TS AP Weather Updates : ఏపీ, తెలంగాణలో చల్లబడిన వాతావరణం - ద్రోణి ప్రభావంతో ఆ తేదీ వరకు వర్షాలు...!

ఏపీ, తెలంగాణలో వాతావరణం ఒక్కసారిగా మారిపోయింది. పలు జిల్లాల్లో వర్షాలు కురుస్తున్నాయి. దీంతో ఉష్ణోగ్రతలు దిగివచ్చాయి. 

తెలంగాణలో మరో ఐదు రోజుల పాటు ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. ఈ మేరకు పలు జిల్లాలకు ఎల్లో హెచ్చరికలను జారీ చేసింది.

మే 17వ తేదీ నుంచి మే 18 ఉదయం 08. 30 గంటల వరకు చూస్తే.... ఆసిఫాబాద్,మంచిర్యాల, భూపాలపల్లి, ములుగు, కొత్తగూడెం, వరంగల్, హన్మకొండ, నాగర్ కర్నూలు జిల్లాల్లో అక్కడక్కడ భారీ వర్షాలు కురిసే అవకాశం ఉంది. 

ఆసిఫాబాద్, పెద్దపల్లి, జయశంకర్, ములుగు, ఖమ్మం,నల్గొండ, మహబూబాబాద్, వరంగల్, హన్మకొండ,జనగాం, భువనగిరి, రంగారెడ్డి, నాగర్ కర్నూలు, వనపర్తి జిల్లాలోని పలు ప్రాంతాల్లో అక్కడకక్కడ ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది.

తెలంగాణలో మే 24వ తేదీ వరకు తేలికపాటి నుంచి మోస్తారు వర్షాలు కురిసే అవకాశం ఉందని హైదరాబాద్ వాతావరణ కేంద్రం అంచనా వేసింది.

ద్రోణి ప్రభావంతో మే 20వ తేదీ వరకు ఏపీలోని ఉత్తర, దక్షిణ కోస్తాతో పాటు రాయలసీమ జిల్లాల్లోనూ భారీ వర్షాలు కురిసే అవకాశం ఉందని ఐఎండీ పేర్కొంది.