Russia Ukraine war| శాంతి చర్చలు సక్సెస్​.. యుద్ధానికి ముగింపు పడినట్టేనా?

Russia Ukraine talks | రష్యా ఉక్రెయిన్​ యుద్ధం ముగింపునకు బీజం పడినట్టు కనిపిస్తోంది. ఇస్తాంబుల్​ వేదికగా జరిగిన రష్యా ఉక్రెయిన్​ చర్చలు ఫలప్రదమైనట్టు సమాచారం. ఈ క్రమంలో ఉక్రెయిన్​ రాజధాని కీవ్​ సహా పలు ప్రాంతాల నుంచి సైనిక కార్యకలాపాలను వెనక్కి తీసుకునేందుకు రష్యా అంగీకరించింది. ఈ విషయాన్ని రష్యా డిప్యూటీ రక్షణమంత్రి అలెగ్జాండర్​ ఫామిన్​ వెల్లడించారు.

మంగళవారం జరిగిన రష్యా ఉక్రెయిన్​ చర్చలు అర్థవంతంగా సాగినట్టు మధ్యవర్తి వ్లాదిమిర్​ మెడిన్​స్కీ వెల్లడించారు. అన్ని సవ్యంగా సాగితే.. రష్యా అధ్యక్షుడు పుతిన్​.. ఉక్రెయిన్​ అధ్యక్షుడు జెలెన్​స్కీని కలిసే అవకాశం ఉందని కూడా వెల్లడించారు. అందువల్ల శాంతి ఒప్పందం కుదుర్చుకునేందుకు ఇరు దేశాలు త్వరితగతిన చర్యలు చేపట్టాలని అభిప్రాయపడ్డారు.

ఉక్రెయిన్​ అధికారులు సైతం పుతిన్​- జెలెన్​స్కీ భేటీపై ఆశాభావం వ్యక్తం చేశారు. 'అధ్యక్షుల స్థాయి సమావేశం జరగడానికి.. ఈరోజు భేటీతో వచ్చిన ఫలితాలు చాలు,' అని ఉక్రెయిన్​ అధికారి డేవిడ్​ అరాఖా​మియ వెల్లడించారు.

యుద్ధ విచ్ఛిన ఉక్రెయిన్​లో మానవతా సంక్షోభంపై ఈ భేటీలో అధికంగా చర్చించినట్టు సమాచారం. ఎవరిపైనా ఆధారపడకుండా.. ఉక్రెయిన్​ తటస్థ దేశంగా ఉండాలన్న రష్యా డిమాండ్​ సైతం చర్చకు వచ్చినట్టు తెలుస్తోంది. మరోవైపు తమ దేశానికి భద్రత కల్పించే విధంగా అంతర్జాతీయ స్థాయి ఒప్పందం జరగాలని ఉక్రెయిన్​ డిమాండ్​ చేసినట్టు సంబంధిత వర్గాలు తెలిపాయి.

అణ్వాయుధాలపై స్పష్టత..

ఉక్రెయిన్​ మీద అణ్వాయుధాల ప్రయోగంపై రష్యా ఎట్టకేలకు స్పష్టతనిచ్చింది. ఉక్రెయిన్​పై అణ్వాయుధాలు ప్రయోగించాలని తాము అనుకోవడం లేదని పేర్కొంది. కాగా.. తమ దేశానికి ముప్పు వాటిల్లితే మాత్రం అణ్వాయుధాల గురించి ఆలోచించాల్సి వస్తుందని తెలిపింది.

రష్యా ఉక్రెయిన్​ యుద్ధం వేళ అణ్వాస్త్రాల గురించి పుతిన్​ పలుమార్లు మాట్లాడారు. ఓ సందర్భంలో.. ఏకంగా ఆయుధాలను సిద్ధం చేయాలని అధికారులకు ఆదేశించారు. అందువల్ల.. ఉక్రెయిన్​పై పుతిన్​ ఆణ్వస్త్రాలను ప్రయోగిస్తారా? అన్న అనుమానాలు రేకెత్తాయి. తాజాగా.. అలాంటి ఉద్దేశం లేదని రష్యా చెప్పడంతో ప్రపంచ దేశాలు ఊపిరిపీల్చుకున్నాయి.