Dasyam Vinay Bhaskar : దాస్యం వినయ్ భాస్కర్ నామినేషన్ రిజెక్ట్ చేయండి, ఆర్వోకు బీజేపీ అభ్యర్థి భర్త ఫిర్యాదు

Dasyam Vinay Bhaskar : నామినేషన్ స్క్రూటినీ వేళ వరంగల్ పశ్చిమ ఎమ్మెల్యే దాస్యం వినయ్​ భాస్కర్​కు షాక్​ తగిలింది. ఆయన నామినేషన్​ రిజెక్ట్​ చేయాల్సిందిగా రిటర్నింగ్ ఆఫీసర్​కు ఫిర్యాదు అందింది. నాలుగు సార్లు ఎమ్మెల్యేగా నామినేషన్లు దాఖలు చేసిన అనుభవం ఆయనకు ఉండగా.. స్క్రూటినీ రోజే ఫిర్యాదు అందడంతో ఒక్కసారిగా ఆయన కంగుతిన్నారు. ఎన్నికల నామినేషన్​ ప్రక్రియ పూర్తి కావడంతో సోమవారం ఆఫీసర్లు స్క్రూటినీ ప్రక్రియ ప్రారంభించారు. ఇందుకు అన్ని ప్రధాన పార్టీల అభ్యర్థుల తరఫున ఎలక్షన్​ ఏజెంట్లు కూడా పాల్గొన్నారు. కాగా బీజేపీ అభ్యర్థి రావు పద్మరెడ్డి తరఫున ఆమె భర్త, న్యాయవాది రావు అమరేందర్​రెడ్డి హాజరయ్యారు. కాగా స్క్రూటినీ అనంతరం అమరేందర్​రెడ్డి సిట్టింగ్​ఎమ్మెల్యే, బీఆర్​ఎస్​ అభ్యర్థి దాస్యం వినయ్​భాస్కర్ ఎన్నికల అఫిడవిట్ లో తప్పుడు వివరాలు అందించారని హనుమకొండ ఆర్డీవో, రిటర్నింగ్​ ఆఫీసర్​ రమేశ్​కు లిఖితపూర్వకంగా ఫిర్యాదు చేశారు.

రూ.3 వేల ఫైన్

రైల్వేస్​ యాక్ట్​ సెక్షన్174(a) ప్రకారం వినయ్​ భాస్కర్​ను దోషిగా తేల్చుతూ 2018 సీసీ నెంబర్ 81 కేసులో స్పెషల్​ సెషన్స్​ జడ్జీ రూ.1,000 ఫైన్ వేసినట్లు అఫిడవిట్ లో పేర్కొన్నారని, ఆయన ఫైన్​రూపంలో రూ.3 వేలు కట్టారని లేఖలో తెలిపారు. కానీ వినయ్ భాస్కర్ సమర్పించిన ఫామ్ నెంబర్​ 26 ఐదో పేజీలో రూ.వెయ్యి మాత్రమే చెల్చించినట్లు తెలిపారన్నారు. ఉద్దేశపూర్వకంగా తప్పుడు వివరాలు అందించినందుకు వినయ్​ భాస్కర్​ నామినేషన్ తిరస్కరించాల్సిందిగా ఆయన ఫిర్యాదు చేశారు. ఈ మేరకు ఫిర్యాదును రిటర్నింగ్ ఆఫీసర్​ రమేశ్​కు అందించారు. కాగా అధికారులు దీనిపై ఏ విధమైన చర్యలు తీసుకుంటారోనని నియోజకవర్గంలో తీవ్ర చర్చ జరుగుతోంది.

రిపోర్టింగ్ : హెచ్.టి.తెలుగు ప్రతినిధి, వరంగల్