Barack Obama wins Emmy award : బరాక్​ ఒబామాకు 'ఎమ్మీ' అవార్డు..

Barack Obama wins Emmy award : అమెరికా మాజీ అధ్యక్షుడు బరాక్​ ఒబామాకు ప్రతిష్ఠాత్మక ఎమ్మీ అవార్డు వరించింది. నెట్​ఫ్లిక్స్​ డాక్యుమెంటరీ "అవర్​ గ్రేట్​ నేషనల్​ పార్క్స్​"లో ఆయన చేసిన నరేషన్​కు ఈ ఎమ్మీ అవార్డు దక్కింది. ఎందరో సెలబ్రెటీలను వెనక్కి నెట్టి.. అమెరికా మాజీ అధ్యక్షుడు బరాక్​ ఒబామాకు ఈ ఎమ్మీ అవార్డు దక్కడం విశేషం.

గ్రామీలు కూడా…!

సాధారణంగా వినోద రంగంలో.. ఎమ్మీ, గ్రామీ, ఆస్కార్​, టోనీ అవార్డులు అత్యంత ప్రతిష్ఠాత్మకంగా భావిస్తుంటారు. బరాక్​ ఒబామా వద్ద ఇప్పటికే రెండు గ్రామీ అవార్డులు ఉన్నాయి. తాజాగా ఆయనకు ఉన్న అవార్డుల జాబితాలోకి ఎమ్మీ కూడా చేరింది. ఇక ఆస్కార్​, టోనీ అవార్డులు కూడా వస్తే.. ఈజీఓటీ(ఎమ్మీ, గ్రామీ, ఆస్కార్​, టోనీ)ని దక్కించుకున్న జాబితాలోకి ఆయన చేరుతారు. ఇప్పటివరకు ప్రపంచవ్యాప్తంగా కేవలం 17మంది మాత్రమే ఈజీఓటీ జాబితాలోకి చేరారు.

Our great national parks : ఇక అవర్​ గ్రేట్​ నేషల్​ పార్క్స్​ అనే డాక్యుమెంటరీని హైయర్​ గ్రౌండ్​ ప్రొడక్షన్స్​, బరాక్​ అండ్​ మిచెల్​ ఒబామా ప్రొడక్షన్​ కంపెనీలు సంయుక్తంగా నిర్మించాయి. ప్రపంచంలోని నేషనల్​ పార్కులపై ఈ డాక్యుమెంటరీ సాగుతుంది.

అయితే.. ఓ అమెరికా అధ్యక్షుడు ఎమ్మీ అవార్డును పొందడం ఇది రెండోసారి. 1956లో.. డ్వైట్​ డీ ఐసిన్​హౌవర్​.. స్పెషల్​ ఎమ్మీ అవార్డును స్వీకరించారు. ఇక తాజాగా.. బరాక్​ ఒబామాకు ఎమ్మీ అవార్డు దక్కింది.

"ది అడాసిటీ ఆఫ్​ హోప్​", "ఎ ప్రామిస్డ్​ ల్యాండ్​" ఆడియో బుక్స్​లో కథనంపై బరాక్​ ఒబామాకు రెండు గ్రామీ అవార్డులు దక్కాయి. తన సొంత ఆడియో బుక్​ చదివినందుకు గాను.. ఒబామా సతీమణి మిచెల్​ ఒబామాకు 2020లో గ్రామీ దక్కింది.