IPL 2024: ఐపీఎల్ తొలి దశలో సన్‍రైజర్స్ హైదరాబాద్ 4 మ్యాచ్‍లు ఇవే.. తేదీలు, వేదిక, టైమ్ వివరాలివే

ఐపీఎల్ 2024 టోర్నీ మార్చి 22వ తేదీన మొదలుకానుంది. చెన్నై వేదికగా తొలి మ్యాచ్‍లో చెన్నై సూపర్ కింగ్స్, బెంగళూరు రాయల్ ఛాలెంజర్స్ తలపడనున్నాయి. ఈ ఏడాది తొలి దశ షెడ్యూల్‍ను బీసీసీఐ నేడు (ఫిబ్రవరి 22) ప్రకటించింది. ఈ ఏడాది ఐపీఎల్‍లో మార్చి 23న పోరు ప్రారంభించనుంది సన్‍రైజర్స్ హైదరాబాద్ (SRH).

ఐపీఎల్ 2024 తొలి దశలో సన్‍రైజర్స్ హైదరాబాద్ నాలుగు మ్యాచ్‍లు ఆడనుంది. ఇందులో రెండు మ్యాచ్‍లు హోం గ్రౌండ్‍ ఉప్పల్‍ స్టేడియంలో ఆడనుంది.

ఐపీఎల్ 2024లో మార్చి 23వ తేదీన కోల్‍కతా నైట్ రైజర్స్ జట్టుతో సన్‍రైజర్స్ హైదరాబాద్ తలపడనుంది. కోల్‍కతా వేదికగా ఆరోజు రాత్రి 7:30 గంటలకు ఈ మ్యాచ్ మొదలవుతుంది. 

మార్చి 27వ తేదీన హైదరాబాద్ వేదికగా ముంబై ఇండియన్స్ జట్టుతో ఎస్‍ఆర్‌హెచ్ తలపడనుంది. ఈ మ్యాచ్ రాత్రి 7:30 గంటలకు మొదలవుతుంది. మార్చి 31వ తేదీన గుజరాత్ టైటాన్స్ జట్టుతో అహ్మదాబాద్ వేదికగా మ్యాచ్ ఆడనుంది సన్‍రైజర్స్. ఈ మ్యాచ్ మధ్యాహ్నం 3:30 గంటలకు షురూ అవుతుంది. 

సన్‍రైజర్స్ హైదరాబాద్, చెన్నై సూపర్ కింగ్స్ మధ్య ఏప్రిల్ 5వ తేదీన మ్యాచ్ జరగనుంది. హైదరాబాద్ వేదికగా ఆరోజున రాత్రి 7:30 గంటలకు ఈ మ్యాచ్ ప్రారంభమవుతుంది. 

సన్‍రైజర్స్ హైదరాబాద్ జట్టుకు దక్షిణాఫ్రికా స్టార్ ఐడెన్ మార్క్‌రమ్ కెప్టెన్‍గా ఉన్నాడు. అయితే, ఈ సీజన్ కోసం జరిగిన వేలంలో రూ.20.50కోట్ల కళ్లు చెదిరే ధరతో ఆస్ట్రేలియా కెప్టెన్ ప్యాట్ కమిన్స్‌ను ఎస్ఆర్‌హెచ్ దక్కించుకుంది. మొత్తంగా హైదరాబాద్ జట్టులో 25 మంది ఆటగాళ్లు (8 మంది విదేశీ ప్లేయర్లు) ఉన్నారు. 

ఈ ఏడాది లోక్‍సభ ఎన్నికలు ఉండటంతో ఐపీఎల్ 2024 షెడ్యూల్‍ను రెండు దశలుగా ప్రకటించాలని బీసీసీఐ నిర్ణయించింది. నేడు ప్రకటించిన తొలి షెడ్యూల్‍లో 21 మ్యాచ్‍లను ప్రకటించింది. మరికొద్ది రోజుల్లో తదుపరి షెడ్యూల్‍ను వెల్లడించనుంది.