Republic Day 2022 | ఘనంగా 'రిపబ్లిక్ డే' వేడుకలు.. మువ్వన్నెల జెండా రెపరెపలు
73rd Republic Day news | దేశంలో 73వ గణతంత్ర వేడుకలు ఘనంగా జరుగుతున్నాయి. వివిధ రాష్ట్రాల ముఖ్యమంత్రులు జెండా వందనం కార్యక్రమాల్లో పాల్గొన్నారు. అటు జవాన్లు సైతం రిపబ్లిక్ డే వేడుకలు నిర్వహించారు. లద్దాఖ్, ఉత్తరాఖండ్లో.. ఎముకలు కొరికే చలిలో జాతీయ జెండాను ఆవిష్కరించి దేశభక్తిని చాటిచెప్పారు.
దేశవ్యాప్తంగా రిపబ్లిక్ డే వేడుకలు ఘనంగా జరుగుతున్నాయి. 73వ గణతంత్ర దినోత్సవాన్ని పురస్కరించుకుని ఢిల్లీలో ఉదయం 10:30 గంటలకు రిపబ్లిక్ డే పరేడ్ జరగనుంది. ఇందులో ప్రధానమంత్రి నరేంద్ర మోదీతో సహా పలువురు ప్రముఖులు పాల్గొననున్నారు. కాగా రాష్ట్రాల్లో ఇప్పటికే గణతంత్ర వేడుకలు మొదలయ్యాయి. ప్రభుత్వ కార్యాలయాలు, పార్టీ ఆఫీసుల్లో మువ్వన్నెల జెండా రెపరెపలాడుతోంది.
చెన్నైలో నిర్వహించిన గణతంత్ర వేడుకల్లో.. తమిళనాడు గవర్నర్ ఆర్ఎన్ రవి, ముఖ్యమంత్రి ఎమ్కే స్టాలిన్ పాల్గొన్నారు. అనంతరం పలువురు పౌరులు, అధికారులకు పురస్కారాలు అందజేశారు.
బిహార్ సీఎం నితీశ్ కుమార్.. పాట్నాలో త్రివర్ణ పతాకాన్ని ఆవిష్కరించారు. అనంతరం ప్రజలకు రిపబ్లిక్ డే శుభాకాంక్షలు తెలియజేశారు.
ఒడిశా సీఎం నవీన్ పట్నాయక్.. భువనేశ్వర్లో జరిగిన జెండా వందనం కార్యక్రమంలో పాల్గొన్నారు. రాజస్థాన్ ముఖ్యమంత్రి అశోక్ గహ్లోత్.. జైపూర్లోని ప్రభుత్వ కార్యాలయంలో జాతీయ జెండాను ఆవిష్కరించారు.
బీజేపీ జాతీయ అధ్యక్షుడు జేపీ నడ్డా.. ఢిల్లీలోని పార్టీ ప్రధాన కార్యాలయంలో జాతీయ జెండాను ఎగరవేసి, సెల్యూట్ చేశారు.
జవాన్ల సెల్యూట్..
'హిమవీరులు'గా పిలిచే ఇండో-టిబెటిన్ బార్డర్ పోలీసులు.. ఉత్తరాఖండ్లోని ఔలిలో 73వ రిపబ్లిక్ డే వేడుకలను జరుపుకున్నారు. అటు లద్దాఖ్లోని ఐటీబీపీ దళాలు.. మైనస్ 40 డిగ్రీల ఉష్ణోగ్రత, 15వేల అడుగుల ఎత్తులో జాతీయ జెండాను ఎగరేసి సెల్యూట్ చేశారు. జాతీయ గీతాన్ని ఆలపించి.. దేశభక్తిని చాటుకున్నారు.
సంబంధిత కథనం