Asian Champions Trophy: ఫైనల్‍కు దూసుకెళ్లిన భారత్.. సెమీస్‍లో అదిరే విజయం.. టైటిల్ పోరు ఎప్పుడంటే..

ఆసియా చాంపియన్స్ ట్రోఫీ హాకీ టోర్నీలో భారత్ దుమ్మురేపుతోంది. అదిరే ఆటతో ఘన విజయాలు సాధిస్తూ ఫైనల్‍కు దూసుకెళ్లింది. చైనాలోని మోకీ వేదికగా నేడు (సెప్టెంబర్ 16) జరిగిన సెమీఫైనల్‍లో దక్షిణ కొరియాపై టీమిండియా విజయం సాధించింది. 

సెమీస్‍లో భారత్ 4-1 తేడాతో కొరియాపై ఘన విజయం సాధించింది. ఆరంభం నుంచి దూకుడుగా ఆడింది. మ్యాచ్ మొత్తం ఆధిపత్యం ప్రదర్శించి గెలిచింది.

ఈ మ్యాచ్ 13వ నిమిషంలోనే ఉత్తమ్ సింగ్ గోల్ బాదాడు. దీంతో భారత్ ఖాతా తెరిచింది. ఆ తర్వాత 19వ నిమిషంలో హర్మన్ ప్రీత్ సింగ్ గోల్ సాధించాడు. దీంతో తొలి అర్ధ భాగం ముగిసే సరికి భారత్ 2-0 ఆధిక్యంలోకి దూసుకెళ్లింది. 

జర్మన్‍ప్రీత్ సింగ్ 32వ నిమిషంలో గోల్ బాదాడు. అయితే, ఆ తర్వాతి నిమిషంలోనే కొరియా ప్లేయర్ జిహూన్ యాంగ్ గోల్ చేశాడు. ఆ తర్వాత ఇరు జట్లు హోరాహోరీగా ఆడాయి. భారత ప్లేయర్ హర్మన్ ప్రీత్ సింగ్ 45వ నిమిషంలో మరో గోల్ చేశాడు. దీంతో స్కోరు 4-1కు చేరింది. చివరి వరకు ఆధిపత్యాన్ని నిలుపుకొని విజయం సాధించింది భారత్. 

ఆసియా చాంపియన్స్ ట్రోఫీ ఫైనల్‍లో చైనాతో భారత్ తలపడనుంది. ఈ టైటిల్ పోరు రేపు (సెప్టెంబర్ 17) మధ్యాహ్నం 3.30 గంటలకు మొదలుకానుంది.