓటీటీలోకి అడుగుపెట్టింది. డిస్నీ ప్లస్ హాట్‌స్టార్ లో ది లెజెండ్ ఆఫ్ హనుమాన్ సీజన్ 5 కూడా తెలుగు సహా ఏడు భాషల్లో స్ట్రీమింగ్ అవుతోంది.