అసలు ఈ పాన్‌ ఇండియా అంటే ఏంటో.. కేజీఎఫ్‌2పై అభిషేక్‌ బచ్చన్‌ షాకింగ్‌ కామెంట్స్‌

ఇన్నాళ్లూ ఇండియన్‌ సినిమా అంటే బాలీవుడ్‌. ఇదే విషయాన్ని మొన్న ఆచార్య ప్రీ రిలీజ్‌ ఈవెంట్‌లోనూ చిరంజీవి చెబుతూ.. సౌత్‌ సినిమాలను చిన్నచూపు చూడటం తాను అవమానంగా భావించినట్లు చెప్పాడు. కానీ బాహుబలి తర్వాత సీన్‌ మారిపోయింది. ఆ స్ఫూర్తితో తెలుగు, కన్నడ, తమిళ ఇండస్ట్రీల నుంచి పాన్‌ ఇండియా సినిమాల వెల్లువ మొదలైంది. గత నాలుగు నెలల్లోనే హిందీ బెల్ట్‌లో మూడు సౌత్‌ సినిమాలు దుమ్మురేపాయి.

ఈ సక్సెస్‌పై కొందరు బాలీవుడ్‌ స్టార్లు మంచిదేగా అంటూ స్పందించగా.. మరికొందరికి మాత్రం ఇది పెద్దగా నచ్చనట్లు కనిపిస్తోంది. తాజాగా అభిషేక్‌ బచ్చన్‌ ఈ ట్రెండ్‌పై స్పందించాడు. ఈ మధ్యే తన దస్వీ మూవీని థియేటర్‌లో కాకుండా నేరుగా ఓటీటీలో రిలీజ్‌ చేసిన అతడు.. సౌత్‌ సినిమాల సక్సెస్‌పై సంచలన కామెంట్స్‌ చేశాడు. అసలు ఈ పాన్‌ ఇండియా అంటే ఏంటో తనకు తెలియదని, దీన్ని తాను విశ్వసించనని అభిషేక్‌ అనడం విశేషం. అసలు ఈ పదాన్ని ఫిల్మ్‌ ఇండస్ట్రీలో కాకుండా మరేదైనా ఇండస్ట్రీలో ఉపయోగిస్తున్నారా అని ఎదురు ప్రశ్నించాడు.

హిందీలో కేజీఎఫ్‌2తోపాటు పుష్ప, ఆర్ఆర్‌ఆర్‌ సినిమాలకు మంచి కలెక్షన్లు వచ్చాయని చెప్పాడు. సినిమాకు భాషతో సంబంధం లేదని, ఏ భాషలో వచ్చినా చివరికి అది ఒక సినిమానే అని అన్నాడు. హిందీ సినిమాల్లో కంటెంట్‌ లేదన్న విమర్శలను అతడు ఖండించాడు. హిందీలోనూ చాలా మంచి సినిమాలు వస్తున్నాయని చెప్పాడు. సినిమాలో కంటెంట్‌ బాగుంటే.. ఏ భాషలో అయినా హిట్‌ అవుతుందని అభిషేక్‌ అభిప్రాయపడ్డాడు.