Bigg Boss Abijeet: అమెజాన్ వెబ్‌సిరీస్ తో బిగ్‌బాస్ విన్న‌ర్ అభిజీత్ రీఎంట్రీ

శేఖ‌ర్ క‌మ్ముల ద‌ర్శ‌క‌త్వంలో రూపొందిన లైఫ్ ఈజ్ బ్యూటీఫుల్ చిత్రంతో టాలీవుడ్ లో తొలి అడుగు వేశాడు అభిజీత్‌. ఇందులో మెయిన్ హీరోగా క‌నిపించాడు. ఈ సినిమా అతడికి మంచి పేరు తెచ్చిపెట్టినా అవ‌కాశాలు మాత్రం ఆశించినంతగా రాలేదు.ఆ త‌ర్వాత ఒక‌టి రెండు చిన్న సినిమాల్లో క‌నిపించాడు. అవేవీ అభిజీత్ ను హీరోగా నిల‌బెట్ట‌లేక‌పోయాయి.

పెళ్లిగోల అనే వెబ్‌సిరీస్ చేశాడు. ఆ త‌ర్వాత టాలీవుడ్ కు దూర‌మైన అభిజీత్ అమెరికా వెళ్లిపోయాడు. అనూహ్యంగా సీజ‌న్ 4లో కంటెస్టెంట్స్ లో ఒక‌రిగా బిగ్ బాస్ హౌజ్ లో అడుగుపెట్టాడు. ఎలాంటి అంచ‌నాలు లేకుండా బిగ్‌బాస్ లో ఎంట్రీ ఇచ్చిన అభిజీత్ విజేత‌గా నిలిచాడు. బిగ్‌బాస్ విన్న‌ర్ త‌ర్వాత అత‌డికి భారీగా అవ‌కాశాలు వ‌స్తాయ‌ని అంద‌రూ అనుకున్నారు.కానీ అలాంటిదేమీ జ‌ర‌గ‌లేదు.

తాజాగా మోడ్రన్ లవ్ హైదరాబాద్ పేరుతో అమెజాన్ ప్రైమ్ ఓటీటీ సంస్థ ఓ వెబ్ సిరీస్ ను తెరకెక్కిస్తోంది. ఈ సిరీస్ లో అభిజీత్ తో పాటు ఆది పినిశెట్టి, నీత్యామీనన్, రీతూ వర్మ, సుహాసిని మణిరత్నం, నరేష్ అగస్త్య , మాళవికా నాయర్ కీలక పాత్రలను పోషించనున్నారు. ఆరు కథలతో ఈ అంథాలజీ సిరీస్ రూపొందుతోంది. ఈ వెబ్ సిరీస్ కు నగేష్ కుకునూర్, వెంకటేష్ మహా, ఉదయ్ గుర్రాల, దేవిక దర్శకత్వం వహిస్తున్నారు.

హైదరాబాద్ నగర నేపథ్యంలో రొమాంటిక్ కథలతో విభిన్నంగా ఈ సిరీస్ ఉండబోతున్నట్లు చెబుతున్నారు. జూలై 8న నుండి ఈ సిరీస్ స్ట్రీమింగ్ కాబోతున్నట్లు అమెజాన్ సంస్థ ప్రకటించింది. ఈ వెబ్ సిరీస్ ఫస్ట్ లుక్ పోస్టర్ ను రిలీజ్ చేసింది. ఈ సిరీస్ అభిజీత్ కెరీర్ ను నిలబెడుతుందా లేదా అన్నది చూడాల్సిందే..