BJP Manifesto : తెలంగాణ బీజేపీ మేనిఫెస్టో రెడీ, ఈ నెల 17న విడుదల చేయనున్న అమిత్ షా

BJP Manifesto : తెలంగాణ బీజేపీ ఎన్నికల మేనిఫెస్టో విడుదలకు ముహూర్తం ఖరారు అయింది. ఈనెల 17వ తేదీన బీజేపీ అగ్రనేత ,కేంద్ర హోంశాఖ మంత్రి అమిత్ షా తెలంగాణ పర్యటనకు రానున్నారు. అదే రోజు అమిత్ షా బీజేపీ మేనిఫెస్టో ప్రకటించనున్నారు. సోమాజిగూడలోని బీజేపీ మీడియా సెంటర్ లో అమిత్ షా మేనిఫెస్టోను విడుదల చేయనున్నట్లు పార్టీ వర్గాలు వెల్లడించాయి.

ఒకేరోజు 4 బహిరంగ సభలు

తెలంగాణలో అమిత్ షా సుడిగాలి పర్యటనలు చేయనున్నారు. ఎన్నికలు సమీపిస్తండటంతో ప్రచారాన్ని ముమ్మరం చేసేందుకు సిద్ధం అయ్యారు బీజేపీ అగ్రనేతలు. అమిత్ షా 17న ఒకేరోజు నాలుగు సభల్లో పాల్గొంటారు. నల్గొండ, వరంగల్, గద్వాల్, రాజేంద్రనగర్ లో జరిగే బహిరంగ సభలలో అమిత్ షా పాల్గొంటారు.

అదే రోజు రాష్ట్రానికి రాహుల్ గాంధీ

అసెంబ్లీ ఎన్నికల ప్రచారంలో భాగంగా కాంగ్రెస్ పార్టీ అగ్రనేత రాహుల్ గాంధీ నవంబర్ 17న తెలంగాణకు రానున్నారు. అదే రోజున పాలకుర్తి, వరంగల్, భువనగిరిలో నిర్వహించనున్న బహిరంగ సభలలో రాహుల్ గాంధీ పాల్గొంటారు. తెలంగాణలో రాహుల్ గాంధీ ఆరు రోజుల పాటు ప్రచారం చేయనున్నారు. ఇక ఒకే రోజు వేర్వేరు ప్రాంతాల్లో రాహుల్ గాంధీ, ప్రియాంక గాంధీ, మల్లిఖార్జున ఖర్గే ప్రచారం చేస్తారని పార్టీ వర్గాలు వెల్లడించాయి. ఒకట్రెండు రోజుల్లో ప్రియాంక గాంధీ, ఖర్గే ప్రచార షెడ్యూల్ పై స్పష్టత వచ్చే అవకాశం ఉంది. ప్రతీ నియోజకవర్గంలో పార్టీ అగ్రనేతల ప్రచారం ఉండేలా షెడ్యూల్ రూపొందిస్తున్నారు. ఇక అదే రోజు సీఎం కేసీఆర్, పరకాల, హుజూరాబాద్ ,కరీంనగర్, చొప్పదండి సభల్లో పాల్గొంటారు. మొత్తానికి మూడు ప్రధాన పార్టీల అగ్రనేతల ప్రచారంతో ఎన్నికల హీట్ మరింత పెరగనుంది.

రిపోర్టింగ్ : కేతిరెడ్డి తరుణ్, హైదరాబాద్