TG Ration Supply : మీకు రేషన్ కార్డు ఉందా.. అయితే గుడ్‌న్యూస్!

మంత్రి పొంగులేటి శ్రీనివాస్ రెడ్డి తెలంగాణ ప్రజలకు శుభవార్త చెప్పారు. ఇందిరమ్మ ఇళ్లు, ఫ్యామిలీ డిజిటల్ కార్డులు, రేషన్ షాపు ద్వారా సన్న బియ్యం సరఫరా గురించి కీలక ప్రకటన చేశారు.

తెలంగాణలో జనవరి నుంచి రేషన్ షాపుల ద్వారా సన్న బియ్యం సరఫరా చేయనున్నట్టు మంత్రి పొంగులేటి ప్రకటించారు. ఫ్యామిలీ డిజిటల్ కార్డు ద్వారా.. ప్రభుత్వ సంక్షేమ పథకాల అమలు చేస్తామని.. ఈ కార్డులను త్వరలోనే జారీ చేస్తామని వివరించారు.

ఇందిరమ్మ ఇళ్లకు సంబంధించి కూడా మంత్రి పొంగులేటి కీలక సూచనలు చేశారు. ఇందిరమ్మ ఇళ్ల కోసం నిరుపేదలనే ఎంపిక చేయాలని స్పష్టం చేశారు.

గ్రామాల్లో ప్రాధాన్యత క్రమంలో.. అభివృద్ధి పనుల ప్రతిపాదనలు అందించాలని మంత్రి పొంగులేటి సూచించారు. ప్రతి రైతుకు 2 లక్షల రుణ మాఫీ తప్పనిసరిగా చేస్తామని భరోసా ఇచ్చారు.

ఖమ్మం రూరల్ మండలంలో ఉన్న సమస్యల పరిష్కారానికి తీసుకోవాల్సిన చర్యలు, అభివృద్ధి కార్యక్రమాలపై అధికారులు, ప్రజా ప్రతినిధులతో మంత్రి పొంగులేటి సమీక్షించారు.