Minor raped by father : ఆరేళ్లుగా కూతురిపై తండ్రి అత్యాచారం- భరించలేక మైనర్​ ఆత్మహత్య

Minor raped by father : మణిపూర్​లో అత్యంత దారుణ ఘటన వెలుగులోకి వచ్చింది. ఓ వ్యక్తి.. తన కూతురిపై ఆరేళ్లుగా అత్యాచారానికి పాల్పడుతున్నాడు. బాధను భరించలేక.. 15ఏళ్లకే ఆత్మహత్యకు పాల్పడి ప్రాణాలు తీసుకుంది బాధితురాలు.

ఆరేళ్లుగా..

15ఏళ్ల బాలిక.. తన కుటుంబంతో కలిసి తౌబాల్​ జిల్లాలో జీవిస్తోంది. కాగా.. బాలికపై ఆమె తండ్రి గత ఆరేళ్లుగా అత్యాచారానికి పాల్పడుతున్నాడు!

ఈ విషయాన్ని తన నాన్నమ్మకు ఆ బాలిక ఫిర్యాదు చేసింది. కానీ ఆమె పట్టించుకోలేదు. కొడుకు తప్పును కప్పిపుచ్చేందుకు ప్రయత్నించింది.

ఈ క్రమంలోనే.. పలువురు స్నేహితులతో తన పరిస్థితిని చెప్పుకుని బాధపడింది ఆ మైనర్​. అంతేకాకుండా.. ఓ డైరీలో తన బాధను రాసుకుంది!

తండ్రి అఘాయిత్యాలు రోజురోజుకు ఎక్కువ అయిపోవడంతో ఆ బాలిక మానసికంగా కృంగిపోయింది. బోర్డింగ్​ స్కూల్​కు వెళతానని వేడుకున్నా.. తండ్రి ఒప్పుకోలేదు.

ఇక చివరికి.. జులై 31 సాయంత్రం ఆత్మహత్యకు బాధితురాలు పాల్పడింది.

Manipur rape case : ఆమెకు తీవ్ర గాయాలైనప్పటికీ ఎవరూ పట్టించుకోలేదు! మూడు రోజుల పాటు ఇంట్లోనే ఉంది ఆ బాలిక. ఆమె పరిస్థితి విషమించడంతో.. చివరికి ఆమెను ఈ నెల 3వ తేదీన జేఎన్​ఐఎంఎస్​ ఆసుపత్రిలో చేర్పించారు. ఆమెకు చికిత్స చేసేందుకు ఆసుపత్రి వైద్యులు, నర్సులు తీవ్రంగా కృషిచేశారు. కానీ ఆమె ఆరోగ్యం మెరుగుపడకపోవడంతో మరో ప్రైవేటు ఆసుపత్రికి సిఫార్సు చేశారు.

అక్కడే.. ఆ బాలిక స్టేట్​మెంట్​ను పోలీసులు రికార్డు చేశారు. నిందితుడిని ఆగస్టు 5న అరెస్ట్​ చేశారు. ఈ ఘటన మణిపూర్​లో కలకలం సృష్టించింది. నిందితుడి ఇంటిని నిరసనకారులు తగలబెట్టారు. బాలికకు న్యాయం జరగాలని డిమాండ్​ చేశారు.

మరోవైపు బాలిక ఆరోగ్యం మరింత క్షీణించింది. ఈ నెల 18న.. మరో ఆసుపత్రికి తరలించగా.. చికిత్స పొందుతూ ఆదివారం ఆమె తుదిశ్వాస విడిచింది.

ఘటనపై కేసు నమోదు చేసుకున్న పోలీసులు.. తన పరిధిలో చేయగలిగినది అంతా చేస్తామని హామీనిచ్చారు. కాగా బాలిక డైరీని పోలీసులు ఇంకా స్వాధీనం చేసుకోలేదని తెలుస్తోంది.