Wimbledon 2023 Final: నేడే వింబుల్డన్ పురుషుల ఫైనల్.. విజేత, రన్నరప్‍కు ప్రైజ్‍మనీ ఎంతో తెలుసా!

Wimbledon 2023 Final Prize Money: ప్రతిష్టాత్మక టెన్నిస్ గ్రాండ్‍స్లామ్ టోర్నీలో నేడు (జూలై 16) మెగా ఫైట్ జరగనుంది. ప్రపంచ టాప్-2 ప్లేయర్ల మధ్య పురుషుల సింగిల్స్ ఫైనల్ జరగనుంది. స్టార్ ప్లేయర్, ప్రపంచ నంబర్ వన్ ర్యాంకర్ నొవాక్ జకోవిచ్, కార్లోస్ అల్కరజ్ ఫైనల్‍లో తలపడనున్నారు. వరుసగా ఐదోసారి.. మొత్తంగా ఎనిమిదోసారి వింబుల్డన్ టైటిల్ గెలవాలని జకోవిచ్ భావిస్తున్నాడు. రెండో గ్రాండ్‍స్లామ్ టైటిల్ సాధించాలని రెండో ర్యాంకర్ అల్కరజ్ పట్టుదలగా ఉన్నాడు. వీరిద్దరి మధ్య ఫైనల్ పోరు కోసం అందరూ ఆసక్తిగా ఎదురుచూస్తున్నారు. భారత కాలమానం ప్రకారం నేటి (జూలై 16) సాయంత్రం 6.30 గంటలకు ఈ తుదిపోరు మొదలుకానుంది. కాగా, వింబుల్డన్ టైటిల్ విజేతకు, రన్నరప్‍కు ఎంత ప్రైజ్‍మనీ దక్కుతుందో ఇక్కడ తెలుసుకోండి.

వింబుల్డన్ పురుషుల సింగిల్స్ గెలిచిన ప్లేయర్‌కు 2.35 మిలియన్ పౌండ్ల (సుమారు రూ.25కోట్లు) ప్రైజ్‍మనీ దక్కుతుంది. 2019తో పోలిస్తే ఈ ప్రైజ్‍మనీ 11శాతం పెరిగింది. ఇక ఫైనల్‍లో ఓడి రన్నరప్‍గా నిలిచే ప్లేయర్‌కు 1.17 మిలియన్ పౌండ్ల (సుమారు రూ.12 కోట్లు) ప్రైజ్‍మనీ దక్కుతుంది.

పురుషుల టెన్నిస్‍లో అత్యధిక గ్రాండ్‍స్లామ్ టైటిళ్లు (23) సాధించిన ఆటగాడిగా సెర్బియా స్టార్ నొవాక్ జకోవిచ్ ఉన్నాడు. ఈ ఏడాది రఫెల్ నాదల్‍ను అతడు అధిగమించి చరిత్ర సృష్టించాడు. మరోవైపు, స్పెయిన్ యువ స్టార్ అల్కరజ్ రెండేళ్లుగా అదరగొడుతున్నాడు. గతేడాది యూఎస్ ఓపెన్ కూడా గెలిచాడు. దీంతో నేడు జరిగే వింబుల్డన్ ఫైనల్‍పై అందరి ఆసక్తి నెలకొని ఉంది.

భారత కాలమానం ప్రకారం నేటి (జూలై 16) సాయంత్రం 6.30 గంటలకు వింబుల్డన్ పురుషుల సింగిల్స్ ఫైనల్ మొదలుకానుంది. లండన్‍లోని సెంటర్ కోర్ట్‌లో జకొవిచ్, అల్కరజ్ తలపడనున్నారు. స్టార్ స్పోర్ట్స్ నెట్‍వర్క్ ఛానళ్లలో ఈ మ్యాచ్ లైవ్ చూడొచ్చు. అలాగే, డిజిటల్‍గా అయితే డిస్నీ+హాట్‍స్టార్ ఓటీటీలో లైవ్ స్ట్రీమింగ్ వీక్షించవచ్చు.