Bengaluru traffic : బెంగళూరు వాసులకు గుడ్​ న్యూస్​.. ‘టన్నెల్​’తో ట్రాఫిక్​ కష్టాలు తీరినట్టే!

Bengaluru traffic : బెంగళూరు వాసులకు గుడ్​ న్యూస్​! దేశవ్యాప్తంగా చర్చనీయాంశంగా మారి, మీమ్స్​ జాతరకు కారణమవుతున్న బెంగళూరు ట్రాఫిక్​ను తగ్గించేందుకు కర్ణాటక ప్రభుత్వం కీలక నిర్ణయం తీసుకుంది. 190 కి.మీల భారీ టన్నెల్​ను నిర్మించనున్నట్టు ప్రకటించింది. త్వరలోనే పబ్లిక్​ టెండర్లకు ఆహ్వానాలు పంపిస్తామని స్పష్టం చేసింది.

నగరంలో ట్రాఫిక్​ సమస్యలు.. బెంగళూరు వాసులకు చాలా తలనొప్పిగా మారాయి. పక్కనే ఉన్న ప్రాంతాలకు వెళ్లాలన్నా.. తీవ్రమైన ట్రాఫిక్​ జామ్​లు అవుతున్నాయి. ఈ నేపథ్యంలో ఓ టన్నెల్​ను నిర్మిస్తున్నట్టు ఆ రాష్ట్ర డిప్యూటీ సీఎం డీకే శివకుమార్​ చెప్పడం కాస్త ఉపశమనాన్ని కల్పించే విషయం.

Bengaluru tunnel road : "190 కి.మీల పొడవైన టన్నెల్​ రోడ్డును నిర్మించేందుకు ప్రతిపాదించాము. బెంగళూరు ట్రాఫిక్​ నుంచి ప్రజలకు ఉపశమనం కల్పించేందుకు చర్యలు తీసుకుంటున్నాము. 8 కంపెనీలు క్వాలిఫై అయ్యాయి. 45 రోజుల్లో టెండర్లకు పిలుస్తాము," అని డీకే శివకుమార్​ అన్నారు.

ఇక టన్నెల్​ రోడ్డు.. 6 లేన్లు ఉండాలా? లేక 4 లేన్లు సరిపోతాయా? అన్న విషయాన్ని కంపెనీలు అధ్యయనం చేసి, నివేదిక ఇస్తాయి. ఎక్కడి నుంచి మొదలవ్వాలి? ఎక్కడి ముగించాలి? అన్నది కూడా నివేదికలో ఉంటుంది.

ఈ ప్రాంతాల్లో టన్నెల్​ రోడ్డు..!

Bengaluru tunnel road project : బెంగళూరు ట్రాఫిక్​ను నియంత్రించేందుకు.. బెల్లారి రోడ్డు, ఓల్డ్​ మద్రాస్​ రోడ్డు, ఇస్టీమ్​ మాల్​ జంక్షన్​- మెఖ్రీ సర్కిల్​, మిల్లర్​ రోడ్డు, చాలుక్య సర్కిల్​, ట్రినిటీ సర్కిల్​, సర్జాపుర్​ రోడ్డు, హోసూర్​ రోడ్డు, కనకపురా రోడ్డు- కృష్ణ రావు పార్క్​, మైసూర్​ రోడ్డు- సిర్సి సర్కిల్​, మగాడి రోడ్డు, తిుమకురు రోడ్డు- యశ్వంత్​పూర్​ జంక్షన్​, ఔటర్​ రింగ్​ రోడ్డు, గోరగుంటపల్య, కేఆర్​ పురం, సిల్క్​ బోర్డు ప్రాంతాల్లో 190 కి.మీల భారీ టన్నెల్​ను రూపొందించాలని భావిస్తున్నట్టు కర్ణాటక డిప్యూటీ సీఎం తెలిపారు.

ఇక రుతుపవనాల సీజన్​ ముగియడంతో.. నగరంలో మిగిలిపోయిన డ్రైనేజ్​, ఇతర పనులను శరవేగంగా పూర్తిచేయనున్నట్టు డీకే శివకుమార్​ వెల్లడించారు. రోడ్లపై గుంతల సమస్యను కూడా తగ్గించేందుకు చూస్తున్నట్టు స్పష్టం చేశారు. డిప్యూటీ సీఎం పదవితో పాటు బెంగళూరు డెవల్​ప్​మెంట్​ విభాగం కూడా డీకే శివకుమార్​ దగ్గరే ఉంది.

Bengaluru tunnel plan : బెంగళూరు ట్రాఫిక్​ సమస్యను తగ్గించేందుకు కేంద్ర సహాయాన్ని తీసుకుంటారా? అని మీడియా అడిగిన ప్రశ్నకు.. '190 కి.మీల టన్నెల్​ అనేది చాలా పెద్ద ప్రాజెక్ట్​. కేంద్ర సాయం కచ్చితంగా తీసుకుంటాము. నివేదికలు వచ్చిన తర్వాత.. వాటిని కేంద్రానికి సమర్పిస్తాము. కేంద్రమంత్రి నితిన్​ గడ్కరీని నేను ఇప్పటికే కలిశాను. జాతీయ రహదారుల నుంచి వచ్చే వాహనాలు.. బెంగళూరు ట్రాఫిక్​ కారణమవుతున్నాయి. ఈ విషయం ఆయనకు చెప్పాను. ఆయన నాకు కొన్ని సలహాలు ఇచ్చారు,' అని డీకే శివకుమార్​ అన్నారు.