Anupam Kher at PV Sindhu Home: పీవీ సింధు ఇంటికి అనుపమ్‌ ఖేర్‌.. ట్రోఫీలు చూసి షాక్‌

Anupam Kher at PV Sindhu Home: బాలీవుడ్‌ నటుడు అనుపమ్‌ ఖేర్‌ హైదరాబాద్‌లోని బ్యాడ్మింటన్‌ స్టార్‌ పీవీ సింధు ఇంటికి వెళ్లాడు. ఈ సందర్భంగా ఆమె కొన్నేళ్లుగా సాధించిన ట్రోఫీలు చూసి షాక్ తిన్నాడు. తాను సింధు ఇంటికి వెళ్లిన విషయాన్ని అనుపమే వెల్లడించాడు. అంతేకాదు ఆమె ఇంట్లో తాను కలియతిరుగుతున్న వీడియోను కూడా షేర్‌ చేశాడు.

అనుపమ్‌ ఖేర్‌ తన ఇన్‌స్టాగ్రామ్‌ రీల్స్‌లో ఈ వీడియోను అభిమానులతో పంచుకున్నాడు. 67 ఏళ్ల అనుపమ్‌ ఖేర్‌ ఈ మధ్యే సింధు ఇంటికి వెళ్లాడు. ఈ సందర్భంగా ఆమె ఇంట్లో పదుల సంఖ్యలో ఉన్న ట్రోఫీలు అతన్ని ఆశ్చర్యపరిచాయి. సింధు అండర్‌ 16 టోర్నీల్లో గెలిచినప్పటి ట్రోఫీల నుంచి ఒలింపిక్ మెడల్స్‌ వరకూ అన్నీ ఉన్నాయి.

తన ట్రోఫీలు, మెడల్స్‌ను సింధు అతనికి ప్రత్యేకంగా చూపించింది. ఈ సందర్భంగా ఆమెను మెచ్చుకుంటూ అనుపమ్‌ చేసిన కామెంట్స్‌ వైరల్ అయ్యాయి. "వన్‌ అండ్‌ ఓన్లీ ఛాంపియన్‌. ఈ గోడ చూడండి. నా ఇంట్లో నా దగ్గర ఉన్న అవార్డులు చూసి నా గోడపై చాలా ఎక్కువ ఉన్నాయని అనుకునే వాడిని. కానీ ఇక్కడ చూడండి. అద్భుతం. ఇక్కడ అసలు స్థలమే లేదు" అని అనుపమ్‌ అన్నాడు.

ఇక సింధు ఇంటికి వెళ్లిన సందర్భంగా ఆమె తండ్రితోనూ అనుపమ్‌ మాట్లాడాడు. సింధు గెలుస్తున్న ట్రోఫీలు పెట్టడానికి స్థలం సరిపోవడం లేదని, అందుకే ఇంకో అంతస్తు కట్టాలని అనుకుంటున్నట్లు సింధు తండ్రి చెప్పడం విశేషం. ఆమె ఇంటికి వెళ్లడం చాలా సంతోషంగా ఉందన్న అనుపమ్‌.. ఈ వీడియోను పోస్ట్‌ చేస్తూ తాను ఎలాంటి అనుభూతి చెందాడో వివరించాడు.

"ఇది అద్భుతం. ఈ మధ్యే నేను ఛాంపియన్‌ పీవీ సింధు ఇంటికి వెళ్లాను. ఆమె తాను సాధించిన ట్రోఫీలను చూపించింది. 8 ఏళ్ల వయసు ఉన్నప్పటి నుంచీ అందులో ఉన్నాయి. ఆమె అవార్డులు, ట్రోఫీలు, ఆమె వినయం చూసి బౌల్డయ్యాను. ఆమె మన ఇండియా కూతురు. ఆమె మనను మోటివేట్‌ చేసే హీరో. జై హో జై హింద్‌" అనే క్యాప్షన్‌తో ఈ వీడియో పోస్ట్‌ చేశాడు.

అటు సింధు కూడా అనుపమ్‌ ఖేర్‌తో దిగిన ఫొటోను షేర్‌ చేసింది. అతన్ని కలవడం గొప్ప గౌరవంగా భావిస్తున్నట్లు చెప్పింది.