Acharya | ఈ సినిమాలో మునుపెన్నడు చూడని చిరును చూస్తారు: మెహర్ రమేశ్

మెగాస్టార్ చిరంజీవి- మెగాపవర్ స్టార్ రామ్ చరణ్ కలిసి నటించిన సినిమా ఆచార్య. ఈ చిత్రాన్ని సెన్సేషనల్ డైరెక్టర్ కొరటాల శివ తెరకెక్కించారు. ఇప్పటికే విడుదలైన పాటలు, టీజర్, ట్రైలర్ ఆకట్టుకున్నాయి. దీంతో మెగా అభిమానులతో పాటు ప్రేక్షకుల్లోనూ భారీగా అంచనాలు పెరిగాయి. ఏప్రిల్ 29న సినిమాను ప్రపంచ వ్యాప్తంగా విడుదల చేసేందుకు చిత్రబృందం సన్నాహాలు చేస్తోంది. దీంతో ప్రమోషన్స్‌పై దృష్టి పెట్టింది. తాజాగా ఆచార్య చిత్ర ప్రీ రిలీజ్ ఈవెంట్ హైదరాబాద్‌లో జరిగింది. ఈ కార్యక్రమానికి చిరు, చరణ్‌తో పాటు ముఖ్య అతిథిగా రాజమౌళి, బాబీ, మోహన్ రాజా, మెహర్ రమేశ్ విచ్చేశారు. ఈ ప్రీ రిలీజ్ ఈవెంట్‌కు హాజరైన డైరెక్టర్ మెహర్ రమేశ్ సినిమా గురించి కొన్ని విషయాలను పంచుకున్నారు.

"మెగాస్టార్ చిరంజీవి సినిమా అంటేనే ఓ పండుగలా ఉంటుంది. అలాంటిది ఈ చిత్రంలో కొరటాల శివ చిరుతో పాటు రామ్ చరణ్‌ను చూపిస్తున్నారు. దీంతో ఈ సినిమా అభిమానులకు కన్నుల పండుగలాగే ఉంటుంది. ముఖ్యంగా ఆచార్య చిత్రంలో ఇంటర్వెల్ సీన్ హైలెట్‌గా ఉంటుంది. ఈ సన్నివేశాన్ని చూశాను. ఇంతకుముందెన్నడు చూడని మెగాస్టార్‌ను ఈ చిత్రంలో చూస్తారు. బంజారా సాంగ్‌లో చిరు, చరణ్ డ్యాన్స్ అదిరిపోయింది" అని మెహర్ రమేశ్ కితాబిచ్చారు.

ఈ సినిమా ప్రీ రిలీజ్ ఈవెంట్‌కు పూగా హెగ్డే కూడా హజారైంది. సినిమా గొప్ప విజయాన్ని సాధించాలని ఈ కార్యక్రమానికి హాజరైన అతిథులు విషెస్ తెలిపారు. చిరు తన తర్వాతి చిత్రం భోళా శంకర్ అనే సినిమాను మెహర్ రమేశ్ దర్శకత్వంలో చేయనున్నారు. ఈ కార్యక్రమానికి హాజరైన మెహర్ రమేశ్.. నీలాంబరి వీడియో సాంగ్‌ను లాంచ్ చేశారు.

ఓ పక్క ఆచార్య విడుదలకు సిద్ధంగా ఉంటే తన తర్వాతి సినిమాలతోనూ బిజీగా ఉన్నారు మన మెగాస్టార్. ప్రస్తుతం గాడ్ ఫాదర్, భోళా శంకర్ సినిమాల్లో నటిస్తూ బిజీగా ఉన్నారు. ఈ రెండు సినిమాలు చిత్రీకరణ దశలో ఉన్నాయి. ఇంతలోనే బాబీ దర్శకత్వంలో నటించేందుకు గ్రీన్ సిగ్నల్ ఇచ్చేశారు.