Tata Motors price hike : కస్టమర్లకు టాటా మోటార్స్​ షాక్​.. భారీగా పెరగనున్న వాహనాల ధరలు!

Tata Motors price hike : పండుగ సీజన్​పై భారతీయులు భారీ ఆశలే పెట్టుకుంటారు. ఈ సమయంలో ఆటోమొబైల్​ సంస్థలు ఆకర్షణీయమైన డిస్కౌంట్స్​ ఇస్తే, వాటితో లబ్ధిపొంది, సొంత వాహనాలు కొనుక్కోవాలని చూస్తుంటారు. అలాంటిది.. ఈ పండుగ సీజన్​లో కస్టమర్లకు భారీ షాక్​ ఇచ్చింది దేశీయ దిగ్గజ ఆటోమొబైల్​ సంస్థ టాటా మోటార్స్​. వాహనాల ధరలను పెంచుతున్నట్టు ప్రకటించింది.

3శాతం పెంపు..!

కమర్షియల్​ వాహనాల ధరలను 3శాతం వరకు పెంచుతున్నట్టు తాజాగా ప్రకటన చేసింది టాటా మోటార్స్​. తాజా పెంపు అక్టోబర్​ 1 నుంచి అమల్లోకి వస్తుందని వెల్లడించింది. వాహనాలపై ప్రైజ్​ హైక్​ తీసుకోవడం.. ఈ ఏడాదిలో సంస్థకు ఇది మూడోసారి. ధరల పెంపుపై ఈసారి కూడా ఎప్పుడూ చెప్పే మాటలే చెప్పింది. ముడిసరకు ధరలు పెరగడంతో.. వాహనాల రేట్లు పెంచక తప్పట్లేదని స్పష్టం చేసింది.

ఈ ఏడాది జనవరిలో 1.2శాతం, మార్చ్​లో 5శాతం వరకు వాహనాల రేట్లను పెంచింది టాటా మోటార్స్​. ఇక ఇప్పుడు 3శాతం ప్రైజ్​ హైక్​ తీసుకుంది. అయితే ఇది కేవలం కమర్షియల్​ వాహనాలపై మాత్రమే అని తెలుస్తోంది. ప్యాసింజర్​ వాహనాలకు సంబంధించి ఈసారి సంస్థ ఎలాంటి వివరాలు ఇవ్వలేదు. మరి పీవీ సెగ్మెంట్​లో రేట్​ హైక్​ ఉంటుందా? లేదా? అన్నది చూడాలి.

ఇదీ చూడండి:- Tata Nexon vs Kia Seltos : 2023 టాటా నెక్సాన్​ వర్సెస్ కియా​ సెల్టోస్​ ఫేస్​లిఫ్ట్​- ఏది బెస్ట్​?

ప్రజలపై అధిక భారం..!

Tata Motors latest news : టాటా మోటార్స్​తో పాటు అనేక ఆటోమొబైల్​ సంస్థలు గత కొన్నేళ్లుగా తమ వాహనాల ధరలను పెంచుతూ వెళ్లిపోతున్నాయి. అయినప్పటికీ, కస్టమర్ల నుంచి విపరీతంగా డిమాండ్​ వస్తుండటంతో ధరల పెంపునకు సంస్థలు ఇంకా ధైర్యం చేయగలుగుతున్నాయి. అయితే.. ఈసారి ఇండియాలో కమర్షియల్​ వాహనాల సేల్స్​ తగ్గుతాయని రేటింగ్​ ఏజెన్సీ ఫిచ్​ వెల్లడించింది. సింగిల్​ డిజిట్​ గ్రోత్​ నమోదయ్యే అవకాశం ఉందని అభిప్రాయపడింది. కస్టమర్లపై విపరీతంగా భారం పడుతుండటమే ఇందుకు కారణం అని పేర్కొంది.